1Yes Israela timundig muul ve tipul ndug Repidim, ve tilaagh tila tivot izi ndug balim Sinai. Laghooŋ todi to tipul Isip ve tinim, nene tigham kaiyo ru wa. Ve ite inim tol pani, ndag inim mata, ghoro tila tivot izi lolooz Sinai pughu, ve atedi izi tonowe.
3Mose ipul di tineep, ve izala pa lolooz, leso yesuru Maaron tisavsaav. Yoova ineep lolooz daba, ve imboob izila pani ighaze: “Usaav pa yes Israela to papaghu to Yakop ne tovene:
4‘Ŋgar to you nagham pa yes Isipa, yam Israela aghita pa taumim matamim wa. Yam awatag: You nambaad gham inimale manbog imbaad ndinatu izala bage, ve nagham gham anim avot tiou izi sualen.
5Aazne, ighaze yam alooŋ aliŋag, ve matamim iŋgal saveeŋ mbuaaŋ tiou, ve ataghon katin tutuuŋa, nene pale anim leg kat, ve itiŋa talup ghiit tanim ee moghon. Onoon, taan isob toman tamtoghona, nene you tiou moghon. Ve yam ghoro, taug nasia gham, ve nagham gham anim leg kat. You naghaze yam asob aneep ila pooz tiou samba, ve ambees payou animale ndiran to watooŋrau. Leso anim tamtoghon tiou patabuaŋa.’”
7Yoova isavsaav le isob, ghoro Mose imuul izila to yes Israela. Ila ivot todi, ve ipoi ndolmana todi tinim tilup di, ve ipaesia Yoova aliŋa isob tonenen padi.
8Yes tilooŋ saveeŋ toni, ve tisob tilup avodi tighaze: “Poia, saveeŋ isob to Yoova isavia, yei pale nitaghoni.” Tovenen Mose imuul izala to Yoova, ve ipaesia yokiiŋ todi pani.
9Yoova isaav pani ighaze: “Ulooŋ! You pale naneep ila yaghur tae asosooŋa lolo ve nalat tiom, ve nasavsaav toman ghom ve ival tiina tilooŋa. Leso tighur ila saveeŋ tiom ve titaghoni taghoni gha ila.”
10Mose ipaesia yes Israela aliŋadi pa Yoova le isob, ghoro Yoova isaav pani ighaze: “Umuul uzila, ve usaav padi tovene: Aazne ve bozo, yes irau timen nonogiiŋa todi ve tigharaat di, leso tiŋgalaaŋ ila matag, ve tisasaŋan. Pasa mboŋru, ghoro yes Israela pale tisob tighita ghou nazi nanim ve naneep izala lolooz Sinai daba.
12“Tovenen uŋgun saŋguyaŋ iluvut lolooz pughu, leso tamtoghon tineep saguan. Ve usaav ariaŋa padi, leso tiza tinim lolooz sob, ve titut lolooz pughu rita malep. Ighaze tamtoghon eta ilaagh inim le ivazag lolooz pughu, yam arabi imaat.
13Ve ataam to rabuuŋ, nene arabi pa nimamim malep. Aneep saguan, ve arabi pa yaam, ma avanegi. Tovenen ighaze tamtoghon eta, ma ŋgai eta itut lolooz pughu, nene irau ineep maau. Yam arabi imaat. Saveeŋ tonene pale ineep tovene le irau alooŋ tavuur itaŋ le mala, ghoro yam irau azala lolooz.”
14Yoova isavsaav le isob, ghoro Mose ipul lolooz daba, ve imuul izila to yes Israela, ve isaav padi ighaze timen nonogiiŋa todi ve tigharaat taudi, leso tiŋgalaaŋ ila Yoova mata, ve tisasaŋan.
15Ve ipaes padi ighaze: “Aazne ve bozo, yam agharaat taumim ve asasaŋan. Agheen toman ndiliva malep. Pasa mboŋru, ghoro Yoova izi inim.”
16Tinepneep le mboŋ ru isob, ve mboŋmaagh, ghoro yaghur tae asosooŋa inim ikau lolooz daba. Ve ndug milia, ve lalaav irabrabi. Ve mbeb eez itaŋ inimale tavuur, eemoghon avolutu tiina kat. Tovenen yes Israela tisob timatughez le tapiridi isob.
17Mose igham di tipul ndug todi to nepooŋ, ve tila tiyoon tigharau lolooz pughu, leso yesŋa Maaron tilup di.
18Ghoro Yoova izi inim toman yab tiina izala lolooz Sinai daba, ve mbuas tiina ikau lolooz le tighita muul maau. Ve yoŋgyoog tiina itok, le lolooz katkatia ilala inimnim. Ve mbeb to itaŋ inimale tavuur, itaŋtaŋ ve indurnduur inim inim le avolutu ivot inim tiina kat. Ghoro Mose isavsaav toman Maaron. Ve sawa to Maaron ipamuul saveeŋ toni, aliŋa inimale lalaav avolutu.
20Tovenen Yoova izi inim ineep izala lolooz Sinai daba, ve ipoi Mose ighaze izala toni tonowe.
21Tovenen Mose izala toni, ve Yoova isaav pani ighaze: “Umuul uzila, ve uveivei pa ival tiina tovene: Tizoorndug pa tiza tinim tighita ghou malep. Pasa, ighaze tiza tinim, nene pale tamtoghon katindi timatmaat.
22Yes ndiran to watooŋrau paam. Ighaze lolodi tighaze tinim tigharau ghou, nene yes irau tigharaat taudi le tiŋgalaaŋ kat. Le isob, ghoro tinim tivot tiou. Ighaze tigharaat taudi maau, nene pale ateg yabyab padi, ve narab di tilaledi.”
23Mose isaav pa Yoova ighaze: “Tamtoghon eta irau iza inim lolooz tonene maau. Pasa, yom taum usaav ariaŋa payei ughaze niŋgun saŋguyaŋ iluvut lolooz pughu, leso tamtoghon tighita lolooz tonene inimale ndug patabuaŋ ve tiroron pani.”
24Yoova isaav pani muul ighaze: “Poia. Umuul uzila ugham togham Aron, ve yamru moghon aza anim. Eemoghon yes ndiran to watooŋrau toman ival tiina to Israel tizoorndug pa tiza tinim tighita ghou malep. Ighaze tiza tinim, nene pale ateg yabyab padi, ve narab di tilaledi.”
25Yoova isavsaav le isob, ghoro Mose imuul izila, ve ipaesia aliŋa pa yes Israela.
