Johani 10:5-26

⁵Linu keti nizichilile muyenzi, kono kazimukekuluhe, mokuti kanzinzi inzwi lyamuyenzi.”

⁶Jesu abawambi iyi nguli kubali, kono abo kanababazuwisisi kuti izi zintu ibali nji zona zabali kuwamba kubali.

⁷Linu Jesu chawamba kubali hape, Ikumbya line, Nimi wambila, Njime nimulyango wembelele.

⁸Yese yabezi kumasule angu musa mi wiba, kono imbelele kena zibamuteki.

⁹Njime nimulyango. Yese winjila changu, kapuluswe; kenjile mukati ni hanze mi kawane malisikizo.

¹⁰Musa kawoli kwiza heba kezi kwiba kapa kwihaya ni kushinya. Nibakezi kuti benze bawane buhalo mi babu wane cha bungi.

¹¹Njime nimulisana weniti. Mulisana weniti uha buhalo bwakwe muchibaka chembelele.

¹²Mubeleki wakuhila kahena mulisana wembelele imi kamunite imbelele. Habona untuhu nakezite usiya imbelele ni kubaleha. Utuhu uwonda imbelele ni kuzihasanya.

¹³Utiya mukuti mubeleki wakuhila kabileli ni mbelele.

¹⁴Njime ni mulisani weniti, imi nizi zangu, mi zangu zinizi.

¹⁵Tayo unizi, imi name nizi Tayo, imi nibahi buhalo bwangu muchibaka che mbelele.

¹⁶Nina imbelele zimwi zisali nzowo mulaka wembelele. Niyelele kuzileta nazo, imi kazizuwe inzwi lyangu kokuti ibe mutapi wonke ni mulisana yenke.

¹⁷Njikeli ibaka Tayo hanisaka: Nisinyehelwa buhalo bwangu kokuti ninibuhinde hape.

¹⁸Kakwina yowola kubuninyanga, kono nibusinyehelwa changu nimwine. Nina maata akuzwisa, imi nina maata akuhinda hape. Nibawani iyo itaelo kuba Tayo.

¹⁹Kuliyabahakati chikwa tendahala mukati kaMajuda bakeñisa chayo manzwi.

²⁰Bungi bwabo chiba wamba, “Wina i dimona mi umbulumuka. Chinzi hamutekeleza kwali?

²¹Bamwi chibati, “Aa kahena manzwi amuntu yoyendiswa idimona. Kana idimona liwola kwiyalula menso amuntu yasaboni?”

²²Linu chibali inako ya Mukiti wa Kunjoloza mwa Jerusalema.

²³Ibali maliha, mi Jesu abu kuyenda mwi keleke mumalibela a Solomoni.

²⁴Linu Majuda chiba muzimbuluka mi chiba wamba kwali, katuhinde inako ikumahi nitu sezibi? Heba njiwe Kirisite, tuwambile he ñandaleza.”

²⁵Jesu ababetabi kuti, “Nibamiwambili, kono kamuzumini. Mitendo initenda mwizina lya Tayo, yeyo njiipaka ziniama.

²⁶Nikwinabulyo inwe ka muzumini mukuti kahena mwimbelele zangu.