Jon 18:27-32

²⁷Tiga pakaan balin Pita ga harus ma kaik at mon tiga kareka ga kakel.

²⁸Io, ra rurua malaan ira Iudeia diet ga lam leh Jisas meram tane Kepas uras tiga katon tano but na ngasiana no tamat me Rom. Iesen ira Iudeia diet pa ga haan laka kaia kanong diet ga sip bia diet na iaan tano Nian na Hinahaan Sakit ma bia diet na laka kaia diet na sakena hoing ira udiet harkurai i tange.

²⁹Kaik, Pailat gaam hansur ma ga tiri diet, “A mangana nironga sa muat tange bia iakan ra tunotuno i te gil?”

³⁰Io, diet ga babalu bia, “Mehet pa gor me tar bia ie taam. Taie. Aie tiga sakana tunotuno.”

³¹Pailat ga tange bia, “Muat at, muat lamus leh ie ma muat a gil harkurai tana haruat ma ira numuat harkurai.” Io, ira Iudeia diet ga babalu bia, “Taie, mehet pai tale. Muat ira Rom, muat pai bale mehet bia mehet na bu bing tikai.”

³²(Ga ngan huo wara hatutun ira nianga Jisas gate tange utano uno minaat bia na maat hohe.)