Text copied!
CopyCompare
GALA Sɛʋɛi - Tɛnɛ Faalaaliiti

Tɛnɛ Faalaaliiti 26

Help us?
Click on verse(s) to share them!
1Lɛbiyai wola la zolooni ɠimalala nui ma, eɠɛʋelei kɔɔlɛ vukɔi, naa la zolooni da foɠoi ma, ta tonai nii é ʋaazu molo leʋe ziɛgi zu.
2Foovooi nii un ge la ba, é la faa ʋaa, kɛɛʋɛ eɠɛ soologi é ɠoʋesu, ɓaa sɛʋɛzɛʋɛgoi é ɠoʋesu, ti la zeizu.
3Kpakɔi ɓɛtɛʋɛ sooi laalɔɠɔma, kalafei ɠɛ ga soovalegi nɔnɔ, kpakɔi ɠɛ ga ɠimalala nui zaamaʋɛ nɔnɔ.
4Mina ɠimalala nui wooɠaaʋote ga ná-ɠimalalai ɠɛʋele, è ʋa ɠɛ ga tɔun kɛʋele ɗa ɓɔɠɔi.
5Ɠimalala nui wooɠaaʋote, é zoloo ná-ɠimalalai ma, a ʋa ɠisiɛ ga toɠa ga ɠima nu.
6Zɔi é keela woo ɠalivaazu ɠimalala nui ma, naa ɠa ɠɔɠɔiti teʋezu ga, ta toɠa gaazuvilɛ vaa mɔinmɔin sei luɠɔ.
7Ʋelei mɛɠɛlɛ nui ɠɔɠɔiti ti zu la yɔɔɠɛ, ʋele ɠana zɛbɛ la la faalaalii ya, nii ɠimalala nui bosu.
8Ɠimalala nui maamusɛ vai ɠɛɛʋɛ eɠɛ nu a ʋa li kɔtui ɠilizu fɛlɛvɛlɛgi ʋa.
9Ɠaingi é zoni dɔɔzo nui ya, ʋele ɠana faalaalii la ɠimalala nui laaʋɛ.
10Ʋelei kpɛɛin ʋili nui la, é nuɓusɛi kpein maawanazu, pele ɠana naama nui la, nii é ɠimalala nui zeɠezu botiɠɛ vai ma, ɓaa teʋeteʋe nuiti.
11Eɠɛʋelei gilɛi a ɗa ɠale da ma, ná-unpiligi ma, zekana é la ga ɠimalala nui, é ɠalesu ma ná-ɠimalalai ma.
12Ɗa nu ɠaana daai da ga gola ɠeleɠelegɛ, ɠimalala nui ná-fai ɠa vizɔ ná-fai ʋa.
13Ɲaka nui ɠa ɗa ɠɛ ma: «Zalai ɠa pelei zu, sua ɲɔi ɠa ziɛzu taazuʋɛ pelei zu!»
14Eɠɛʋelei kpogi a ɗa lati da ná-saniɛlɛiti ga, zekana ɲaka nui a ɗa lati da ná-betei zu.
15Ɲaka nui ɠa ɗa yeelɔ daami aniɲakai zu, kɛlɛ toɠa ɗa ka ga kpɔlɔ vaa wola ʋɛ, é ʋa dɔ laaʋɛ.
16Ɲaka nui laaʋɛ ɓɔɠɔ la ga ɠigi ɠa ma, é leʋe zunu lɔfela ʋa, niiti ta zoo ti gooɠaaʋote fe ga keleɠelegi.
17È ɓɔɠɔ ʋili kpɔɛi ɠa, nii é la loni è ʋa, kɛɛʋɛ eɠɛ gilɛi a yɛ leʋesu, è so goii ʋa.
18Eɠɛ titi nui é abuleʋegiti pilisu, ta mɛɛinti é ɗa nuiti paa ɓɔɠɔ maaɠoolii zu,

19pele ɠana zunui naa la, nii é seiɲɔɠɔi yaavazu, naa ʋoluma, é ɠɛ ma: «Soleya vaa nɔ ʋe.»
20Koʋi ʋalagi ɠa ɗa abui za, siɛgi zu nɛ fele ge la ná la, kpɔɛi ɠaa ɠa ɗa yei.
21Tiɠii ɠa ɗa abulekai ve, koʋii abui ɠaazo, kpɔɛleʋe zunui ɠa ɗa kpɔɛi ɠaazulɛ.
22Famai ɠɛɛʋɛ eɠɛ daamiani nɛɛnɛgi, toɠa ɗa yei, eyɛsu é zeeli nui yiimaʋɛ.
23Wali ɠaei pɛai penɛi maazu, ʋele ɠana kpɔɛ nɛɛnɛgiti ti la, ti nui yiimaʋɛ ma vaa ɲɔiti maalɔɔɠuzu.
24Nui wɔinzeɠemai daavegai, toɠa ɗa maalɔɔɠu ga laawooiti, é ɗa yaavaiti kpɛtɛ ɠoozu.
25Ni a ɠɛna kpɔɛ ʋagɔiti boga, mina la da, mazɔlɔɔ ná-kisiɛiti sulaavegɛ ga faa ɲɔi.
26Keleɠelegɛ gola ná-wɔinzeɠemai lɔɔɠu vai zu, kɛlɛ nuɓusɛi pɛ ge ɓega ga ná-suɲɔi ɠwɛɛ.
27Zɔi a zeɠei wɔ, tɔ ɓɔɠɔ ɠa loo su, zɔi a kɔtui ɠilikilina, toɠa loo tɔ ɓɔɠɔi nɔ ma ʋolu.
28È nui ta maawana ga zɛɛʋɛɛmai, naa ɠa ga è zili la. Wooveledai ma ɓɔɛi wo fai ɠa ɗa ʋa ga faa zuɠoloɠologi.