San Juan 18:27-32

²⁷Cavetsangui nga Pedru ngu ndiya. Hane ha hora vëhë ni ne, cajihnda xahnda.

²⁸Ngajan xi xuta matitjun tsëhë xuta tjë rë Israel jan ne, cavaxë me Jesús tsëhë ndava Caifás, hane quijicojo me ndihya jyë hiscan tacun Pilatu, xutaxa rë xi matitjun. Nguitajñu xati hora vëhë. Hane xuta xi quijicojo rë Jesús jan ne, cavisiin me cahntsua ndihya jyë jan, ngatsë rë xcusun rë me xi ma chocun yojo rë me xcun Nina hya xi visehen me ndava xutaxín. Hane sa xi cuatjin cuma chocun yojo rë me ne, cumaji sinë nguixun me comida suhi tsëhë Pascua.

²⁹Vëhë xi cavetju Pilatu quijitjengui rë me candatsen. Hane cuitjin cavinenguise me: ―‍¿Mé jyë́ vinchun tsëhë cha xi cuijyihi vi? ―‍Cuatjin cavinenguise Pilatu.

³⁰Hane xuta xi cuacun jan ne, cuitjin cafayangui me: ―‍Sa xi hacuiin choho tisahmi cha ne, canduvinchanii nuju cha. ―‍Cuatjin cafayangui me.

³¹Hane Pilatu ne, cuitjin cachja me: ―‍Chjuhun cha ne, chjuhunchuvun suvun cha cojo jyë́ rë cha sacuatjin chja ley nuju. ―‍Cuatjin cachja Pilatu. Ngajan xi xutaxa rë yungun xi cuacun jan ne, cuitjin cachja me: ―‍Ley nuju ngayun ne, chja ta ngayin ne, cumaji niquihin xuta. ―‍Cuatjin cachja xuta xi cuacun jan.

³²Cuatjin camá cojo sa xi cuetjucaa cjua xi cachja Jesús hya xi cachja me mé chuva rë cueya me.