1Tayta Diosmi Isaiasta ricachiran ricapacuna guechwa Jerusalén imano cananpäpis cashanta. Chaytami Isaías cayno willacuran: ¿Imataj Jerusalenchöga caycan? ¿Imanirtaj runacunaga wasi janancunacho cushicurcaycan?
2Runacuna unay shanarir-raj gaparashan siudä, cushishalla runacuna tiyashan siudä, gamcho tiyajcunaga wañojmi-aywan. Ichanga manami sabliwan cuchuypachu wañonga. Manami guërrachöpischu wañonga.
3Mandajniquicunaga llapanmi gueshpir aywacusha. Paycunataga mana ichipashpan gueshpiycajtami prësu charisha. Mas caruman gueshpejcunatapis prësumi charisha.
4Chaymi nirä: «Ñaupäpita witicuy-llapa. Fiyupa llaquicurmi wagaj-aywä. Marcä mana alliman chayashanpita wagaycä. Ama shogamaychu-llapa.»
5Munayniyoj Tayta Diosmi nisha ricapacachinan guechwa Jerusalencho juc junaj fiyupa manchariy cananpaj, illgächinanpaj, imata ruraytapis mana camäpacunanpaj. Siudäta curalaraycaj pergancunatapis juchurgärachengami. Chaymi runacuna gaparpashanpis puntacunayajraj wiyacanga.
6Elam runacunaga lëchancunata maynami camaricusha. Paycunaga maynami carrëtancunacho wichasha, cawallun muntasha carcaycan. Kir runacunapis pillyar chapacuna escüduncunata aptashanami carcaycan.
7Mas cuyayllapaj caj guechwa pampacunachöpis carrëtacuna juntashami caycan. Cawalluwan muntädu cajcunanami siudä puncucho carcaycan pillyaj yaycunanpaj.
8Judäta chapänanpäga pipis manami cannachu. Chay junaj gamcunaga yäracurayqui Líbano Munti jutiyoj wasicho pillyacunayqui caycajmanmi.
9Gamcunaga ricarayqui Davidpa siudäninpa perga curralnin parti-parti juchusha caycajta. Ura caj ishtanquimanpis yacuta juntachishcanqui.
10Jerusalencho caycaj wasicunata sumaj ricapacurayqui. Nircur waquin wasicunata juchuchirayqui curral perga juchusha caycajta allchachinayquipaj.
11Wac-läpa cay-läpa pergacuna caycajpa chaupinchönami yacu pösuta rurarayqui unay caj ishtanquipa ruquin. Ichanga gamcuna manami cuentata gocushcanquichu guërra cananpäga unaypita-pachana Tayta Dios camacächisha caran.
12Chay junaj munayniyoj Tayta Dios gamcunataga nishurayqui waganayquipaj, llaquicur ajchayquicunatapis rutucunayquipämi. Chayno nishurayqui llaquicushayqui musyacänanpaj gachga röpacunatapis jaticunayquipämi.
13Chaypis gamcunaga munashayquicunata rurar cushicullarmi carcaycanqui. Wäcacunata, uyshacunata pishtar, aychata micur, bïnuta upullarmi carcaycanqui. Gamcunaga nircaycanqui: «Cawashanchïyaj micucushun, upucushun; waranachari wañucushunpis» nir.
14Chaypitami munayniyoj Tayta Diosga yuriparcamashpan rinrillächo yachayllapa willapämaran: «Juchata rurashancunapitaga manami perdunashächu. Juchallanpitami wañonga.» Munayniyoj Tayta Diosmi chayno nisha.
15Munayniyoj Tayta Diosmi cayno nimaran: «Ayway, raypa palasyuncho caycaj mandaj Sebnaman. Payta cayno ninqui:
16«¿Imayquitaj gampaga caycho can? ¿Pïniquitaj caychöga can pampacunayquipaj caycho uchcuchinayquipäga? ¿Imanirtaj altunnin gagacho mïchuta rurachicuycanqui? ¿Imanirtaj wañur jamacunayquipaj gagacho uchcuchicuycanqui?
17Tayta Diosga callpasapa runa imatapis jitarishannömi caruman jitarishunquipaj. Callpaycurmi charishunquipaj.
18Pelötatanömi cuchpärishunquipaj. Jatun nasyunmanmi jitarishunquipaj. Chaychönami wañunquipaj. Gam cushisha purishayqui carrëtayquicunapis chaychömi ushacangapaj. Chaura gamga rayniquipa ñaupancho fiyupa pengaypämi canquipaj.»
19Quiquin Tayta Diosnami Sebnata cayno nin: «Mas mandaj caycashayquipitami jorgushayquipaj. Aruyniquipitapis jitarishayquipämi.
20Chay junäga gayashäpaj Hilciaspa wamran sirbimajnë Eliaquimta.
21Paytanami sotänayquita jatipäshaj. Sinturunniquiwanmi watapäshaj. Chaynöpami mandananpaj paytana ruquiqui churashaj. Jerusalén runacunapäwan Judá runacunapäga paymi cangapaj juc taytano.
22Paytanami entregashaj Davidpa wasinpa lläbinta. Paynami munayniyoj canga. Pay quichashantaga manami pipis wichgangachu. Ni wichgashantapis manami pipis quichangachu.
23Payga rispitädu jamacunanömi canga papäninpa famillyancunapäga. Paytaga nogami sumaj camacächishaj läbusta tacaptin yaycushallancho cacushanno cananpaj.
24Chay läbuscho bälej cösacuna warcurashannömi llapan famillyancuna payllaman yäraconga. Llapan famillyan payllamanmi ricaranga.
25«Juc junaj ichanga mana cuyucuypa juc pachacho jatiraycaj läbus shicwaconga. Paypis, payman yäracoj famillyancunapis llapanmi yagaconga.» Munayniyoj Tayta Diosmi chayno nisha.
