1O RAJ phenďa le Mojžišoske:
2“Dikh, andral o kmeňos Juda kidňom mange avri le Becaleel, saveske hino dad o Uri a papus o Chur.
3Pherarďom les mire Duchoha a diňom les prindžaripen, achaľuvipen the goďaveripen pre dojekh buči,
4hoj te gondoľinel avri o plani sar te kerel o veci le somnakastar, le rupunestar the le brondzostar
5a hoj te oprikerel o dragane bara a te zathovel len andro somnakaj the rup, te čhingerel avri o kašta a te kerel dojekh majstroskeri buči.
6Paš leste diňom le Oholiab, le Achisamachoskere čhas andral o kmeňos Dan. A savore majstren diňom e goďi, hoj te keren savoro avke, sar tuke prikazinďom:
7O Sentno Stanos, e Zmluvakeri Archa the lakero kritos, the o aver veci andro Stanos,
8o skamind leskere sersamoha, o momeľaris le žuže somnakastar leskere sersamoha, o kaďidloskero oltaris,
9o oltaris pro labarde obeti leskere sersamoha, e bari brondzuňi nadoba le podstavcoha,
10o sane ruchi pre le rašajengeri služba prekal o Aron the leskere čhave,
11o olejos pro pomakhľipen the o voňavo kaďidlos prekal o Neksentneder Than. Savoro mi keren avke, sar tuke prikazinďom.”
12O RAJ phenďa le Mojžišoske,
13hoj te phenel le Izraelitenge: “Doľikeren o Šabbat, bo oda hin sar znameňje maškar mande the tumende pro furt, hoj te džanen, hoj me, o RAJ, tumen sentňarav.
14Doľikeren o Šabbat, bo hino sentno! Ko les na sentňarela, mušinel te merel a dojekh, ko andre oda džives kerela buči, mi el avritradlo peskere manušendar.
15Šov džives hin pre oda, hoj te keren buči, ale eftato hin le RAJESKERO sentno džives, hoj te odpočovinen. Dojekh, ko andre oda džives kerela buči, mušinel te merel!
16O Izraeliti andre dojekh pokoleňje mi doľikeren o Šabbat sar zmluva pro furt.
17Kada ela o znameňja maškar mande the mire manuša pro furt, bo o RAJ tel o šov dživesa kerďa o ňebos the e phuv, ale eftato džives preačhiľa te kerel a odpočovinelas.”
18Sar o RAJ dovakerďa le Mojžišoha pro verchos Sinaj, diňa leske o Sveďectvoskere tabli – o duj barune tabli, pre save o Del pisinďa o prikazaňja peskere angušteha.
