Yohanis 10:5-26

⁵Mete ma hambu hatahori fo bibi lombo ta ralela sana, na, ara ta tungga sana. Tehuu ara ralai tetebe, nahuu ara ta ralela hatahori feꞌek haran.”

⁶Leo mae Yesus tui lololek naa fee sara, tehuu ara oo ta bubuluk Ndia kokolan sosoa-ndandaan boe.

⁷Boe ma Yesus nafada tamba neu sara nae, “Hata fo Au afada neu ei ia, tetebes. Au sama leo lelesu nai bibi lombo lalaen.

⁸Basa hatahorir fo mana mai rakahuluk numa Au mai, ara sama leo naꞌo manu-meo. Leo mae ara kada ranggou rakandoo, tehuu bibi lombor ta ramanene hatahorir raa.

⁹Boe ma Au sama leo lelesu naa. Mete ma hambu mana nau maso nesik Au, na, Manetualain nau tao nasoi-nasodan numa ndia sala-singgon nara mai. Naa, sama leo ana maso neni Manetualain mamanan neu, nesik Au fo mana dadi ndia lelesun. Ma hatahori mana maso nesik Au, ana laꞌok no nekemboꞌik neni bee neu a mesan, ma hambu nanaꞌa-nininu tetebes.

¹⁰Naꞌo manu-meor kada tao mue-anggik a mesan, huu ara mai fo ramanaꞌo, rakanisa, ma rakalulutu heni hatahorir masodan. Tehuu Au uni masodak lolen lenak, huu Au mai, mita fo hatahorir bisa leo-laꞌo no lino-lendek, ma raena masodak tetebes.

¹¹Au oo sama leo mana lolo malole esa boe. Mana lolo malole sadia ena fo loo lima aon losa maten, mita fo ndia bibi lombon nara bisa rasoda.

¹²Tehuu mana lolo neni sebak, mete ma ana mete-nita hambu busa fui esa mai, ana nalai tetebe, de laꞌo ela bibi lombor raa reu naa. Basa de busa fui kiki nala bibi lombo, boe ma bibi lombo laen nara ralai ratanggela.

¹³Mana lolo neni sebak naa nalai, nahuu ndia kada naue sangga doik mesa kana. Ana ta tao matak fo nanea natalolole bibi lombor raa.

¹⁴Tebe! Au sama leo mana lolo malole. Au alela Au bibi lombong nggara. Ma ara oo ralela Au boe.

¹⁵Naa, sama leo Amak manai nusa tetuk do inggu temak nalela Au, ma Au oo alela Ndia boe. Au oo sadia loo lima Au ao-inang ena boe losa mate, mita fo Au bibi lombong nggara bisa rasoda.

¹⁶Hambu Au bibi lombong laen, fo bei ta rakabua ro Au bibi lombong nggara marai iar. Au muste uu akabubua ala sara boe. Neu ko mete ma ara ramanene Au harang ena, ara ralela memak kana. Basa boe ma ara mai rakabua fo dadi reu bua-aok esa fo raena mana lolo esa.

¹⁷Huu naa de Au Amang manai nusa tetuk do inggu temak sue-lai Au. Au sadia loo lima Au ao-inang ena losa mate, fo Au bisa asoda asafali numa mamates mai.

¹⁸Ta hambu hatahori nakasetik Au fo mate, tehuu Au mesa ngga ndia sadia loo lima Au ao-inang losa mate. Au aena haak fo loo lima Au ao-inang. Au oo, aena haak fo haꞌi falik kana boe. Parenda ia, Au simbon numa Au Amang manai nusa tetuk do inggu temak mai ena.”

¹⁹Hatahori Yahudir rasimbo bafak seluk bali, nahuu ramanene Yesus kokolan naa.

²⁰Hambu noꞌuk ka numa sira mai rae, “Heeh! Hatahori ia, kamuluk! Nitu saꞌen ena! Tao hata de ei bei nau nenene neun?”

²¹Tehuu hambu ketuk bali rae, “Ia ta hatahori kamuluk kokolan, hetu? Dedeꞌa-kokolak leo naak naa, ta kalua nita numa nitu bafan mai! Ma nitu oo ta tao nala hatahori pokek bisa mete-nita boe, hetu?”

²²Faik naa, hatahori Yahudir sangga tao sira anggaman fai malolen esa. Fai malole naa, laꞌe-ndaa fai makasufuk. Numa feta naa, hatahori Yahudir rasaneda faik fo hatahori laen tao ranggenggeo Manetualain Uma huhule-haradoi Ina-huun nai kota Yerusalem, de ara tao ralalaon ma tabis seluk kana.

²³Yesus laꞌok ndule Uma Huhule-haradoi Ina-huuk naa bebelan, nai mamanak fo ara seseik kana rae, ‘Manek Soleman Uma Loos’.

²⁴Boe ma hatahori Yahudi malanggan nara mai rakarumbu ralan, de rae, “Ai muste mahani losa faik bee bali, dei fo ai bisa bubuluk? Mete ma Papa ia, ndia Karistus, na, tulun mafada no ledo-ledo dei.”

²⁵Yesus naselu nae, “Au afada memak ena, tehuu ei ta nau mamahere. Naa te basa hata fo Au taok, basan tungga kada Au Amang parendan mesa kana. Basa naar ndia ratudu rae, Au ia see.

²⁶Tehuu ei ta mamahere neu Au, nahuu ei ta Au bibi lombong nggara.