Text copied!
CopyCompare
Anutu Sua Kini Potomaxana - Sua Tutŋana

Sua Tutŋana 26

Help us?
Click on verse(s) to share them!
1Iti tuute: Sombe lele ibayou, na irao ŋauŋau isu na som. Mi sombe yaŋpat isu pa mazwaana ki kini ŋgaamaŋana, inako ipasaana kini. Ina raraate men pizin wal kankaanŋan ta tizorzooro na. Sombe tapakur zin, ina indeeŋe som. Pa kaimer zin ko tikam pataŋana piti.
2Sombe tomtom sa ikam ŋoobo mbulu sa som, mi tisuŋ sosor pini be Merere ipasaani, na suŋŋana tana ko irao ikam kosa sa pini na som. Ina kembei man ta irie ma ila, mi le muriini sa be imbot pa na som.
3Koroŋ ta boozomen kan uraata makiŋ. Re na, taballis zin hos pa. Mi wooro na, tuurur la bapolo kuzun bekena tapazal zin pa. Mi teene ta kembena. Imbotmbot be tabalis zin wal kankaanaŋan pa! Naso tepei ŋgar kizin.
4Wal kankaanaŋan ta tizorzooro na, pekel sua kizin talliŋana pepe. Kokena nu we kembei ta zin.
5Wal kankaanaŋan ta tizorzooro na, zem zin ma tizzo sua kizin talliŋana pepe. Re be pekel. Kokena maane men, to nin se mi tindemeere sorok kembei tirao pa ŋgar.
6Nu sombe ŋgo tomtom kankaanaŋana sa ma ila be iso kalŋom pizin wal pakan, nako kam pataŋana pa itum. Ina kembei nu yembut itum kumbum ma ila ne. Pa ni ko ila ma itooro kalŋom, to ikam ma malmal ipet.
7Wal kankaanaŋan ta tizorzooro na, sombe tikam sua tutŋana pizin tomtom, na asiŋ ko ileŋ la kalŋan? Som. Sua kizin ko mburaana som, kembei tomtom ta kumbuunu imeete mi kolkol ma imbotmbot.
8Wal kankaanaŋan ta tizorzooro na, tapakur zin pepe. Pa ina takam mbulu talliŋana tabe imiili piti mi ipasaana iti. Ina kembei tembe ta tuurpe kat som, mi ka pat imiili ma ipetepaala ndomondo na!
9Wal kankaanaŋan ta tizorzooro na, sombe tikam sua tutŋana pizin tomtom, na tire zin. Pa sua tana ko imiili pa zitun! Ina kembei tomtom ta iwin ma ikankaana, mi iteege wooro matanmatanŋana mi wooro tana iŋgal namaana.
10Wal kankaanŋan ta tizorzooro na, mi zin wal ta tuute zin som na, tuur zin be tikam uraata piti pepe. Mbulu tana kankaanaŋana kat, kembei tomtom ta iwenweene sorok zin tomtom pa peene lutuunu.
11Wal kankaanaŋan ta tizorzooro na, irao tizem mbulu kizin talliŋana ma imborene kat na som. Kaimer ko tikam mini, kembei me ta ilulu, to imiili mi ikan luluŋana mini.
12Wal kankaanaŋan, ina ipata piti be tepei ŋgar kizin. Mi tomtom ta so indemeere sorok kembei ni irao kat pa ŋgar, sombe totoombo be tepei ŋgar kini, nako tarao som kat.
13Wal maolŋan, sombe toso zin be tila ma tikam uraata, nako tipandelndel sua piti ma tiso: “Aiss, nio mburoŋ som. Pa laion biibi sa ko imbotmbot zaala ma iŋgi. Kokena imaŋga mi ikan yo!”
14Wal maolŋan, sombe tikeene, na titortooro zin sala mbalia kizin, kembei kataama ta ilala mi imarmar.
15Wal maolŋan na, tiŋgwol kat. Naman isula timbiiri leleene be tipei kan kini. Mi naman ipata be tiur ila kwon!
16Wal maolŋan tire zitun kembei tirao kat pa ŋgar. Tipakurkur zitun ma tiso ŋgar kizin ilip pizin wal lamata mi ru ta len ŋgar na.
17Tomtom ta so izeizei lene ŋoŋi kizin wal pakan, ina ni kembei tomtom ta imbuulu me ki waene toro. Kozo ire i: Kokena me tana imaŋga mi ikani!
18Tomtom ta so ikam sua pakaamŋana pa waene toro, mi kaimer isu mini mi iso: “A, kam ŋgar boozo pa sua tana pepe. Ina nio aŋkam ŋeu pu men.” Na tomtom ta kembei, ŋgar kini italli kat. Ni kembei tomtom kankaanaŋana ta iwenweene sorok zin tomtom pa peene lutuunu tau timus koroŋ sananŋana ise mataana mi you ikanan la.

20Tesegergeere you, to ikanan. Som, to imeete. Mi ŋoŋi ta kembena. Sombe tomtom tininin kao pa som, nako karau men mi imap.
21Tesegergeere you, to ikan ma biibi. Mi zin wal ta tizorzooro pa sua na, ta kembena. Ko tikam ma ŋoŋi iwe biibi.
22Zin wal ta tininin kao na, tomtom lelen pa sua kizin ilip, kembei kini namutŋana. Mi tere iti. Pa sua kizin sananŋana tana ko isula kat lelende mi ipasaana ŋgar kiti.
23Tomtom ta so ikamam sua mbuyeeneŋana piti, mi tamen ŋgar sananŋana imbotmbot la leleene, ina ni kembei kuuru ta tipot ndemeene ma imilmil kat, mi leleene na tiŋtiiŋgiŋana.
24Sombe itiŋan kanda koi bizin toso sua mi kalŋan ambai piti, na tendemeere zin pepe. Pa ŋgar sananŋana sa ko imbotmbot la lelen.
25Tana kom koi sa isombe ikam sua ambaiŋana pu, na kan la sua kini pepe. Pa ŋgar sananŋan boozomen ta ko imbotmbot la leleene.
26Ŋgar sananŋana ta imbotmbot la leleene na, ni irao iswe na som. Iturkewe. Tamen kaimer, ŋgar kini sananŋana mi pakaamŋana kini ko ipet mat ma tomtom tiute.
27Tomtom ta so ikel naala pizin wal pakan, nako itunu itop sula. Mi tomtom ta so ipatimbil pat bekena ipasaana waene bizin pakan, inako pat tana ipili.
28Tomtom ta so iurur koi pizin tomtom, nako ikam sua pakaamŋana pizin bekena ipasaana zin. Mi zin wal ta kwon imbesmbeeze piti sorok na, tere iti pizin. Pa zin ko tipasaana iti.