Yuhana 10:5-26

⁵Na ima dofunu kumara ba, iba na cumghari bara na iyiru liwui kumara ba.”

⁶Yesu wa belin nani to tinan tigolde, na iwa yinnin sa inyaghari adin bellu ba.

⁷Yesu kuru aworo nani, “Kidegenere, nbelin minu, menghari kibulun nakame.

⁸Vat na lenge na ina dak ameng dutu udak, akiriari nin na nan bolusu nimon, na akame ma lanzu nani ba.

⁹Menghari kibulunghe. Asa ko uyeme unit npira unuzu ning, ama se utucu; ama pira anuzu ama se kiti kileo.

¹⁰Na ukiri din dak ba se asu likiri, amolu, anin nanza. Meng na dak ina se ulai ise unin gbardang kang.

¹¹Menghari unan libya ugegeme. Unan libya ugegeme asa ana ulai me bara akame.

¹²Ame unan libya nduk, na unan nakam ba, na amere unan nakame ba, awa yene kinyinyo ucin dak ama sunu akame a cum awulu. Kiyinyo ma yiru a wulttun ani.

¹³Ama cum asun akame na ama rissu anin ba, bara na ame unan katwa ndukkari.

¹⁴Menghari unan libya ugegeme, in yiru ananing, ananighe yiruoi.

¹⁵Ucife yirui, Meng wang yiro Ucife, Meng nani ulai ning bara akame.

¹⁶Ndi nin na mong akama alenge na adi an longo ligowe ba. Anin wang, nma dak mun gbas, ima lanzu liwui nighe iso ligo lirum unan libyawe wasamme.

¹⁷Bara nanere nta Ucif di nin su ning, nna ni ulai ning nnan sere unin tutung.

¹⁸Na umong ma seru unin kiti nin ba, Menghari na ceo unin usan ning. Ndi nin likara nciu nnin, in yita nin likara in yirun nin. Nna seru ulenge uduke kitin Ncif ningari.”

¹⁹Iwa se ukosu nibinayi nanya na Yahudawa bara ubellu nliru une.

²⁰Among mine gbardang woro, “Adi nin kugbergenu ayita nin nilaza. Iyaghari nta idin lanzughe?”

²¹Among mine woro, “Na ule ulire un nan nilazari ba. Kugbergenu wasa ku puno iyizi nduwa?”

²²Kubi nbukin wessu da in Urshalima.

²³Kubi linna wadi, Yesu yita ncin nanya kutii nlira kitin shizunun Solomon.

²⁴A Yahudawa kilighe, iworoghe, “Udiduru kome kubiari uma sunu nari nanya nkpilzu? Andi fere Kriste nuzu fang ubelin nari.”

²⁵Yesu kawa nani, Nna bellin minu na iyinna ba. Nitwa nanga na nsu nanya lissan Ncif ning, ilele nna ushaida litininghe.

²⁶Vat nani na iyinna ba bara na anung akam nighari ba.