1Gêdêŋ taŋ Apômtau kêkêŋ kiŋnê ŋacjo sêsô eŋ ŋalabu naŋ, kiŋ tau kêlêwaŋ tau gêŋgôŋ nê andu.
2Ma kiŋ kêsôm gêdêŋ propete Natan gebe “Ôlic acgom, galoc aê gaŋgôŋ andu kaseda tonec, mago Anôtônê poac ŋakatapa kêkô becobogeŋ.”
3Ma Natan kêsôm gêdêŋ kiŋ gebe “Ŋajam, ôna ma ôŋgôm gêŋ samob, taŋ gêc nêm ŋalêlôm naŋ, ŋanô êsa gebe Apômtau gêwiŋ aôm.”
4Mago gêdêŋ gêbêc tonaŋgeŋ Apômtau gêsuŋ biŋ gêdêŋ Natan ma kêsôm gebe
5“Ôna ma ôsôm êndêŋ ŋoc sakiŋwaga Dawid gebe ‘Apômtau kêsôm amboac tonec gebe Aôm gobe ôkwê andu teŋ êtu aê jaŋgôŋŋa me.
6Gêdêŋ taŋ aê gawê lau Israel aŋga Aiguptu sêpi sêmêŋ e mêŋgêdêŋ galoc naŋ, aê gaŋgôŋ andu teŋ ŋalêlôm atomanô. Aê gajac laoc gamêŋgeŋ ma gaŋgôŋ becobogeŋ kêtu ŋoc andu.
7Amboac ondoc gêdêŋ ŋasawa samob, taŋ gajac laoc gamêŋ gawiŋ lau Israel naŋ, aê kasôm biŋ teŋ gêdêŋ Israelnêŋ gôliŋwaga, taŋ kajatu êsêac gebe sejop ŋoc lau Israel naŋ, nêŋ teŋ gebe Amac akwê andu kasedaŋa teŋ êtu aêŋa atom, kasôm me masi.’
8Ma galoc aôm ôsôm êndêŋ ŋoc sakiŋwaga Dawid gebe Lausiŋ undambêŋa nêŋ Apômtau kêsôm gebe ‘Aôm gojob domba gômoa gamêŋ wale-wale, tec aê kakôc aôm su gebe ôtu ŋoc lau Israel nêŋ gôliŋwaga.
9Ma aê gamoa gawiŋ aôm aŋga gamêŋ samob, taŋ kôsêlêŋ kôsa naŋ, ma gaseŋ nêm ŋacjo samob su gamuŋ aôm ma gabe jakêŋ aômnêm ŋaê êtu kapôêŋ êtôm lau kapôêŋ nomŋa nêŋ.
10Ma aê jajaliŋ gamêŋ teŋ sa êtu ŋoc lau Israelŋa ma oc jasê êsêac sêsêp gebe êtu êsêacnêŋ gamêŋ sêŋgôŋŋa ma ŋacjo sêlênsôŋ êsêac êtiam atom, ma lau ŋaclai sec sêkôniŋ êsêac êtôm sêgôm gêdêŋ gêmuŋŋa êtiam atom.
11Sêgôm gêdêŋ taŋ aê kakêŋ gôliŋwaga sêjam gôliŋ ŋoc lau Israel naŋ. Aê oc jakêŋ nêm ŋacjo sêsô aôm ŋalabu ma ôŋgôŋ tomalô. Apômtau gêjac mata gêdêŋ aôm gebe eŋ tau oc êmboa nêm gôlôac sa.
12Nêm têm embe êmbacnê ma ônêc nêm bêc ôwiŋ tamami, naŋ oc jakêŋ latôm, taŋ mêŋêsa aŋga aôm naŋ, êjô aôm su, ma oc janac dabiŋ ênê gamêŋ kiŋŋa.
13Eŋ oc êkwê andu teŋ êtu ŋoc ŋaêŋa ma jakêŋ ênê lêpôŋ kiŋŋa êkô endeŋ tôŋgeŋ.
14Aê oc jatu eŋ tama ma eŋ êtu aê latuc. Eŋ embe êŋgôm sec aê oc jamêtôc eŋ êtôm tama teŋ kêmêtôc latu.
15Mago aê oc jakôc ŋoc moasiŋ su aŋga ênê êtôm kakôc su aŋga Saul, taŋ katu kiŋ gêmuŋ aôm naŋ atom.
