Yowan 10:5-26

⁵Ngan di sipsip tina ke be titoo sokorai tool san tiap. Kumata be tool san ikiu di nga, ngan ole tikoo, yesoo di ngan lodi galanga ye kalngana tiap.”

⁶Yesu iwete le ikatte betanga pang di Paresi nen, bong ngan lodi galanga ye betanga yo iwetewete pang di ye nga, ngan punu tiap.

⁷Le tina iwete pang di mulu nen, “Awete pang moolmool nen. Au tauk i la dada ke koongoo yo be di sipsip tipa ye i.

⁸Ngan di tooltool le imot yo timuku a timan pang ye di sipsip nga, ngan di tooltool ke pinnau, inbe di tooltool ke garungunu so kidi tooltool kapala, bong di sipsip tina tilongo kalngadi tiap.

⁹Ngan au tauk i la dada ke koongoo i. Ngan nen le kumata sei tool be iman yau a be nen ngan ilo pang koongoo lono nga, ngan ole apamule ye so dook tiap yo be igarungu i. Inbe ole ipa a ilo be isi, a be nen ngan ikap kaningi yo be ikan a itoka i.

¹⁰Ngan tool yo ke pinnau i, in iman be man ipinoo di sipsip, inbe iraumata di a be igarung di leu. Bong au i asi nga, ngan be si akaua yepongo yo dook mata le dook mata ki taunu i, in pang di.

¹¹“Au i la tool dook mata ke be matak kala di sipsip i. Ngan tool dook mata ke be matan kala di sipsip i, in ole ya taunu iraia tinini be ilon di sipsip ki ye.

¹²Bong kumata le tikaua tool atu a titaru be matan kala di sipsip tina, a be nen ngan ikap pat ye urata kootoonoo ki leu nga, ngan ya in dawa ben di sipsip tina ngan taudi moolmool, in tiap. Le ye kene yo be ikamata gaunu gok be iman pang ye di nga, ngan ole iyege di sipsip tina sila tikino, inbe ikoo welewele a ila. Lo ngan be gaunu gok tani in ole iman a man ikan di, inbe inin di a timagirigiri a tikoo.

¹³Ngan tool tani in ole ikoo a ila, yesoo ya in iyei urata be ikap pat ye leu, le lon rru mata ye di sipsip tina, ngan tiap.

¹⁴“Au i la tool dook mata ke be matak kala di sipsip i. Le lok galanga ye di sipsip kiau, inbe di lodi galanga yau,

¹⁵dawa ben yo Tamak lon galanga yau, inbe au lok galanga ye nga. Inbe ole araia tinik be alon di sipsip tina ngan ye nga.

¹⁶Ngan au i di sipsip kiau kapala lapau, bong di ngan tiyepe ye koongoo i tiap. Le ole akap di a timan lapau, a nen ngan ole tilongo kook, inbe man agaua di tiye di sipsip kiau kapala nga le tiyepe ye budanga atu, inbe tool ataleu la be matan kala di i.

¹⁷Le ye punu i la le Tamak in lono pau mai san ye i, yesoo au i ole araia tinik a amata, lo ngan be amadit le se amaur mulu.

¹⁸Ngan tool sa ke be iraumatau a amata le apa so, nga tiap, bong atoo au tauk lok la le ayei nen nga. Ngan au i gurana kiau ke be araia tinik a amata, inbe gurana kiau ke be amadit mulu le se amaur, yesoo atoo betanga yo Tamak ikap pau nga.”

¹⁹Yesu iwete nen a di Yuda tina ngan tilongo, le nga tiparpoto mulu.

²⁰Ngan nen le di alunu la tiyei ne, “Ai, nga yelei a kalongo tool in koonoo nga? Ya in so sadi idiwidiwoo le ngan iyei kapakapa.”

²¹Bong ngan di diedi kapala tiyei ne, “Ngan betanga nga ke be tool yo so sadi idiwidiwoo i, in iwetewete ye, nga tiap. Ngan lomim belei, so sadi in ke be iyeie tool yo matan kis in le matan rere, too?”

²²Ngan gaongo maiyoko ke sungunu yo be di Yuda lodi tut ye kene yo di sasa kidi tiso dada ke bareme ke sungunu ye i, in pombe Yerusalem. Ngan lal tani in pombe ngan igoro mou lapau.

²³Le nga Yesu ilo bareme mai ke sungunu lono, lo ipa ye ni yo tiwete ene ye Kookoowoo ke Solomon i.

²⁴Inbe di Yuda timan le man tigaua a tigaliu, inbe tiwete panga nen, “Ai, tayepe kaiye mata oo, ole nge lo kupapos pam a nen ngan lomam galanga yong? Kumata be ong i Kirisi nga, ngan kuwete pobe pam.”

²⁵Motong la Yesu iraua betanga kidi nen, “Au i awete pang oo, bong ngan katara lomim medana pau tiap. Ngan mos yo ayei ye Tamak ene nga, ngan be ipaposau pang a kakamata.

²⁶Bong ngan katara lomim medana pau tiap, yesoo ang nga di sipsip kiau tiap.