Ioane 10:5-26

⁵Hari tau taba nige se hemuriwatai, ia abo se dagogabaei: paana ede hari tatao arinadi nige se ataiedi.

⁶Teina parabole ta Iesu i ribalau aridi eai, riba wa i ribaei isi aridi eai nige abina se ata.”

⁷Iesu abo i heribauioidi i ene, “Mamohoi, mamohoi, ea heribamiu ta, Eau mamoe dobiladi ede.

⁸Gamagaridi se bagubagunaegu isi tauaiaiyahari, eo tauaigirihai: arinadi mamoe nige se ataiedi.

⁹Eau dobilana ede: ena tau esau i lusora, abo i mauri, e, abo i lulage, i lusae, ia abo i aibai.

¹⁰Tauaiyahari i laoma, aiyahari eo unu eo hebaaea hesabadi. Eau ea laoma ta mauri bena se abi, mauri monau‐boriboririna bena se abi.

¹¹Eau mamoe tauitawataina lolona ede: mamoe tauitawataina lolona ena mauri i mosei ena mamoe enadi.

¹²Taupaisoa se hemaisa mo, ia mamoe‐tauitawataina nige’e, mamoe ia nige enana, ia luko ie ita i laoma, mamoe abo i laugabaedi, ie dago: luko wa mamoe i toaidi, eo i hetatagorigoridi.

¹³Taupaisoa se hemaisa abo ie dago, paana ede ia taupaisoa se hemaisa mo, mamoe nige i nuatuidi.

¹⁴Eau mamoe tauitawataina lolona ede, egu mamoe hinage ea nuatuidi, isi hinage se manasaegu.

¹⁵Doha Tamana i nuatuigu, eau hinage Tamana ea nuatui: eo egu mauri ea torehebiga mamoe debadi eai.

¹⁶Egu mamoe headi hinage udodoi, isi nige gana ta pelena: isi hinage abo ea woeaidima, isi arinagu abo se ataiei; abo gana esega mo, eo mamoe tauitawataina esega.

¹⁷Arinai ede Tamagu i gadosisiaririegu, paana ede egu mauri ea torehebiga, arinai abo ea abiuioi.

¹⁸Egu mauri taba nige tau esau i abihai, eaubom mo ea torehebiga, egu gigibori eai hinage ea abiuioi. Teina laugagaeo ta Tamagu arinai ea abi.”

¹⁹Teina riba ta aridi eai Iudea tataodi nuadi se labulabuiuio.

²⁰Gamagaridi si ene, “Demoni esau ia i lui, eo i koakoalele; aue saha ia arinana au ataiei?”

²¹Headi si ene, “Ina riba ta demoni‐tau‐luina taba nige i ribaedi. Demoni taumatagibugibuna mata helalana abina ie ata?”

²²Ierusalema eai, mataasi esau se mataasiei, dubu mataasina, wa’oo huiana.

²³Iesu i tautausi numa uura alona eai, Solomona ena awamata sorasorana eai.

²⁴Iudea tataodi abo se laoma, ia se toro hetaiiri, se heriba si ene, “I lau e ana sigasiga abo oa nuamai u heponoponodi? Ena oa Keriso, u ribahemasaraha komakomani arimai eai.”

²⁵Iesu i heuioidi i ene, “Ea heribamiuo, eo nige au nuatui; paisoa gamagaridi ea abidi ta Tamagu esana eai, isi ede se hemahemasarahagu.

²⁶Omi nige au nuatui paana ede omi nige egu mamoe, doha ea ribaei arimiu eai.