Sandane 26

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Xunbenla mi fama kuye wolon waxatini. Tulen mi fama soge furen na. Na ma, xaxilitaren fan mi lan a binyen sɔtɔ.

²Xa muxun danga xun mi na danga tixin fulama nɛn a ra alo tuntunne na e futuxulu, alo debelenne na tugan.

³Bosaan lan soon ma, lutin fan lan sofanla ma, xaxilitaren fan bɔnbɛ nɛn alogo a xa xuru.

⁴I nama xaxilitaren yabi a xaxilitareyani alogo i nama lu alo a tan.

⁵Xaxilitaren yabi a xaxilitareyana fe ra alogo a nama a yɛtɛ yatɛ fekolonna ra.

⁶Muxun na xaxilitaren nasiga xɛrayaan na kalan na a ra alo i na i sanna sɛgɛ a ra hanma i se xɔlɛn min.

⁷Sandan tɔnɔ mi xaxilitaren ma, alo fanga to mi lɛbutɛnna sanne ra.

⁸I na binyen fi xaxilitaren ma, na luxi nɛn alo i na gɛmɛn maxidi lantanna kui a wolideni.

⁹Xaxilitarena sandan xɔlɔ nɛn alo wudi ɲali kanna dɔlɔ minna yii.

¹⁰Naxan na xaxilitaren ti wanla ra hanma dangu muxuna, na kanna kalan nan tima alo muxun naxan xalimakunla wolima a xunna yi.

¹¹Baren xɛtɛma a baxunna ma. Xaxilitaren fan xɛtɛma a xaxilitareyaan ma.

¹²I na muxun to naxan a yɛtɛ yatɛxi fekolonna ra, yigin xaxilitaren ma dangu na kanna ra.

¹³Muxu narixina a falama nɛn, a naxa, “Yatan kiraan xɔn, yata xaɲɛn taani!”

¹⁴Banxin dɛɛn nabima, a ragalima. Muxu narixin fan luma a maxɛtɛ a sadeni na kii nin.

¹⁵Muxu narixina a yiin sinma donse goronna kui nɛn, koni a tagan a rasoɛ a dɛ.

¹⁶Muxu narixina a yɛtɛ yatɛma fekolonna ra dangu xaxilima solofere ra naxanye yabi faɲi tima.

¹⁷Dangu muxun na sunbu muxu gbɛtɛne yɛngɛn na, na luxi nɛn alo muxun na baren tunle suxu.

¹⁸Daxun naxan tɛɛn nun xalimakunle wolima faxa ti xinla ma,

¹⁹na luxi nɛn alo muxun naxan wulen falama a boden xa, a fa a fala, a naxa, “N yi sabaan nan na.”

²⁰Yegen na ɲan, tɛɛn tuun nɛn. Muxu mafalan na dan, yɛngɛne fan yi xunbeli.

²¹Nafigin yɛngɛn nagboma ayi nɛn alo tigenna tɛɛ wolonna fari, alo yegen tɛɛn dɛ.

²²Nafigina falane luxi nɛn alo donse ɲaxumɛn naxan godon muxun kui.

²³Muxun naxan dɛ ɲaxun, a bɔɲɛn ɲaxu, na luxi nɛn alo wure gbeti kobin naxulunxin na so fɛɲɛn ma.

²⁴Xɔnnantenna a kɛɲaan luxunma a falane nan xɔn koni yanfantenyaan nan a bɔɲɛni.

²⁵Xa a fala faɲin ti, i nama la a ra, bayo fe haramuxi solofere nan a bɔɲɛni.

²⁶A kɔtɛn nɔɛ a xɔnnantenyaan luxunɲɛ nɛn koni a fe ɲaxin makɛnɛnma nɛn yamani.

²⁷Yaxu yinla ge muxun nan sinma a kui. Gɛmɛn xɛtɛma a makutukutu muxun nan kanke.

²⁸Wule falan muxune nan naɲaxuma a naxanye tɔrɔma. Wulen matɔxɔ falane kalan nan tima.