San Juan 10:5-26

⁵Mana rejsiskataka mana katincuchu, manachayri escaparancu, wajaskan mana rejsiska caskanraycu.”

⁶Jesús cay ejemplota churarkan; paycunataj mana entenderkancuchu ima niy munaskanta.

⁷Jesús ujtawan nillarkantaj: “Segurayquichis, noka puncu cani, ovejacunapaj yaycunan.

⁸Nokamanta ñaupajta jamojcunaka suwacuna cancu, ovejacunataj mana casuncuchu.

⁹Noka puncu cani. Nokajnin yaycojlla salvaska canka. Imaynatachus uj ovejaka yaycun, llojsin, pastotataj tarin, chay jina canka.

¹⁰“Suwaka jamun suwananpaj, wañuchinanpaj, ñut'unanpaj. Nokacajka jamuni causayniyoj canancupaj, astawanraj causayniyoj canancupaj.

¹¹Noka cani sumaj michejka. Sumaj michej caspataj, causayniyta koni ovejaycuna wiñaypaj causanancupaj.

¹²Kolkellamanta cuidajcajka sajra lobo jamojtin, ovejacunata sakerparispa escapan, mana michej caskanraycu, ovejacuna mana paypajta caskanraycu. Sajra lobotaj ovejacunata jap'in, tucuynejmantaj t'ipirachin.

¹³Chay cuidajka escapan. Paymanka kolkella importan, manataj ovejacunachu.

¹⁴“Noka sumaj michej cani. Ovejaycunata rejsini, nokatataj rejsiwancu,

¹⁵imaynatachus Dios Tata rejsiwan, nokapas Tatayta rejsini, ajinata. Noka ovejaycunaraycu causayniyta koni.

¹⁶Waj ovejaycuna callantaj, mana cay canchamantachu. Paycunatapas pusamunallaytaj; paycunaka casuwankacu. Uj tropalla canka, uj michejniyojlla.

¹⁷“Causayniyta koni wajmanta causarimunaypaj, chayraycu Tatay munacuwan.

¹⁸Mana pipas causayniyta kechuwanchu, manachayri munayniymanta koni. Atiyniyoj cani causayniyta konaypaj, wajmanta causarinaypajpas. Cayta Tatay mandawan.”

¹⁹Judiocunataj chayta uyarispa, ujtawan iscayman tucorkancu.

²⁰Achqhayoj paycuna uqhumanta nerkancu: —¿Imapajtaj casunquichis? Payka sajra espirituyoj, loco.

²¹Waquincunataj nerkancu: —Sajra espirituyojka mana chay jinata parlanmanchu. Sajra espirituyojri, ¿ñausata khawatatachinmanchu?

²²Jerusalenpi templopaj p'unchaynin fiestata ruwachcarkancu; chiri tiempo carkan.

²³Jesús templopi cachcaspa, puriycachachcarkan Salomón niska puncu chhicapi.

²⁴Judiocunataj muyuycuspa taporkancu: —¿Jayc'ajcamataj iscayrayachiwanquichis? Cristo canqui chayka, ujpita willawaycu.

²⁵Jesús contestarkan: —Willarkayquichisña, manataj creewanquichischu. Tucuy imata ruwani Tataypaj atiyninwan. Chay sut'inta willacun Cristo caskayta.

²⁶Kancunataj mana creenquichischu, mana ovejaychu canquichis chayraycu.