Proverbs 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹I SOMOL e ma gagiyegnag lanyan’ ba pilung nrib mom ni bod nma pow’iy wo’en e lul’.

²Rayag ni ngam leamnag ni gubin e ngongol rom ma go’ bfel’, ma dab mu pagtalin ni SOMOL e be thabthabelnag e tin bay u gumircha’em.

³Mu rin’ e tin bmat’aw mab yal’uw, ma kabfel’ u wan’ SOMOL ko bin ngam fek e maligach i yib ngak.

⁴Girdi’ nib kireb e be gagiyeg nagrad e ufanthin nge tolngan’, ni irera’ e denen.

⁵Mu tanom ni bfel’ rogon mra yo’or ni nge yag ngom; ma fa’an ga ra ab ab ma dariy e ngiyal’ ni ga ra gaman.

⁶Fla’ab nike yag ngom ko sasaliyab e dabi n’uw nap’an me m’ay, machane ke waliyem i yan ko yam’.

⁷Pi’in kireb e kar gafgowgad ko pi ma’angach rorad; ya yad be siyeg ni ngar rin’ed e n’en ni bfel’.

⁸Pi’in nib buch e rorad e yad ma yan ko kanawo’ nib dalib, ma pi’in nde buch e rorad e yad ma rin’ e n’en ni bfel’.

⁹Kabfel’ ni ngam par u daken e chigiy, ko bin ngam pirew le’engim u ta’ab naun nib gel lungun ni der fan langan ko pupuwan’.

¹⁰Girdi’ ni kireb e gubin ngiyal’ ni yad ma yim’ ni bochan e kireb; ma darir rrungyed be’.

¹¹Nap’an ni yira gechignag be’ nib tolngan’, ma mus ko en der ma leam nra fil ban’en riy. Ma en nib gonop e ra fil ban’en ko n’en ni kanfil ngak.

¹²Got, ni facha’ nib mat’aw, e manang ko mang e n’en ni be buch u lan e pi tabnaw rok e pi’in kireb, ma ir e ra girngiyrad nga but’ ko gafgow.

¹³Fa’anra dab mu mmotoyil ko meyor ko pi’in gafgow, ma birom e meyor ni man ayuw e dab ni rung’ag.

¹⁴Fa’anra damumuw be’ ngom, ma ga ra pi’ ba tow’ath ngak nib mith mra gapaseg e damumuw rok.

¹⁵Nap’an ni yira rin’ ban’en nib manigil, me felfelan’ e girdi’ nib manigil, ma pi’in kireb e ra math e liyab ngorad.

¹⁶Yam’ e be sonnag e en be sor i yan nga orel ko gonop.

¹⁷Yira nemow nigey ko tin fafalel’, nge wayin, nge tin th’abi fel’ e ggan, ma dab ni fla’ab riy.

¹⁸Pi’in kireb e yad ma girengiy nga dakenrad e pi gafgow ni yad be guy rogon ni ngar k’aringed ngak e pi’in bfel’.

¹⁹Kabfel’ ni ngam par ngalan e ted ni desert ko bin ngam par rok le’engim nib gel lungun ni der fan langan ko pupuwan’.

²⁰Pi’in nib gonop e yad ma par ni bfel’ rograd ma ba yu’ e urngin ngorad, ma girdi’ ni pinat e yad ma wereg e salpiy rorad u payngin ni be yib nga pa’rad.

²¹Ngu’um gol ma ga yul’yul’ mra n’uw nap’an e yafos rom; ma bayi tay boch e girdi’ fam miyad gol ngom.

²²Be’ nib gonop e rayag rok ni nge gel u bbinaw ni bogi pumo’on ni yad ba gel e yad be matanagiy, me gathay e pi rungrung riy ni aram e n’en ni yad be pagan’ ngay.

²³Fa’anra ga ba’adag ni ngam par u orel ko oloboch, ma ngam sasag’al ko welthin rom.

²⁴Mu dag be’ ngog nib ufanthin ma bay gu dag be’ ngom nib tolngan’, ma ba yowlop, ma ba fel’ngak.

²⁵Girdi’ nib gamead ni daburad e maruwel e yad e ngar li’ed yad;

²⁶kemus ni yad ma leamnag e n’en ni yad ba’adag ni nge yag ngorad. Ma be’ nib mat’aw e ra pi’ ban’en nib falan’ ngay mab puf pa’ ngay.

²⁷I SOMOL e ba fanenikay e ngiyal’ nma pi’ e pi’in kireb e maligach ngak, nri ngiyal’ yad ma pi’ nib kireb fan u wan’rad.

²⁸Murung’ag rok be’ nib sasalap l’ugun e dabi mich u wun’uy, ma thin rok be’ nma fal’eg i leamnag rogon ban’en e ra m’ag u wun’uy.

²⁹Girdi’ nib mat’aw e yad manang ko mang e yad be rin’; ma pi’in kireb e yad be dake yad manang.

³⁰Gonop ko girdi’, nge tamilangan’, nge nangan’ — e dabi ayuwegnem ni fa’anra ba togopluw SOMOL ngom.

³¹Rayag ni ngam fal’eg rogon e os ni fan ko mael, machane SOMOL e ir e ma gel nigey.