16Tageŋ aômnêm gôlôac to nêm gôliŋ kiŋŋa êmoa aê laŋôcnêmŋa teŋgeŋ ma teŋgeŋ. Ma nêm lêpôŋ kiŋŋa êkô endeŋ tôŋgeŋ.’”
17Natan kêsôm biŋ samob, taŋ Anôtô geoc lasê gêdêŋ eŋ naŋ gêdêŋ Dawid.
18Go kiŋ Dawid kêsô lômbec jagêŋgôŋ Apômtau laŋônêmŋa ma keteŋ mec gebe “O Apômtau Anôtô, aê asa ma ŋoc gôlôac asa tec gôwê aê e mêŋgêdêŋ tonec.
19Mago moasiŋ tonaŋ, aôm Apômtau Anôtô, gôlic amboac kêtôm su atom, tec kôsôm biŋ, taŋ oc mêŋêsa êtu ŋamu naŋ, kêpi nêm sakiŋwaganê gôlôac gêwiŋ. O Apômtau Anôtô, aôm kôtôc gôlôac to gôlôac, taŋ ocgo mêŋsêsa naŋ gêdêŋ aê.
20O Apômtau Anôtô, aê oc jasôm asageŋ êwiŋ. Aôm taôm kôjala nêm sakiŋwaga.
21Aôm gôgôm gêŋsêga samob tonaŋ ŋai kêtu biŋ, taŋ gôjac mata naŋ, ma katu nêm ŋalêlôm kêkac aômŋa gebe ôsôm gêŋ tau lasê êndêŋ nêm sakiŋwaga aê jajala.
22O Apômtau Anôtô, aôm ŋac kapôêŋanô ma teŋ kêtôm aôm gêmoa atom. Anôtô teŋ gêmoa atom, aôm taômgeŋ, kêtôm biŋ samob, taŋ aêac aŋô kêsô aêac taŋeŋsuŋ naŋ.
23Ma lau nomŋa ondoc têtôm aômnêm lau Israel, taŋ anôtô teŋ gêjam êsêac kêsi gebe têtu ênê lau naŋ, ma êwaka taunê ŋaê sa to êŋgôm gêŋsêga to gêŋtalô êtu êsêacŋa. Ma êtiŋ lau to nêŋ anôtôi jaba su êmuŋ nê lau.
24Mago aôm kôkêŋ lau Israel têtu nêm lau gedeŋ tôŋgeŋ ma aôm, Apômtau, kôtu êsêacnêŋ Anôtô.
25“O Apômtau Anôtô, galoc ôkêŋ biŋ, taŋ gôjac mata kêpi nêm sakiŋwaga to nê gôlôac naŋ, êtu tôŋ endeŋ tôŋgeŋ, ma ôŋgôm gêŋ, taŋ kôsôm naŋ ŋanô êsa.
26Go aômnêm ŋaê oc êtu kapôêŋ endeŋ tôŋgeŋ ma sêsôm gebe ‘Lausiŋ undambêŋa nêŋ Apômtau katu Israel nêŋ Anôtô.’ Ma nêm sakiŋwaga Dawid nê gôlôac sêmoa aôm laŋômnêmŋageŋ.
27Gebe aôm, lausiŋ undambêŋa nêŋ Apômtau, Israelnêŋ Anôtô, goc biŋ lasê gêdêŋ nêm sakiŋwaga ma kôsôm gebe ‘Aê oc jamboa nêm gôlôac sa’, tec nêm sakiŋwaga aê têtac kêpa su e kateŋ mec tonec gêdêŋ aôm.
28“Ma galoc, o Apômtau Anôtô, aôm taômgeŋ Anôtô ma nêm biŋ kêtu biŋŋanô. Aôm gôjac mata biŋ ŋajamanô tonec gêdêŋ nêm sakiŋwaga.
29Amboac tonaŋ ôlic ŋajam ma ônam mec nêm sakiŋwaga nê gôlôac gebe sêmoa aôm laŋômnêmŋa endeŋ tôŋgeŋ, gebe aôm Apômtau Anôtô kôsôm biŋ tau ma nêm mec êpi nêm sakiŋwaga nê gôlôac endeŋ tôŋgeŋ.”
