Juan 18:27-32

²⁷Pedruqui wilta toscara chiichic̈ha. Jalla nuz̈ wilta toscara chiyan, nii orapacha tsjii querwallpi jora kjawchic̈ha.

²⁸Jalla nekztanaqui Caifás cjita z̈oñz̈quiztan Jesusaqui chjichtac̈ha pajk mantiñiz̈ kjuyquin. Waj kjantatitac̈ha. Nii judío z̈oñinacapacha nii pajk mantiñiz̈ kjuyquin ana luzzic̈ha, ninacz̈ cuzturumpi cjen. Jalla nuz̈ luztasaz̈ niiqui, pascua pjijzta c̈hjeri ana lujltasac̈ha.

²⁹Jalla niz̈tiquiztan Pilatuqui ninacz̈quiz paljayi ulanz̈quichic̈ha, tuz̈ cjican: —Anc̈hucqui, ¿c̈hjul ujz̈ tii z̈oñz̈ quintra jwes pecya?

³⁰Z̈oñinacaqui tuz̈ kjaazic̈ha: —Tii z̈oñiqui ana c̈hjul pajk ujnacami paatasaz̈ niiqui, anal wejrnacqui tii intirjitasac̈ha.

³¹Nekztanaqui Pilatuqui ninacz̈quiz cjichic̈ha: —Anc̈huckaz chjicha, anc̈huca lii jaruz̈ justicia paaz̈ca. Nii z̈oñinacaqui kjaazic̈ha, tuz̈ cjican: —Wejtnacalta z̈oñi conzqui lii quintrac̈ha.

³²Niiz̈ tuquiqui Jesusaqui chiitkalc̈ha, persun ticz puntuquiztan, jaknuz̈t ticznac̈haja, jalla nii. Niz̈aza niiz̈ chiitaqui cumplisnaquic̈ha.