Text copied!
CopyCompare
Is Lalag te Megbevayà - Erubasa

Erubasa 26

Help us?
Click on verse(s) to share them!
1Kenà ereg he ebpenggiyew emun gulavung ne kenè daan edrendeng emun tiraǥun, ne iring keniyan is tulebung su kenà dait he edeliǥen.
2Kenà ed-utengan te rawak is etew he wazè din salà. Iiring dà heini te tagbis he edlayang, iyan kenà edlatun.
3Kinahanglan he edlegkuten wey ebusalan is kudà wey asnu. Iring din is tulebung, kinahanglan he ebpigahan.
4Kinahanglan he kenè nu tevaka is tulebung emun tinulebung is kebpekidlalag din kenikew, su kela ke mekeiring ka kandin.
5Piru meupiya zaan ke edtevaken nu sikandin, su para metueni zin he kenà sikandin uluwanen sumalà is diyà te isip din.
6Is etew he idsarig din diyà te tulebung is kegketudtula te ibpesavut din, ne iring dà te edtempezen din is paa zin su samuk is egkeperateng din.
7Is erubasa he egkeǥiyen te menge tulebung ne wazè din pulus iring te paa te pigket.
8Kelelelungan emun idhiket nu ziyà te petik is batu; iring din daan is kedeliǥa te tulebung.
9Is erubasa he egkeǥiyen te menge tulebung ebpekezezaat iring te zuǥiyen he menge rasang he egewezan te langut.
10Kelelalung heeyan emun ebpenaan nu is minsan hentei; iring din ke ibpeterebahu nu is minsan hentei he tulebung he edsaǥad.
11Is asu, egkeenen din is ingkeutè din, iring te tulebung su ed-umanan din gihapun ebeeli is mezaat he vaal zin.
12Deyzey pa is egkepengkusan te tulebung he etew, kenà is etew he kunaan din ke uluwanen sikandin.
13Is tepulan, iyan kun kenè din igawasgawas dutun te valey su egkahandek kun sikandin he egkeizen te erimaung.
14Is tepulan he etew ne ebelvelikid dà diyà te katri zin iring te lekeb he egketulung egkewangigwangig is bisagra zin.
15Duen tepulan he menge etew he minsan is kedsungit dan te keenen ne igkepeǥuli zan.
16Is tepulan, egkeisip din he metau pa sikandin kenà is pitu he etew he utew hustu is kegketevaka zan te id-insà diyà te kandan.
17Is kebpesahugsahug te kesevaan te zuma; iring te ked-apul te ebpemengaǥat he asu pinaaǥi te kegewezi te telinga zin.
18Is etew he ebinuangan din is duma zin, ne egkeǥiyen din he suyat din dà haazà, iring sikandin te ebuneǥen he henduen te edriyubriyub he vala te panà is ibpanè din he ebpekepatey.

20Egkeevukan is hapuy emun wazè din tavun, ne egkeengked is kesevaan emun ed-engkezan is kebpemengituk.
21Is uring iyan egkehimu he ebpekelangga, ne is tavun iyan ebpeketuvù te regreg, ne iring keniyan is etew he peretebek su ebpeketuvù sikandin te rirù.
22Is menge lalag te pereituk henduen be te utew metaam he keenen he utew ta egkesuati te ed-eveleng.
23Emun id-eles nu is mezaat diyà te ǥehinawa nu pinaaǥi te meupiya he kegkaǥikaǥi, iring ka te ziniyun he mibpekeplaan te pelata he kenà lunsey.
24Is kuntada, ne uvag meupiya is egkeǥiyen din, iyan, minsan pa ke egkepenù te mezaat is gehinawa zin, edtembunan din pinaaǥi te menge lalag din.
25Minsan pa ke utew meupiya he ebpemineǥen is menge lalag din, kenà ereg he edtuuwan su utew mezaat is netaǥù diyà te gehinawa zin.
26Egkehimu he edtembunan din is mezaat he menge tuyù din pinaaǥi te akal, iyan, egketuenan ded is kelelalung din te minsan hentei.
27Is ebangbang para meulug is duma, iyan sikandin egkeulug dutun. Is edlilid te vatu su wey melilizi is duma, iyan sikandin egkelikuan egkelilizi zutun.
28Egkeepesan te teruen he etew is menge etew he mibiktima zin pinaaǥi te kedtarùtarù. Is etew he edigdig kenikew ebpekezezaat kenikew.