1Iei än Kot kapas usun ewe lemolun pwärätä: Met popun ämi meinisin oua tötä won imwemi?
2Pwota ämi chon ei telinimw oua uren akürang me mwökütüküt me mwänek? Ämi somä resap mäla ren ketilas ika lon maun.
3Ämi samol meinisin ra sülappök, ra oola mwen resamwo nöünöü nöür likapich. Iwe, chon oputakemi ra liapenala meinisin, inamwo ika ra süla toau.
4Iei mine üa apasa, “Ousap nenengeniei, nge oupwe chök mwüt ngeniei pwe üpwe kekechü. Ousap pwal sotuni le achipaei, pun üa kechüeiti nei aramas kana mi küna feiengau.”
5Iwe, Kot ewe Samol mi Unusen Manaman a awarato eu ränin fitikoko me kuf me niuokus watte won ewe lemolun pwärätä. Lon ewe rän tittin ewe telinimw ra turutiu, nge aramas ra pupuchör ngeni ekewe chuk.
6Iwe, ekewe sounfiu seni Elam ra feito won war oris fän nöür likapich me föün esefich, nge ekewe sounfiu seni Kir ra amolätä ar kewe tittin maun.
7Ekewe lemol mi pwülüöch ra ur ren woken, nge chon wawa oris ra ütä ren ekewe asamalapen Jerusalem.
8Än Juta kewe epetin maun ra mökküla. Lupwen a fis ei, ämi oua atowu ekewe pisekin maun mi nom lon ewe imwen wöllap.
9Oua küna ekewe chomong pwang lon tittin ewe telinimw Jerusalem, oua pwal achufengeni ekewe koluk lon ewe lenien koluk fan.
10Oua aleani ekewe imw lon Jerusalem o ataela ekoch pwe oupwe eäniir le apinasa o apöchöküla tittin ewe telinimw.
11Oua pwal föri eu wän koluk lefilen ekewe ruu tit fän iten an epwe amwocho ewe koluk seni ewe lenien kolukun lom. Nge ousap ekieki usun Kot ewe mi afisätä ekei mettoch meinisin, ousap afäli ewe a fen amolätä ei seni me lom.
12Lon ewe fansoun Kot ewe Samol mi Unusen Manaman a ürenikemi pwe oupwe kechü o ngüngüres, oupwe pwal fichi möküremi o üföüf üf seni tuk.
13Nge oua chök pwapwa o mweireir, oua niela kow me sip kana pwe oupwe ochoch fituk o ünümi wain. Pun oua apasa, “Ousipwe momongö o ükün, pun lesor sipwe mäla.”
14Iwe, ewe Samol mi Unusen Manaman a pwäri ngeniei lon an kapas, “Ellet, ei tipis esap musala senikemi tori oupwe mäla. Ngang Kot ewe Samol mi Unusen Manaman üa kapas.”
15Iwe, Kot ewe Samol mi Unusen Manaman a üreniei, pwe üpwe feila ren ewe nöüwis Sepna, ewe meilapen chon tümwünü ewe imwen king, o üreni,
16“Met ka föri ikei? Fän meni pwüng ka tuw peiasom lon ei leni? Ka tuw eu peias lon achau won ewe leni mi tekia, pwe kopwe nom lon mürin om mäla.
17Nengeni, ewe Samol mi Lapalap epwe turufuk fän pöchökül o moneekela, inamwo ika en eman mwän mi wor manom.
18Epwe amorokuluk o moneekela lon eu fanü mi watte usun eföü pwoor. Ikenan kopwe mäla lükün waom kewe woken mi ling, pun en eman mi aitengaua imwen om we king.
19Ewe Samol mi Lapalap epwe asapwiluketiu seni wisom, pwe kopwe towu seni om angang.”
20Iwe, ewe Samol mi Lapalap a üreni Sepna, “Lon ena rän üpwe köri nei chon angang Eliakim nöün Hilkia we mwän.
21Üpwe aüföüfa ngeni üfom, üpwe pwal aea ngeni om pelit o seikätä i lon wisom. Iwe, i epwe usun eman sam ngeni chon Jerusalem, pwal ngeni chon Juta.
22Üpwe ngeni an nemenem fän ewe king, ewe mwirimwirin Tafit. Üpwe ngeni ewe ki. Met epwe suki, esap wor eman epwe tongeni apüngala, met epwe apüngala, esap wor eman epwe tongeni suki.
23Üpwe pwal fotukätiu i lon eu leni mi nükünük usun efoch chüfölün imw mangaku, nge epwe wiliti eu lenien iteüöch fän iten chon leimwen saman.
24Iwe, repwe uwätä won weiresin tümwünün imwen saman. Aramasan seni watte tori kükün repwe itiwetä won usun chök kükün sepi, kap me rume ra itiwetä won efoch chüföl.
25Lon ena rän epwe fis pwe ewe chüföl mi fotetiu lon eu leni mi nükünük epwe masassan, epwe üttütä o turula. Nge meinisin mine a nom won epwe mökküla. Ngang ewe Samol mi Unusen Manaman üa kapas.”
