1Odarik savore Izraeliti pes mukle la pušťatar Sin, avke sar lenge prikazinďa o RAJ a džanas than thanestar. Paľis peske kerde taboris andro Refidim, ale ode len na sas paňi te pijel.
2Akor pes o manuša chudle te vesekedinel le Mojžišoha a phende leske: “De amen paňi! Sam smedna.” O Mojžiš lenge phenďa: “Soske pes manca vesekedinen? Soske pokušinen le RAJES?”
3Ale o manuša sas igen smedna a reptinenas pro Mojžiš: “Soske amen iľal avri andral o Egipt? Vašoda, hoj amen, amare čhave the o dobitkos te meras le smedostar?”
4O Mojžiš igen phučelas le RAJESTAR: “So te kerel kale manušenca? Se murdarena man le barenca!”
5O RAJ phenďa le Mojžišoske: “Dža anglo manuša a le peha varesave Izraelike vodcen. Le e paca andro vast, savaha demaďal pal o paňi Nil, a dža!
6Ode ačhava angle tu pre skala, pro verchos Choreb. Sar demeha pal e skala, avela andral avri o paňi, hoj te pijen o manuša.” Avke o Mojžiš kada kerďa anglo Izraelike vodci.
7Ole thaneske diňa nav Massa the Meriba, bo o Izraeliti pes ode vesekedinenas a pokušinenas le RAJES, sar phenenas: “Hin maškar amende o RAJ abo na?”
8Paľis avle o Amaleka a gele pro mariben pro Izraeliti paš o Refidim.
9O Mojžiš prikazinďa le Jozuaske: “Kide avri muršen a dža pro mariben pro Amaleka. Me tajsa džava pro verchos a terďuvava ode le Devleskera pacaha andro vast.”
10O Jozua kerďa, avke sar leske prikazinďa o Mojžiš a marelas pes le Amalekenca. O Mojžiš, Aron the o Hur, gele upre pro verchos.
11Medik sas le Mojžišoskere vasta hazdle upre, ňerinenas (zviťazinenas) o Izraeliti, ale sar o vasta thovelas tele, ňerinenas o Amaleka.
12Sar o Mojžiš imar na birinelas te hazdel upre o vasta, ande leske bar, hoj te bešel upre. O Aron leske podhazdelas jekh vast a o Hur dujto vast. Avke sas leskere vasta hazdle upre calo džives, medik na zapeľa o kham.
13Vašoda o Jozua ňerinďa upral o Amaleka la šabľaha.
14Paľis o RAJ phenďa le Mojžišoske: “Zapisin kada andro zvitkos, hoj te el pro leperiben a phen le Jozuaske, hoj o leperiben pal o Amaleka khosava pal kadi phuv.”
15Akor o Mojžiš ačhaďa ode oltaris a diňa leske nav: O RAJ mange diňa o ňerinďipen (viťaztvo).
16A phenďa: “Vašoda hoj hazdle peskero vast pre le RAJESKERO tronos, o RAJ pes le Amalekenca marela pokoleňje pro pokoleňje.”
