Zone 10:5-26

⁵Sa votiki tie si lopu kaqu lulia rini, ba kote govete nia rini si asa, sina lopu gilania rini sa mamalaiṉina.”

⁶Tozi ni Zisu sa parabolo hie, ba lopu gilania rini na sa si korapa zama nia Sa.

⁷Gua asa ke zama pule se Zisu, “Maqu tozi va hinokarani gamu: Arau tugo sa sasada tadi na sipi.

⁸Ari doduru pu mae va kenue koa Rau, si na tie hikohiko, meke na tie ṉoṉovala. Titioko si arini, ba lopu avoso gilani rina sipi.

⁹Arau tugo sa sasada; asa sapu nuquru gua koa Rau si kaqu ta harupu. Kote nuquru vura si asa, meke vagi gana ginani.

¹⁰Ba sa tie hikohiko si mae pude hiko, huhuara, meke variva mate. Ba Arau si mae pude boka vagia gamu sa tinoa sapu marilaena hola.

¹¹Arau tugo sa sepati leaqu, meke sa sepati leana si mate hobeni sari Nana sipi.

¹²Ba sa tie ta tabarana si lopu na sepati hinokara pu tagodi sari na sipi, ke pana dogoria sa tie ta tabarana sapu mae si keke siki pinomo si kote govete veko pania sa sa rovana sipi, ke kote garati sa siki pinomo meke ta hurakatae si arini.

¹³Govete taloa sa nabulu, sina na tie ta tabarana mo si asa, ke lopu tataru ni sa sari na sipi.

¹⁴Arau tugo sa sepati leaqu. Gilani Rau sari Qua sipi, meke sari Qua sipi ba gilanau si Arau

¹⁵gua mo sapu gilanau sa Tamaqu si Arau meke Arau gilania sa Tamaqu, meke mate hobeni Arau sari Qua sipi.

¹⁶Ba koadia pule si kaiqa Qua sipi saripu lopu somanadi pa korapa bara hie. Kaqu turaṉa maeni tugo Rau si arini. Kote avosia tugo rini sa mamalaiṉiqu, meke kote ta varigarae mae tugo pa keke rovana si arini, meke kote keke mo sa dia Sepati.

¹⁷Tataru Nau sa Tamaqu si Arau, sina lopu ruritia Rau sa Qua tinoa ba va malumia Rau pude tava mate, beto si vagi pule nia mo Rau si asa.

¹⁸Loke tie si vagi pania sa Qua tinoa ba va malumia Rau pa Qua hiniva soti. Sina Arau mo lalae nia pude vala nia, meke vagi pule nia. Gua asa sapu tozi Nau sa Tamaqu pude tavetia,” gua se Zisu.

¹⁹Koa gua koari na zinama arini, si vari paqaha pule sari na binalabala tadi na tie.

²⁰Kaiqa arini si zama, “Na koa ia tomate kaleana si Asa, ke ilipuṉana sa Nana binalabala! Pude vegua ke va avosia gamu Sia?” gua si arini.

²¹Ba kaiqa arini si zama, “Na tie koa ia tomate kaleana si lopu boka zama kekeṉoṉo gua asa. Vegua, boka va dodogorae tie behuna sa tomate kaleana?” gua si arini.

²²Pa totoso ibu si ta evaṉa sa vinarigara vina balabala pulena sa vina madina sa Zelepade pa Zerusalema.

²³Meke enene Nana pa Zelepade, vasina pu ta pozae zokozokoroana d te Solomone se Zisu.

²⁴Meke varigara mae koa Sa sari kaiqa koimata tadi na tie Ziu, meke nanasia rini si Asa, “Ve seunae gua kaqu va nunala gami Goi si gami? Mu tozi va hinokarani gami kamahire; Agoi tugo sa Karisito?” gua si arini.

²⁵Meke olaṉa la i Zisu si arini, “Ele tozini gamu tu Rau, ba lopu va hinokarau gamu. Sari na tinavete pu taveti Rau pa pozana sa Tamaqu, si va sosode Au si Rau,

²⁶ba lopu va hinokarau gamu, sina lopu na Qua sipi si gamu.