1Akor o Mojžiš vičinďa savore Izraeliten a phenďa lenge: “O RAJ prikazinďa, hoj te doľikeren kada:
2Šov dživesa kerena tumari buči, ale eftato džives – o Šabbat – ela tumen sentno džives le odpočinkoskero, so hino oddino le RAJESKE. Dojekh, ko oda džives kerela varesavi buči, mušinel te merel.
3Pro Šabbat andre ňisavo kher ma podlabaren aňi e jag.”
4O Mojžiš lenge mek phenďa: “O RAJ prikazinďa the oda:
5Dojekh, ko kamel, mi anel le RAJESKE obeta: o somnakaj, o rup, o brondzos,
6e fijalovo, ľoľi the purpurovo vlna, o sane pochtana, o kozakere bala,
7e ľoľi sfarbimen cipa le baranostar, e cipa le tuleňistar, o akacijakere kašta,
8olejos prekal o lampi, o koreňje pro olejos te pomakhel the pro voňavo kaďidlos,
9onixoskere the aver dragane bara pro efodos the pre rašajiko žeba pre brekh.
10Dojekh tumendar, ko džanel kala veci te kerel, mi avel a mi kerel savoro, so o RAJ prikazinďa:
11O Sentno Stanos, leskere lepedi, o čati, o rami, o tički, o slupi, o podstavci,
12e Zmluvakeri Archa, lakere dručki the kritos, o andruno pochtan,
13o skamind leskere sersamoha the dručkenca the o sentne mare,
14o momeľaris, so del o svetlos andro Stanos, peskere sersamoha, o lampi the lengere oleja,
15o kaďidloskero oltaris leskere dručkenca, o olejos pro pomakhľipen, o voňavo kaďidlos, e lepeda paš o Stanoskero vudar,
16o oltaris pro labarde obeti leskera brondzuňa roštaha, dručkenca the savore sersamoha, e brondzuňi nadoba le podstavcoha,
17o lepedi prekal e dvora le slupenca the podstavcenca; e lepeda prekal e dvorakeri brana,
18o cilore prekal o Stanos the dvora, the lengere lani;
19o side ruchi prekal e služba andro Sentno Than, the o sentne ruchi prekal o rašaj Aron the leskere čhave andre rašajiko služba.”
20Paľis savore manuša odgele le Mojžišostar.
21A dojekh, ko jilestar kada kamľa te kerel, anelas obetno daros le RAJESKE pro Sentno Stanos the savoro, so kampelas pre služba andre the pro rašajengere ruchi.
22Avenas ode o murša the o džuvľa a denas jilestar o naramki, kružki, angrusa, lancici the aver somnakune veci. Dojekh, ko kamelas te obetinel le RAJESKE somnakaj, anenas les.
23Dojekh, kas sas, anelas e fijalovo, ľoľi the purpurovo vlna, sane pochtana, kozakere bala, ľoľi sfarbimen cipa le baranostar the cipa le tuleňistar.
24Ko kamelas te anel rup abo brondzos, anelas oda sar obeta le RAJESKE. Dojekh, kas sas akacijakere kašta a delas pes lenca te kerel, anelas len.
25The savore džuvľa, save džanenas te kerel le ľanostar, anenas e fijalovo, ľoľi the purpurovo vlna, the sano pochtan.
26A o džuvľa, save džanenas te kerel o gada la kozakere balendar, jilestar oda kerenas.
27O vodci anenas onixoskere bara the aver dragane bara pro efodos the prekal e rašajiko žeba pre brekh,
28olejos prekal o lampi, the o koreňje pro voňavo kaďidlos the pro olejos te pomakhel.
29Savore Izraeliti ko kamenas, či murš vaj džuvľi, anenas le jilestar o daros le RAJESKE, hoj pes te kerel savoro, so o RAJ lenge prikazinďa prekal o Mojžiš.
30Paľis o Mojžiš phenďa le Izraelitenge: “Dikh, andral o kmeňos Juda kidňom mange avri le Becaleel, saveske sas dad o Uri a papus o Chur.
31O Del les pherarďa peskera zoraha a diňa les prindžaripen, achaľuvipen the goďaveripen pre dojekh buči,
32hoj te kerel šukar neve veci le somnakastar, le rupostar the le brondzostar;
33hoj te oprikerel o dragane bara a len te thovel andro somnakaj the rup; a hoj te čhingerel avri o kašta a te kerel dojekh majstroskeri buči.
34O Del diňa goďi les the le Oholiab, le Achisamachoskere čhas andral o kmeňos Dan, hoj te sikaven avren te kerel e buči.
35Pherarďa len la goďaha, hoj te keren dojekh buči le trasteha the le ľanoha, a hoj te siven la fijalova, ľoľa the purpurova vlnaha the le sane pochtaneha. Džanenas te kerel the e buči pro strojos, pre savo pes kerel o pochtana. On džanen te kerel savori buči the o plani pro Sentno Stanos.”
