1Paľis kerena oltaris le akacijakere kaštestar prekal e kaďidloskeri obeta.
2Mušinel te el kerdo andre kocka, 45 centimetri džinďardo the buchlo, a učo 90 centimetri. Ela les pro štar agora po jekh rohos, ajse sar hin le biken, so ena jekhe kotorestar le oltariha.
3Calo oltaris obthov le žuže somnakaha a pašal leste ker somnakuno pasos.
4Pal soduj seri prichude o somnakune kariki tel o pasos avke, hoj prekal o kariki te predžan o dručki, hoj pes te del te hordinel.
5O dručki ker le akacijakere kaštestar a obcirdeha len le somnakaha.
6O oltaris thov angle lepeda, so hiňi angle zmluvakeri Archa. Ode man tuha arakhava.
7Sako tosara, sar o Aron džala te pririchtinel o lampi, labarela pre leste o voňavo kaďidlos.
8O Aron les labarela pale the ke račate, sar džala te zalabarel e jag andro lampi. Kadi voňavo obeta anena furt anglo RAJ pal savore tumare pokoleňja.
9Na obetinena upre aver kaďidlos, aňi ňisavi labarďi abo chabeneskeri obeta, a aňi na čhoreha avri e moľakeri obeta pre leste.
10Jekhvar andro berš o Aron obžužarela o oltaris avke, hoj pokropinela o štar rohi le džviroskere rateha, so sas obetimen vaš o bini. Kada kerela sako berš, pal savore tumare pokoleňja. Kada oltaris ela neksentneder prekal o RAJ.”
11Paľis o RAJ phenďa le Mojžišoske:
12“Sar zgeneha savore Izraeliten, hoj te džanes, keci hine, akor dojekh manuš pes mušinel te cinel avri anglo RAJ, hoj te na en marde le Devlestar, sar len zgeneha.
13Dojekh, ko ela zgendo, mušinel te del jepaš šeklos sar obeta, so hiňi hazdľi upre prekal o RAJ. O love kampel te važinel pal oda, sar pes važinel andro Sentno Stanos.
14O murša, kaske hin biš (20) berš a buter, ena zgende, a mušinen te del le RAJESKE kadi obeta.
15O barvalo manuš na počinela buter, aňi o čoro frimeder, sar anena odi obeta prekal o RAJ.
16Kala love kide avri le Izraelitendar a de pre služba andro Sentno Stanos. Me mange pre lende leperava, sar anena e obeta, so anel o smirom le RAJEHA.”
17O RAJ phenďa le Mojžišoske:
18“Ker e bari brondzuňi nadoba pro thoviben (moripen), so ačhela pro brondzuno podstavcos. Thov les maškar o Sentno Stanos the oltaris a čhiv andre paňi.
19O Aron the leskere čhave ode thovena o vasta the o pindre.
20Sar džana andro Sentno Stanos, mušinen pes te thovel le paňeha, hoj te na meren. Avke kerena, the sar džana ko oltaris te kerel e služba, hoj te keren e labarďi obeta prekal o RAJ.
21Mušinen te thovel peske o vasta the o pindre, hoj te na meren. Kada ela prekal o Aron the prekal leskere potomki prikazis pro furt, pokoleňje pro pokoleňje.”
22O RAJ mek phenďa le Mojžišoske:
23“Le nekfeder voňavo koreňje, le šov kili saňi mirha, trin kili voňavo škorica, trin kili voňavo trsťina
24the šov kili kassia – savoro važin avke, sar pes važinel andro Sentno Stanos. Zmišin oda le štar ľitri olivove olejoha
25a avke kereha sentno olejos pro pomakhľipen – oda ela zmišimen voňavo parfumos, avke sar kerel o olejkaris. Oda ela sentno olejos pro pomakhľipen.
26Pomakheha leha o Sentno Stanos the e Zmluvakeri Archa,
27o skamind leskere sersamoha, o momeľaris leskere sersamoha, o kaďidloskero oltaris,
28o oltaris pro labarde obeti leskere sersamoha, the e nadoba lakere podstavcoha.
29Sentňareha len a ena sentne. Sa, so pes lendar chudela, ela sentno.
30Paľis le Aron the leskere čhaven pomakheha a sentňareha, hoj mange te služinen sar rašaja.
31Le Izraelitenge vaker: ‘Kada olejos ela pro sentno pomakhľipen prekal miri služba pro furt.
32Našťi les čhoren avri pre chocsavo dženo a ole koreňjendar na kerena ňisavo aver olejos. Hino sentno a ačhela furt prekal tumende sentno.
33Te vareko kerela ole koreňjendar ajso olejos, abo pomakhľahas leha varekas, ko nane rašaj, oda manuš ela avritradlo mire manušendar.’ ”
34O RAJ phenďa le Mojžišoske: “Le ole voňave koreňjendar jednakones ajci živica, onixos, galbanos the žužo kaďidlos.
35Olestar ker voňavo kaďidlos, ajso sar kerel o olejkaris a zmišin le loneha, hoj te el žužo the sentno.
36Oda koreňje pučineha pro churdo praškos a sikra olestar thov angle Archa andro Sentno Stanos, kaj man tuha arakhava. Oda ela tumenge neksentneder.
37O kaďidlos, so kavke pririchtineha ole koreňjendar, našťi pririchtines prekal peste, bo oda ela sentno prekal o RAJ.
38Te vareko peske kerďahas ajso kaďidlos, sar saga prekal peste, ela avritradlo mire manušendar.”
