Jon 18:27-32

²⁷Wal wanmo Pida bin dalim olabat laiyawei im nomo bin sabi Jisas, en imbin tok, “Nomo.” En streidawei det jukjuk bin jingat.

²⁸Ailibala neks dei na deibin deigidawei Jisas brom det kemp blanga Kaiyafas, en deibin deigim im langa det kemp blanga det gabman bos neim Pailat, en wen deibin kamat langa det kemp, detlot Juwish kaunsalamob nomo bin wandi gowin insaid langa det haus, dumaji Pailat bin Jintail men, en detlot Juwish men nomo bin wandi meigim miselp nomo klinbala blanga serramoni, dumaji deibin wandi dagat det Pasoba Serramoni daga det neksdei.

²⁹Wal Pailat bin lafta kamat atsaid langa olabat, en wen imbin kamat atsaid, imbin askim olabat, “Wanim nogudbala ting dijan men bin dum blanga meigim yumob bringimap im iya langa mi?”

³⁰Wal detlot kaunsalamob bin tok, “If im nomo bin dum nogudbala ting, wal melabat nomo bina bringimap im iya langa yu.” Bat detlot kaunsalamob nomo bin dalim Pailat wanim Jisas bin dum.

³¹Wal Pailat bin dalim olabat, “Wal yumob lafta deigim im en kotim im garram yumob ron lowa.” Bat detlot kaunsalamob bin dalim im, “Nomo. Melabat wandim yu garra kotim im, dumaji det Roman lowa nomo larram melabat kilim enibodi ded.”

³²Wal detlot kaunsalamob bin tok langa Pailat lagijat blanga meigim det wed garra hepin trubalawei weya Jisas bin dalim im wekinmen olabat blanga hau im garra dai.