Ioanes 10:5-26

⁵A maka sipsip i uka ma ri gi muri mai a viri i uka ma ri burongi kilalea. I muholi ngi bara ri ha na tahuna i gale ria, a vuhuna i uka ma ri longokilalea a lohona.”

⁶E Isu i ta vaka­kika ne ria, pali ria i uka ma ri longo­kilala a ngava i taki ne ria.

⁷Lakea e Isu i taki tabu ria, i ta maea, “A taki muholi mua, iau a logo na nure na sipsip.

⁸E huriki ri valai muga nau, ria a panaho, a marikau. Pali e huriki a sipsip i uka ma ri longo mai ria.

⁹Iau a logo. E huriki ri dili valai nau bara ri mahuri. Bara ri dili pori na ningaru ne ria. Bara ri matavisi a maki ni kani.

¹⁰A bakovi ni panaho i valai kunana ni panaho, ni ratapile, ni rabalaki a maka sipsip. Pali iau a valai ga habi a nimahuri. Ra nimahuri iea, i uka harena.

¹¹“Iau a matakari kamumu na sipsip. A matakari kamumu bara i mate ni mata­kari a maka sipsip vona.

¹²A viri i leho ni gi kona i uka ma ia a tahona sipsip. Na tahuna i masia a kaugara i valai, bara i pe mule a maka sipsip, i ha ia. Muri a kaugara bara i valai, i lili viliha a kabuna sipsip.

¹³Ra bakovi ni kona i ha, a vuhuna ia a bakovi i leho kunana ge bole a moni. I uka ma i luhoi a maka sipsip.

¹⁴“Iau a matakari kamumu na sipsip, a maka sipsip nau ri lohoka nau. Iau tara a lohoka ne ria.

¹⁵I manga a hini a lohoka ne Tata, e Tata tara i lohoka nau. Iau ga mate ni korimule a maka sipsip nau.

¹⁶Iau a tahoka tabu ranga sipsip i uka ma ri dili ma na nure. Ria ranga ga bole dili ria na nure, ri gi longokilalea a lohogu, ge taku kunana a kabuna sipsip. A matakari ne ria tara ge taku kunana.

¹⁷E Tata i ngaru iau, a vuhuna ga mate na murine huriki a sipsip. Muri ga mahuri mule tabu.

¹⁸I uka tara viri ge vakamate iau. Iau kunana ga mate na ningaru nau. Iau a tahoka a nitora ni mate. Iau a tahoka a nitora ni pesi rike mule na matenga. E Tata i taki iau ga rata mavonga.”

¹⁹Pali na ngava iea kunana e huriki a Iuda ri vagege lae tabu.

²⁰E huriki ala kupo ri ta maea, “I manga. I dili vona a hanitu. I navai si gi longo maia?”

²¹Pali i ranga e huriki ri ta maea, “A nitana i uka ma i manga a nitana bakovi i dili vona a hanitu. Pali a hanitu, i kara ge vakamatapara a kepa?”

²²Na tahuna na malangia, ni rata a Habu na Nigamai o Ierusalem.

²³E Isu i lokovonga i laho pololilo na roho na Vure na tabeke ni gale a talele ne Solomon.

²⁴Lakea e huriki a Iuda ri vapopo haluia, ri nanea, “Ra mia, mi dava paru hosi. Garika go vakalongo mia ne vomu, ge ioe e rei muholi? Pali ioe ge ioe e Kristo, o ta kavakava ne mia ngane.”

²⁵E Isu i koli, i ta maea, “A taki mua pali. Pali i uka ma mu longo mai a ngavagu. A maka nivakasiri a rata na rane Tata ri vakasiri iau e rei.

²⁶Pali i uka ma mu luhoi tora iau, a vuhuna i uka ma mua a sipsip nau.