Proverbios 26

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Usya wichan rashtarga manami allichu. Cosëcha wichan tamyapis manami allichu. Chaynömi mana tantiyaj upa runata alliman churananpis mana camacanchu.

²Ima maldäpis manami chayanchu juchan mana captenga. Maldä rurashanga gueshwaynaj pichiusano, wayanay äbinömi maymanpis mana chayaypa cacun.

³Busalwanmi cawalluta amansanchi. Läsuwanmi bürruta manshuyächinchi. Garutinami caycan mana tantiyacoj upa runata corrijinapaj.

⁴Mana tantiyacoj upa runa rimashantaga ama cäsupanquichu. Chayta cäsuparga mana tantiyacoj upa-nirajmi canquiman.

⁵Mana tantiyacoj upataga sumaj cutichiy. Chaynöpami upa runaga mana yachaj-tucongachu.

⁶Mana tantiyaj upa runawan willacachëga ricacun chaquin paquisha caycajnömi, ima inrïdumanpis jaticaycajnömi.

⁷Runapa wegru chaquinnömi upacuna yachachir rimashanpis.

⁸Rumita waracaman watarcojnömi mana tantiyacoj upa runata rispitayga.

⁹Machasha runa cashata charicusha caycajnömi upacuna yachachicur rimashanpis.

¹⁰Aröshinanpaj mana tantiyaj upa runata mincacöga caycan lëchayoj runa pitapis ricashanta illapaycajnömi.

¹¹Allgu gumitashanta yapay micushannömi mana tantiyacoj upapis yapay llutancunata ruran.

¹²¿Yachaj-tucoj runata ricashcanquichu? Chayno runapitaga mana tantiyacoj upa runapis allirämi canman.

¹³Guella runaga aruyta mana munaywanmi nin: «Jawachöga liyunmi caycan. Micumaytami munaycan» nir.

¹⁴Jinallancho puncu tumarishannömi guella runapis cämallancho ticraycachaycan.

¹⁵Guella runaga lätun churapacusha caycarpis manami cuchärallawanpis chagarcunchu micunanpaj.

¹⁶Guella runaga fiyupa yachaj runa caycashantami yarpan. Chaymi yarpan alli tantiyachicoj ganchis runacunapita mas yachaj cashanta.

¹⁷Juc rimanacushanman jaticäga allguta rinripita charejnömi caycan.

¹⁸Löcu runa wañojpaj illapaycojnömi caycan

¹⁹amïgunta llullapäga. Llullapariycorga «rasyallami nishcä» nin.

²⁰Yanta mana captenga nina upicäcunmi. Washa-rima mana captenga rimanacuypis manami canchu.

²¹Carbunwanrämi ninaga shanshan. Yantawanrämi ninapis ratan. Chaynömi washa-rimacunapis pitapis rimanacachiyta, pillyachiyta gallarachin.

²²Mishquillarämi washa-rimacunaga riman. Chasquipajpänami caycan shonguncama alli chayajnöraj.

²³Allpa mancata guellaywan chapyashanömi mana allita yarpar janan shongulla rimajcunaga.

²⁴Chiqui runaga parlashan öra manami musyacächinchu. Shongullanchöga yarpapaycan mana allicunata ruraytami.

²⁵Alli shimillanpa imata nishuptiquipis ama riguinquichu. Shongunchöga yarpaycan llapan mana allicunallatami.

²⁶Chiqui cashanta mana mayacächiyta munaptinpis mana allita rurashanga llapanpa ñaupanchömi musyacangapaj.

²⁷Uchcuta uchcorga quiquinmi uchcushanman yagan. Gagata amijtapis quiquintami rumiga ñitirin.

²⁸Llulla runaga chiquirmi llullapan. Janan shongulla parlajcunaga pitapis mana allimanmi chayachin.