Joaŋ 10:5-26

⁵Ŋac jaba teŋ oc têndaguc eŋ atom, oc sêc eŋ, gebe sêjala lau jaba aweŋ atom.”

⁶Biŋgôliŋ tonaŋ Jesu kêsôm gêdêŋ êsêac, ma biŋ tau, taŋ kêsôm gêdêŋ êsêac naŋ, sêlala ŋam atom.

⁷Go Jesu kêsôm biŋ kêtiam gebe “Biŋŋanô, aê jasôm tobiŋŋanôgeŋ êndêŋ amac gebe Aê katu domba ŋasacgêdô.

⁸Lau samob, taŋ sêmuŋ aê sêmêŋ naŋ, geŋgeŋtêna to kêjaŋgowaga. Tageŋ domba sêkêŋ taŋeŋ êsêac atom.

⁹Aê katu ŋasacgêdô. Teŋ embe êsô aêŋageŋ êna, oc ênam eŋ kêsi. Eŋ êsô êsa ma êtap nê gêŋ êlôm tauŋa sa.

¹⁰Geŋgeŋtêna gêmêŋ kêtu gêŋ tageŋ tonecŋa gebe ênam geŋgeŋ to êmbuc ma enseŋŋageŋ. Aê gamêŋ gabe êsêac sêmoa mateŋ jali ma nêŋ gêŋ êlêsuc êsêacgeŋ.

¹¹“Ŋacgejob ŋajam tau aê. Ŋacgejob ŋajam tau êmac êndu êjô domba su.

¹²Ŋac taŋ gêjôb kêtu awaŋa naŋ, eŋ ŋacgejob ŋanô atom, ma domba têtu ênê gêŋ atom. Eŋ êlic kêam sec êmêŋ, oc êwi domba siŋ ma êc êna, ma kêam sec mêŋêŋac to ênam domba tau saliŋ-saliŋ.

¹³Eŋ gejob kêtu awaŋa, tec gê go domba tau atom.

¹⁴Ŋacgejob ŋajam aê, tec kajala ŋoc gêŋ ma ŋoc gêŋ sêjala aê,

¹⁵kêtôm Tamoc kêjala aê ma aê kajala Tamoc. Ma aê jamac êndu jajô domba su.

¹⁶Aêŋoc domba ŋagêdô sêmoa. Êsêac aŋga toŋ sapa tonecŋa atom. Amboac tonaŋ kôm tonec gêjac aê ŋawae gebe jawê êsêac sêmêŋ e sêŋô aê aoc têtu toŋ tageŋ ma ŋacgejob tageŋ.

¹⁷Aê jamac êndu gebe jaŋgôŋ matoc jali êtiam. Kêtu biŋ tonaŋŋa Tamoc têtac gêwiŋ aê.

¹⁸Ŋac teŋ êkôc matoc jali su aŋga aêŋoc atom, tauc jakêŋ êna. Ŋatau aê tec jakêŋ êna, ma ŋatau aê tec jakôc su êtiam. Tamoc kêjatu aê gebe amboac tonaŋ.”

¹⁹Ma Juda sêwa tauŋ kêkôc kêtiam kêtu biŋ tonaŋŋa.

²⁰Êsêacnêŋ gwalêkiŋ sêsôm gebe “Ŋalau sec teŋ gêgôm eŋ, tec kêtu meloc. Amac akêŋ taŋem eŋ êtu asageŋŋa.”

²¹Ma ŋagêdô sêsôm gebe “Ŋac toŋalau sec teŋ oc êsôm biŋ amboac tonaŋ atom. Ŋalau sec teŋ kêtôm gebe êŋgôm mateŋpec mateŋ êlêc me.”

²²Kêdabiŋ om-sêjac-kawi-lôm-dabuŋŋa aŋga Jerusalem ma komô.

²³Ma Jesu kêsêlêŋ gêmoa lôm dabuŋ gêmoa Salomonê lôm sêlêb.

²⁴Tec Juda sêgi eŋ auc ma sêsôm gêdêŋ eŋ gebe “Aô, aôm gobe aêac amoa totêntac lulu e êndêŋ ondocgeŋ. Aôm embe Kilisi tau, naŋ ôsôm lasê êndêŋ aêac.”

²⁵Ma Jesu gêjô êsêac aweŋ gebe “Aê kasôm gêdêŋ amacgac, mago amac akêŋ gêwiŋ atom. Kôm taŋ gagôm gajam Tamoc laŋô naŋ, gêwa aê sa su.

²⁶Ma amac akêŋ gêwiŋ atom, gebe amac aŋga aêŋoc dombanêŋ atom.