Jon 10:5-26

⁵Kwo nyan kat vɨlaa vaka pɨlɨgiyandi. Kwo nyana kwundi ana wuka lɨgandi waa wandɨ Jisas.

⁶Wan pagwulaa lɨga wapuseput Jisas mbutndɨ maa wan wapusepuk kat wutaa ana ndi yelavɨka lɨgandi.

⁷Jisas ndi kat wandɨ. Nyaangɨt mbupmat yigowun. Awuk ngwula. Wan sip sipna tɨvwina suwi yambɨ wunayɨ.

⁸Wun tɨwun mala tata ya nɨmba ndi sɨkwuka kavle vat tɨgiyandi. Sip sip ndina kwundi ana wuka lɨndi.

⁹Suwi yambɨ wunayɨ. Ndi kat vɨga lɨlɨwun maa ndi apma vat tɨgiyandi. Sip sip apma yuwi kat vlaa kɨlɨnja vla apma vat tɨgiyandi.

¹⁰Sɨkwutɨga nɨmba apma vat kwutaa yetɨvak kat ana yalɨgandi. Sɨkwupmat, vatnyavat, kavle vat yivat mɨna yelavɨka yalɨgandi. Wun ndinyangu kat njɨmbla njɨmbla apma vat yetɨjeya vak kat kwivat yawun.

¹¹Apma vapmba sip sip kat vɨga lɨga nyan vla lɨgowun. Sip sip kat vɨga lɨga nyan vla lɨgowun. Sip sip kat vɨga la nyan sip sip kat tɨga kiyalɨnda vla wuno ndinyangu kat vɨga lɨga kiyaigowun.

¹²Nat kɨta nyan sanya klavat sip sip kat vɨga lɨgiyandɨ. Vɨga lɨnda sip sip kat valɨvat yandeyan ndɨ vaakaa pɨlɨndɨ maa sip si pkat vatnyandɨ maa vɨlaa nat sip sip kava kavat vaaka pɨlɨgiyandi.

¹³Sanya klavat sip sip kat vɨga lɨga nyan ndɨ sip sip kat ana nɨmamba yelavɨka lɨgandɨ. Ngi kat tɨga ndi kat kwagalalaa pɨlɨndɨ.

¹⁴Wun wupma ana kwagalalaa vaaka pɨlɨgiyowun. Sip sip kat ama vat vɨga lɨga nyan vla lɨgowun. Wuna nɨmbana sɨ kɨta kɨta vɨga wuka lɨgowun. Dino wun kat vɨga wuka lɨgandi.

¹⁵Wuno wuna nyaek Godno awat sowat vɨga lɨgali. Wuna sip sip kat tɨga wun kiyaigowun.

¹⁶Nat mbaapmamba lɨga sip sip ndino wuna sip sip ndi. Ndi kat yiwun wuna kwundi wutaa wuna lak yaigandi. Yandi ma aywaa wuna sip sip kɨta tɨvwimba taagawun maa tɨgiyandi. Ndi kat aywaa wuna lak vɨga lɨgiyowun.

¹⁷Kiyalaa lɨga laakiyowun waa yelavɨtaa kiyaigowun. Kiyaweya vak kat vɨlaa wuna nyaek wun kat woviyaguga lɨgandɨ.

¹⁸Kɨta nyan ndɨna maawupmba yelavɨtaa wun kat ana alɨpsɨga vatnyagiyandɨ. Wun wowun maa wun kat vatnygiyandɨ. Kiyalaa lɨga laakiyowun. Vɨga lɨgowun. Kiyalaa lɨga avla laakweya kwondu ngilɨga. Vɨga lɨgowun. Wuna nyaek wunkat wupma wandɨ maa vɨga lɨgowun waa wandɨ Jisas.

¹⁹Ndɨnai waa nyaangɨk kat wutaa Juda ngambuga lɨga mbaapma vɨlɨlɨk sɨndi.

²⁰Nat mbaapmamba la nɨmba wandi. Kavle waagan tavindɨ maa ndɨ tungwengwan yiga lɨgandɨ. Ndɨna kwundi wupmak kat nɨn kai wanɨn waa wandi.

²¹Nat mbaapmamba la nɨmba wandi. Kavle waagan tavilaa lɨlɨga nyan wupma wanda vla ana waigandɨ. Kavle waagan tavilaa lɨlɨga nyan mɨni kiya nyana mɨni ana kwunakiyandɨ waa wandi.

²²Judana nɨma nandinya yandɨ. Wan tamba Godna ngay kwunataa wuleilaa lɨnja njɨmbla yelavɨka lɨnja nɨma nandinya. Yipma yila njɨmbla yelavɨka lɨnja nɨma nandinya. Yipma yila njɨmbla.

²³Wan njɨmbla Jisas Godna gay wuleilaa tamba la nyan Solomon kwutaw kavamba lɨga yi yalɨndɨ.

²⁴Tɨndɨ maa Juda ndɨ kat ya wegwulaa wagalandi. Manda kat nɨn kat kapmba yigumba walapman yimɨn maa nɨna maawut kavle vat yelavɨka lɨganɨn. Mbambala nɨn kat kapmba mbukiyamɨn. Mɨn God wandɨ, yaa nyan mɨn? Mɨn Kraist mɨn? Nɨn kat ambup mɨla waa wandi.

²⁵Wandi maa Jisas ndi kat wandɨ. Ngwuk kat Kraistnat tɨwa vak tamba mbukwun maa wun kat woseka wandɨ waa wangwuk. Wuna nyaek wun kat kwiya njɨvwa kwutɨwun. Wan kwutɨwa njɨvwa Kraistnat tɨwa vat ndinyangu kat vɨsɨmogwilɨgandɨ.

²⁶Ngwuk Kraistnat tɨwa vat ana vɨga lɨgangwuk. Ngwuk wuna sip sip ana ngwuk. Ngwuk kat tamba wowun.