Jon 10:5-26

⁵Isau le biil tom rin mi lo nenge kaltu keskes, rin fin koseng u wara le biil ri ongen failiim kinen kaltu keskes.”

⁶Iesu ka fas ri ini tintof igii, isau le biil ri malal na sanih i fas ta ri ini.

⁷Pesu Iesu ka fas ri aragii, “Tekentu kanaka, ia fas gam, iau tom e matan ubiif ken foron sipsip.

⁸Fanu tikii ae ri la famu ta lo iau, ri foron tom suksukuum ke foron tom dat foes tier ken fanu. Isau le foron sipsip biil ri wong tah sing ri.

⁹Iau tom e matan ubiif. Le seh ae i kau sing iau, in kep liu. In kau ke in suuh ma in tafe in fuun e fifih.

¹⁰Tom suksukuum i la sau isi suksukuum, sisiimete ke falaulau ri. Ia la tah uga isi rik kep liu, liu ae i fuun ini fafakalok.

¹¹“Iau tom e rokap na tom parpar kale foron sipsip. Rokap na tom parpar kale foron sipsip i lin liu kia la isi foron sipsip kia.

¹²Kaltu ae ri fiil u sau isi parpar kale foron sipsip, biil i taman foron sipsip. Biil. Ke, aunbiing i par pes puul ngalngaliaf i la isi, in kang koseng ri la ma ka fin. Ke puul ngalngaliaf ka ngaet ri ma ka fes sararah ri.

¹³Kaltu ae i fin la, wara le ri fiil ta u sau isi parpar kale foron sipsip, ma biil i mais ri.

¹⁴“Iau tom e rokap na tom parpar kale foron sipsip. Ia usum lon foron sipsip kiak ke foron sipsip kiak ri usum lo iau,

¹⁵i fasih sabin arae Tata i usum lo iau, ke ia usum lo Tata. Ma ia lin liu kiak isi foron sipsip.

¹⁶Imel e fal e sipsip sabin kiak ae biil ri kiis la turan fal igii na palgan itikii e ubiif. Ian lame pes ri, isi ri sabin rik ongen kineng, ke rik tapiek itikii sau e uh na sipsip ke ik tikii sau e tom parpar kale sipsip kiri.

¹⁷Tata i ier kanaka isi iau, i wara le ia lin liu kiak isi iak kep fafis u sabin.

¹⁸Biil tikas in kep ufu liu sing iau. Biil. Isau le ia lin liu kiak ini wolwol kiak tom. I mel e rakrakai kiak una lin liu kiak, ke i mel e rakrakai kiak una kep fafis u sabin. Foim igii, Tata tom i fas ta iau isi ian tel u.”

¹⁹Ke ka mel sabin e tampaek na fatpoton fan Iudaia i wara na orek ke Iesu.

²⁰I fuun lo ri, ri ka tara, “I mel e tanwa laulau lo ma i talos. Gam wong sing i isi sah?”

²¹Isau le fal lo ri ka tara le, “Kaltu i mel e tanwa laulau lo, biil i orek la aragii. Tanwa laulau biil tom i fasih in sapeng na matan tikas e kut.”

²²Na aunbiing ae, ri tel inen na Ierusalem, una wol pes aunbiing ae Felun Sising i tapiek tah arae fel ke God. Tel inen ae, ri tel u la na funiil ae mir i afit falifuh tikii.

²³Na aunbiing ae, Iesu tinawii na palgan Felun Sising na felun malmaluu ae ri foteng u le, felun malmaluu ke king Solomon.

²⁴Foron famfamu ken fan Iudaia ri ka ruruh kale u, ma ri ka tara sing i aragii, “Nangis mang ok fas kemem le o seh? Male o Mesaia, ke ok fas fatus kemem.”

²⁵Iesu ka kiliis ri aragii, “Ia ka fas ta gam, isau le biil gam unune. Foron rakrakai na foim ae ia tel u ini asa Tata, i finngas gam le iau e seh tom.

²⁶Isau le biil gam unune, wara le biil gam foron sipsip kiak.