Sandane 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Mangan bɔɲɛn luxi nɛn alo xude wunla Alatala yii, dɛnaxan na a kɛnɛn, a yi a rasiga mɛnni.

²Muxuna kirane birin tinxin a yɛtɛ yɛɛ ra yi, koni Alatala nan bɔɲɛn kui feene fɛsɛfɛsɛma.

³Tinxinyaan nun kiti kɛndɛn saan nafan Alatala ma dangu saraxane ra.

⁴Yɛɛ rawason nun yɛtɛ yiteen nan findixi muxu ɲaxine kɛnɛnna ra, anu yulubin nan ne ra.

⁵Tunnafan muxuna miriyane findima munanfanna nan na, koni naxan feene rabama mafurani, na sigama yiigelitɔyaan nin.

⁶Nafunla naxanye sɔtɔxi wuleni ne findixi fe fu butarene nan na muxune xa naxanye sayaan fenma.

⁷Muxu ɲaxine gbalone e ralɔma ayi nɛn, bayo e bata tondi kiti kɛndɛn ma.

⁸Yulubitɔne biraxi kira yifuxin nan fɔxɔ ra, koni sɔntarene sigati kiin tinxin nɛn.

⁹A fisa i lu banxin fari ma dogodogoni, benun ɛ nun ɲaxalan yɛngɛ gidin xa lu banxin kui.

¹⁰Muxu ɲaxin kunfaxi fe ɲaxin nan xɔn, hali a xɔyin mi kininkininna sɔtɛ a ra.

¹¹Xa magele tiin saran a fe ɲaxin na, fe kolontarene fekolonna sɔtɔma nɛn. Koni muxun na xaxilimaan xaran tun, a kolonna fari sama nɛn.

¹²Tinxinna Kanna muxu ɲaxina denbayaan nakɔrɔsima nɛn, a yi e radinɲɛ ayi e tɔrɔni.

¹³Naxan na a tunla dutun sɛnbɛtaren gbelegbele xuiin bun, a tan fan gbelegbelema nɛn, a mi yabi sɔtɔ.

¹⁴Finmaseen na so muxun yii wundoni na xɔlɔn maxunbelima nɛn. Muxun na dimi bun seen ba suturani, na xɔlɔ gbeen nan ɲanma.

¹⁵Sɛwan na a ra tinxin muxun xa, kiti kɛndɛn na sa. Koni gbalon na a ra fe ɲaxi rabane xa.

¹⁶Naxan na keli xaxilimayaan kiraan xɔn, na sa a matabun faxa muxune nan yɛ.

¹⁷Mananmanantɔɔn setareyaan kolonma nɛn. Naxan na lu dɔlɔn nun ɲaxunna fɔxɔ ra, na mi findɛ nafulu kanna ra mumɛ!

¹⁸Muxu ɲaxin nun yanfantenna gbalon nan sɔtɔma, tinxin muxun nun muxu faɲine yi xunba na ma.

¹⁹A fisa i dɔxɔ tonbonni, benun ɛ nun ɲaxalan yɛngɛ gidin xɔlɔxin xa dɔxɔ.

²⁰Nafulu kɛndɛn nun ture faɲin namaraxi fekolonne konne yi, koni xaxilitarena a gbeene birin donma nɛn.

²¹Naxan na bira tinxinyaan nun hinanna fɔxɔ ra, na siimayaan nun tinxinna nun binyen sɔtɔma nɛn.

²²Fekolonne nɔɛ kurugbane taan tongɛ nɛn, e yi e taan nabilinna yinna kala, e yigi saxi naxan yi.

²³Naxan na a dɛɛn nun a falan suxu, na a niin nakantanma gbalon nan ma.

²⁴Feene birin magele wasode yɛtɛ yigboon yii. A feen birin ligama yanda gbeen nin.

²⁵Muxu narixine waxɔn feene nan e faxama, amasɔtɔ e tondima walɛ.

²⁶E kunfaxi e waxɔn seene xɔn waxatin birin, koni tinxin muxune kiin tiin fonisireyaan nin.

²⁷Se haramuxin nan muxu ɲaxine saraxane ra. E na a ba bun kobina nde ma, e ɲaxu dangu na ra.

²⁸Wule seren halagima nɛn, koni naxan a tuli matima ki faɲi, na fala tixine luma nɛn habadan.

²⁹Muxu ɲaxina a wɛkilɛn yitama a yɛtagin nan ma, koni muxu faɲin sigati kiin nan a wɛkilɛn yitama.

³⁰Fe kolonya mi na, xaxilimaya mi na, maxadi fala mi na naxan nɔɛ xelɛ Alatala xili ma.

³¹Yɛngɛ so soone yitɔnma nɛn lan yɛngɛn lɔxɔn ma, koni kisin fataxi Alatala nan na!