Yohanes 10:5-26

⁵Ma den no bo waka baka wan sma di den no sabi. Den bo lon gwe fu di den no sabi en sten.”

⁶Yesus ferteri den a agersitori disi, ma den no ben ferstan san A ben wani taki.

⁷Dat' meki A taigi den baka taki: “Fu tru Mi e taigi unu: Mi na a doro fu den skapu.

⁸Ala sma di ben kon na Mi fesi na fufuruman nanga abani, ma den skapu no arki den.

⁹Mi na a doro. Efu wan sma psa na Mi kon inisei, Mi sa ferlusu en. A sa go kon èn a sa feni nyanyan.

¹⁰A fufuruman e kon soso fu fufuru, fu kiri, èn fu pori sani. Mi kon fu gi sma libi, èn fu sorgu tak' den abi en bogobogo.

¹¹Mi na a bun skapuman. A bun skapuman de klari fu dede gi den skapu fu en.

¹²Ma wan wrokoman di den yuru fu luku den skapu, no de leki a skapuman di abi den skapu. Te a si tak' wan tigri e kon, a e libi den skapu dan a lon gwe. So a tigri kan grabu wan skapu, dan a panya den trawan.

¹³A wrokoman e lon gwe bika na yuru den ben yuru en, èn a no abi firi gi den skapu.

¹⁴Mi na a bun skapuman. Mi sabi den skapu fu Mi èn den skapu sabi Mi,

¹⁵soleki fa a P'pa sabi Mi èn Mi sabi a P'pa. Èn Mi de klari fu dede gi den skapu.

¹⁶Mi abi tra skapu tu san no de fu a skapupen disi. Mi mus tyari den kon tu. Den o arki Mi sten, dan den tu grupu skapu o tron wán, èn den o abi wán skapuman.

¹⁷Mi P'pa lobi Mi bika Mi e gi Mi libi abra fu dede, fu Mi teki en baka.

¹⁸No wan sma e teki Mi libi. Na Mi srefi e gi en abra. Mi abi makti fu gi Mi libi abra, èn Mi abi makti fu teki en baka. Disi na san Mi P'pa ben taigi Mi tak' Mi mus du.”

¹⁹Di Yesus taki den sani disi, wan prati kon baka na mindri den Dyu.

²⁰Furu fu den taki: “Un no mus arki a man disi. A law èn A abi wan takruyeye na En tapu.”

²¹Ma trawan fu den taki: “Wan sma di abi wan takruyeye na en tapu, no e taki leki fa a man disi e taki. Èn wan takruyeye no man meki wan brenisma si baka.”

²²A ben de a kowruten èn a ben de a ten fu a Hanukafesa na ini Yerusalem.

²³Yesus ben e waka ini a mamakerki na a presi di den kari a Gadri fu Salomo.

²⁴Den fesiman fu den Dyu kon lontu En dan den taigi En taki: “Olanga Yu o hori unu ini a span ete? Taigi unu krin efu Yu na a Mesias.”

²⁵Yesus piki den taki: “Mi taigi unu kba, ma un no e bribi. Den wondru san Mi e du ini a nen fu Mi P'pa e sori suma na Mi.

²⁶Ma un no e bribi, bika unu a no skapu fu Mi.