JUAN 18:27-32

²⁷Huan Pedro sempa quiijto para amo, huan nima tzajtzic se cuapele.

²⁸Huan quema tanestihualayaya quisque ichaj Caifás huan quihuicaque Jesús hasta campa nopa hueyi tequicali campa itztoya Gobernador Pilato. Pero nopa israelitame cati quitelhuiyayaj Jesús amo calajque ichaj Pilato, pampa toisraelita tanahuatilhua amo techcahuilía tiisraelitame ma ticalaquise ichaj se cati amo israelita. Huan sinta se calaquisquía, ayecmo elisquía tapajpacti iixpa Toteco, huan amo huelis quicuas nopa tacualisti ipan Pascua Ilhuit.

²⁹Huan Pilato quisqui calteno huan quintatzintoquili: ―¿Taya ica anquitelhuíaj ni tacat?

³⁰Huan quinanquilijque: ―Sinta yaya amo elisquía se taixpanoquet, amo timitzhualiquilijtosquíaj.

³¹Huan Pilato quinilhui: ―Xijhuicaca amojuanti huan xijtajtolsencahuaca quej quiijtohuaj amotanahuatilhua cati anquitoquilíaj. Huan nopa tayacanani ten israelitame quinanquilijque: ―Tojuanti amo tijpiyaj tequiticayot para tijcuamapeloltise se masehuali, pero ta, quena.

³²Huajca ica ni camanali pehua nesi melahuac cati Jesús quiijtojtoya quema quiijto para masehualme quitejcoltisquíaj ipan cuamapeli para quimictise.