Yon 10:5-26

⁵kata yak kinim kukum so am yán abo unodiw banim. Alo bude ika fingon dá sakabongin kuw make. Watawo kaleyo bá, kinim mak ami weng uyo atin kidilodiw banim kayo ko.”

⁶Yesus ayo weng fakom bela bakoyamase, kata ika mit mak kidela kal keidongin danim dakosiw ko.

⁷Kale ika kidilongin danim keidiwe, Yesus ayo asiki bakoyam, “naka atin afan weng bela bakayabi. Kale naka siwsiw imi leiw awsom fal ade nalata ki kala.

⁸Kaleyo kinim adikum isik gebom tasidiw, ika yakot wanin kinim ade getbot wanin kinim, kata siwsiw ika im weng kidiyamodiw banim.

⁹Kala kaleyo naka fal ade nalata kayo kan ata tad nalam dim tade dám tem unokaba. Aka atin lukbala dám tem bom ken unba, tadba bom wanin fenokaba.

¹⁰Kale yakot wanin kinim aka tad yakot wanan bom yanbi bom im mafak dákan bom keimin umi fukan tademin, kata nam tasi be ken luk bala teinámin ade sinik so dam so biyámin uta kuyamono, kale umi fukan tasi kala.

¹¹Kale siwsiw gimin kinim kidel ade nalata kala kaleyo siwsiw gimin kinim kidel am aket ayo siwsiw imi luk dudu fikalono tasi kala.

¹²Kale kinim mak láw wok fakudaw bom kisol kuába kinim, aka siwsiw bo amino bá ade aka siwsiw gimin kinim bá, kayo aka sew mayan mak tada atamokaba. Aka siwsiw iyo imadá ú sakabane, sew mayan ayo tad siwsiw mak ambidane, madik iyo kalo sakun dá sakabokabiw.

¹³Kale kinim ami siwsiw luk dudulongin banim kudá ú sakabokaba. Be watawo kaleyo bá, akade láw kinim mak ami wok fakudaw bom kisol kuába kayo kala.”

¹⁴“Kale siwsiw gimin kinim kidel ade nalata ka. Nalam siwsiw iyo nalam kal ade nam siwsiw ika nalam weng ilim kal.

¹⁵Ulutaw ki nalam Natim ayo nam aket fukanba ade naka nalam Natim aket fukanbi, kayo naka nalam siwsiw luk dudu fikalano, kalbi.

¹⁶Kale nalam siwsiw be bidi kuw bidiw bá, kata madik iyo kalo sew mo bidiw kala. Kaleyo naka yak sew bidiw iyo fabadu mo imudino nalam siwsiw adik dáw gu makuw keidiwe, nalata kuw imi kin moyámin kinim keidokabi.

¹⁷Kale nalam Natim ami aket kunama, be umi mit uyo watawo kaleyo bá, naka ken au, kale nalam siwsiw luk dudu fikale talá tabono, kale kanabi kayo kala.

¹⁸Kale kan kinim ata mak nam sinik uyo kukan keinamodiw banim, kata naka nalam aket uta nalam siwsiw luk buta dudu fikalono kanabi. Be watawo kaleyo bá, naka nalam Natim alata kanodalo, nakei kitid daunamase, kayo naka ken fikale nadine alo talá tabokabi kala.” Yakansa ko.

¹⁹Alo beta Yu kayak iyo weng be kidi nadiwe tako dau,

²⁰kinim seng madik iyo bako nadiw, “kuin kinim be aka sinik mafak ta bom kiwa dausa ade aka aket dakwan weng buta bakanba. Kale ami weng bo kidilawumo, kanabiwe?” Yakiwe,

²¹alo madik ita bako nadiwe, “be sinik mafak kiwsa kinim keidoma bá, aka sinik mafak kiwa daudoma. Be aka yakno yakno nadano kinim kin mat ayo kin bá daudoma?” Kalsiw ko.

²²Kale Yedusalem kayak imi Mudi Mudín Yakom yako kutibisiw umi am dánu liwliw wananin atan kawák ayo gid am dána buduno,

²³kale Yesus ayo Yol am kasadam akfak tem Kamok Solomon abiw dal kal ká bom keimane,

²⁴Yu kayak iyo tad falal dau nadiwe bakodaw, “kaba ulum kano sun kuw amonin kukaya bom bokabaw bade kaba kan atane? Kaba afan Got ata Walusa Kinim kayo atin kidela bakoyamalo!” Akiwe,

²⁵Yesus ayo fakadu bakoyam, “alo naka bakoyamasi, kata kiba aket kunamongin danim ade nam kukuw makik makik kanamábi uyo Natim alam kitid dim kanamábi. Be kuku naka kana kanodin kinimo, nakbu uyo kiba kal keidongin danim ka.

²⁶Kale kiba nam siwsiw gu so bongin banim, watawo kaleyo bá, kiba aket kunamongin banim.