Johane 10:5-26

⁵Ŋic furune moc e ine mi bâjâpeniŋmu, e dâŋ hawari‐ticne kâuc bahuc hâhâwic bacnerâ wiseniŋmu.”

⁶Jesu e dâŋ suŋsuŋne iŋuc mume jaŋe weniŋucte iŋuc mukac muhuc kâuc bambiŋ.

⁷Eme Jesu e harierâ jazawec, “Jâmbomac jâmbâŋ ŋazape mananiŋ, lama jaŋerao fefe irec motâc no.

⁸No mi fuahape fuambiŋ jaŋe ine fiuc roro â soroŋ qaqa. Irec lama jaŋe dâŋjeŋic mi manambiŋ.

⁹Motâc no hâcne. Moc e fotâcnurâ raʒiocmu, e mi sipirickeocmu. E raʒic wefuc ehuc nânâ mâriri bâfuaocmu.

¹⁰Fiuc roro e lama qa sipiric erâ fiuc bawiseocte sawa fisiekac. No ine lama jaŋe juhâc qâhâmoniŋte nânâ bâfuape ɋaŋɋaŋ ɋâriaŋ fojareocte fisipo.

¹¹“No soŋaŋ biaŋne. Soŋaŋ biaŋnezi lama jaŋere erâ juju‐ticne qikiŋneocmu.

¹²Soŋaŋ jabane, lama rujeŋic mi juekaczi ine kâte qâto fisime honerâ lama behec‐joparâ wiseocmu. Ehame kâte qâtozi lama ki bâtâtiec ejareocmu.

¹³E soŋaŋ jabanere lama jaŋere manabâc mi eocmu.

¹⁴No ine soŋaŋ biaŋne juekopac, eme Mamac â no hohonec mamanac eekoperec,

¹⁵irec sâcko no â gurufâc‐nane hohonec mamanac eeŋgopeneŋ. Irec no lama jaŋere erâ juju‐nane qikiŋnepemu.

¹⁶No lamafâc‐nane guru moc juŋgopieŋ, jaŋe sapa ʒirecnec mâcne, eme no jaŋe wâc mâmâc amec‐jopa warepe dâŋnane mananiŋmu. Eme lamazi guru mocjaha â soŋaŋzi wâc mocjaha iŋuc fuaocmu.

¹⁷No juju‐nane qikiŋnerâ mocwâc ropemu, irec Mamaczi nore ecneekac.

¹⁸Juju‐nane moczi mi nowac roocmu, i no nahacne maŋte qikiŋnepemu. No juju‐nane qikiŋnepemurâ â ropemurâ irec tâpiri mâmâc fonarekac. Iŋuc epemurâ Mamac‐nanezi munarewec.”

¹⁹Jesu e dâŋ iŋuc mume Judaŋic jaŋe manarâ mocwâc mu qaqatarac embiŋ.

²⁰Ehuc bocjahazi ʒiŋuc mumbiŋ: “E demoŋzi ecneme maŋne sifuckekac, dâŋ mume wemocte manahuc juŋgopieŋ.”

²¹Gâcnezi ine ʒiŋuc mumbiŋ: “Demoŋheczi dâŋ iŋucne mi muocmu, me demoŋ moczi ŋic tiŋtuŋ jaŋere ʒâŋe sâcne bâtâcneocmu me?”

²²Judaŋic taha ufuŋ jambuŋkembiŋ irec jara hombaŋ i mâmâteŋ dameŋko maickeme

²³Jesu e taha ufuŋ irec maŋne moc ʒâŋene Salomo ira rac warec ehuc juhame

²⁴Judaŋic jaŋe orâŋkerâ ʒiŋuc muhuc âzâcnembiŋ: “Go wemocte fuŋnege hesoŋketec maŋjahec boc eeŋgopeneŋ? Go Kristo jukomecko mutaniŋkerâ nâzâc me!”

²⁵Eme Jesuzi ʒiŋuc jazawec: “No ŋazape mi mana ʒakieeŋgopieŋ. Mamac‐nanere micte gie baekopac izi mutaniŋnuekac.

²⁶Â ŋoŋe ine lamafâc‐nane mi erâ juŋgopieŋte dâŋnane mi mana ʒakieeŋgopieŋ.