JUAN 10:5-26

⁵Per ranaldet ma mén ne rnebeeydet maa xrëz, lel rzhoon ma lo men porke rnebeeydet ma xrëz men.

⁶Wzëët Jesus neree zegnak te kwent lo men ne nak farisew, per wdeedet men kwent gan pe rna we.

⁷Lex wnii Jesus lo men ste, re Ne: ―Nligue yna noo: Noo nak zegnak ruxloo mëkzhiil.

⁸Yrandxee mén ne wdxiid kwlodee ke lo noo, ngbaan men; yra men ne nak xpén noo wondet men xdiiz mén guin.

⁹Noo nak zegnak ruxloo mëkzhiil; men ne tee ruloo guin ne nak noo, sláá men lo dol. No gak men zegnak mëkzhiil ne rruu rdeetee ruloo chen tsël ne gu maa.

¹⁰’Ngbaan, noze por ne kwan men zëëd men no por ne yket men no por ne yluzh men. Per le noo zëëd noo por ne gap de gyelembán ne nunk luzhdet.

¹¹Noo nak zegnak men ne wen rapkwent mëkzhiil; men ne wen rapkwent mëkzhiil, rboleedx men xgyelembán men por laa maa.

¹²Per le men ne rapkwent mëkzhiil noze por ne rdeben men med, chene rwii men ne le lob za, rzhoon men, rsantegue men mëkzhiil, porke nakdeto xdxiin men no let xpëkzhiildet men maa. Lex rdxiin lob rnëëz lob ma rket lob ma, le stebëd ma noze rrëëts.

¹³Rzhoon men porke noze por ne rdeben men med rapkwent men maa, zadet ma lextoo men.

¹⁴’Noo nak zegnak men ne wen rapkwent mëkzhiil; zegne rnebeey noo xpëkzhiil noo no rnebeey ke ma noo,

¹⁵zenga ke rnebeey Xuz noo noo no rnebeey ke noo Xuz noo. No axtegue rboleedx noo xgyelembán noo por xpëkzhiil noo.

¹⁶Rap ke noo stebëd mëkzhiil ne nuudet lenlooree; rap noo degne tsaxii no maa, zon ma xdiiz noo, saktes ma yra maa no tebegue men ne gapkwent maa.

¹⁷’Ryaan Xuz noo noo porke sdee noo si yket mén noo chen yban ke noo.

¹⁸Rut rgyitxeedet xgyelembán noo, sinke xkwent zhal noo ydee noo si yket mén noo. Rap noo poder ne ydee noo si yket mén noo no ne yban ke noo, porke zenga wnebééy Xuz noo lo noo.

¹⁹Chene won men-Israel yra diizree, wzelo men noze wren wren ne rnii men ste.

²⁰Ndal men re: ―¿Penak rukas de men, si menzab nuu lextoo men, nzël men?

²¹Per nuu ke zeg men re: ―Ni te mén ne nuu menzab lextoo rundet gan ynii zegwa. ¿Peguin zun menzab gan ylaa ne gyenii bzalo menngwlëë?

²²Tyemp ne rak nal chene kalaa men-Israel xelni xeydoo Dëdyuzh Jerusalén,

²³wa Jesus lenydoo. Ne wdee Ne nes ledne la xKordor Salomón,

²⁴wbig yra men-Israel noze kbii Ne, lex re men lo Ne: ―¿Pa axtegue or kwë́z gutxup de lextoo noo? Guninli belne laa de nak Crist.

²⁵Wke Jesus, re Ne: ―Che na noo we, per rlaleedxdet de noo. Yra ne rlaa noo por xpoder Xuz noo, laa we rbonyoo gan txu nak noo.

²⁶Per laa de rlaleedxdet do porke nakdet de xpén noo.