John 10:5-26

⁵Ingwer-rnem rernem apentey-angenharl, iterl-arey-angenharl. Arreyn ingwer-lkwer, ingwerel-ayeth ingwer-lkwer rernem angkenharl. Renhant rerneman iterl-arenh, yep-yep renh-rnem arntarnt-arenhantarl. Ahentyan. Anterrenharl ingwer-rnem-ketyan arreyn ingwer-lkwer rernem awenharl yep-yepel-rnem, rernemap anterrenharl. Yep-yep-rnemey.”

⁶Jesus-elap angkan ikwer-rnemek ilenh, rernemap iterl-arey-angenh, “Ilekek nhan Jesus-arl angkeyel wenh?”

⁷Iwerr aynteyneyel alakenhan, yep-yep-rnemek. Jesus-an angkek, “Ayengarlart iwerran, iteth-kenh apmer-warl! Ingkerrenhel ayenh iterl-areyel.

⁸Ingwer-rneman angkeyel irrtyert-awarr-rnem. Atyenh-rnem atyeng awelheyel, yep-yep-rnem awelheyel-apeny.

⁹Ayengarlart iwerran. Athap itethilemarl ingkerr innga atyeng-angkwarr apetyeman rerneman iwerr-angkwarr. Apmer atyenh-warl apey-alpeman. Inkwerelheyek. Atyeng-angkwarrant inkwerelheyek mwerr-angkwarr.

¹⁰Artwa anyelk-awarr apetyem, ra yep-yep-rnem anyelkel inetyek atwetyek-then. Alakenh-anyemant ra apetyem. Ayengan apetyek, atyenh-angkwarrarl apenteyel-rnem ingkerrenh itethiletyek, intem-antey rernem iteth anetyek.”

¹¹“Ayengarl yep-yep-rnem arntarnt-arey-angker aneyel-apeny. Anyelk-awarr apetyenty, yep-yep-rnem irrtyert inetyek, ra yep-yep arntarnt-arey-angker-tangkwel renh ipmek atwem. Yep-yep arntarnt-arey-angker ra katy ilwem yep-yep ikwerenh-rnemek, renh-rnem arntarnt-aretyek apmwekety itethiletyek.

¹²Warrkenh ingwer-rnem rernem manekant warrkirreyel, rernem atyeng-apeny-wenyarl. Yep-yep-rneman ikwer-rnem-kenh-wenyarl. Artwa ra man-awarr arengk artnwer arnarenty, ra aterel ikwerety anterrem, yep-yep-rnem iwerl-alhemel. Arengk artnwerel yep-yep-rnem tnhwem. Yep-yep-rnem arlperrtyirremel anterrem arengk artnwer ikwerety.

¹³Man-awarr rernem yep-yep-rnem innga arntarnt-arey-angenharl. Alakenh-kety rernem aterel anterrem arengk artnwerel tnhwekerr.”

¹⁴“Ayengarl artwa yep-yep-rnem arntarnt-arey-angker aneyel-apeny. Atha yep-yep atyenh-rnem alhengk-aremarl, rernem atyeng akalty arrpemarl.

¹⁵Irrkaty-angkwarr Akngeyelan ayenh alhengk-areyel arrpemarl. Ayeng ikwer akalty arrpemarl. Kel ayeng katy ilwetyek yep-yep atyenh-rnemek, renh-rnem arntarnt-aretyek apmwekety.

¹⁶Yep-yep ingwer-rnem atyenh-rnem arrpemarl. Rernemap ingwer-areny-rnemarl. Atha renh-rnem akngetyem atyeng-angkwarr, rernem angka atyenh alhengk-awem-anem, ayeng ikwer-rnem arlkenty. Ikwer-penh atha ingkerrenh-antey renh-rnem anyentelhilem.

¹⁷Alakenh-anyem Akngey atyeng artewentyel ilkelheyel, ayengarl arlka menty anthelhem, atyenh-rnemek katy ilwem. Ayeng ipmepenh itethirreyenh.

¹⁸Kel menty ayeng arlka anthelhem, ayeng katy ilwetyek ingkerrenhek alhewer. Akngeyel ayenh rlterrkilek, ayeng kel arlka menty anthelhetyek. Ra ayenh rlterrkilem, ayeng angkep itethirretyek arrpemarl. Alakenh-anyem Akngeyel atyeng arrernek arrwekel.”

¹⁹Jew-rnemel angka awek-penh, ingwer-rnem ikwer inkwerelhek, ingwer-rnemarl arrangkwarl, irrpeltherrenh.

²⁰Rernem angkerrenh Jesus ikwer, “Ra arrenty-kenh itnweng-akertarl. Ran nhenh arwengkarl angkeyel! Arrantherr ikwer awelhey-angenharl!”

²¹Jew ingwer-rneman angkerrek, “Jesus apek arrenty-kenh rlterrk-akert, nthakenh ra mwerr apmwel-areth angkey-angenh! Nthakenharlap artwa aparrng-penh ra mwerrilek, arrenty-kenh rlterrk-akertarlan?”

²²Alyangkwel rernem akarrirrenh Jerusalem-warl, tyenkerr Hanukkah arlkwetyek. Jesus anenh arrpemarl apmer ikwer-itwek.

²³Ingwer-inger Jesus ra aketh-ampenyel lywenty-itwek itnan Solomon-kenh lywenty, ikwer-itwek ra alhenh tyaty ilkwitwek.

²⁴Jew ingwer-rnem Jesus ikwer-warl akarrirrek, renh ayern-ayntetyek, “Nga arraty anwekantherr ilelhey-angenh-antey. Akngeyel apek ngenh Christ nhenh-warl thwenek, rarl awank-akerr ilek, ahern nhenh-warl thwenetyek. Nga arraty innga ilelha, anwantherr ngenh iterl-arayntetyek.”

²⁵Jesus-el tyernek renh-rnem, “Ayengan arrekantherr arrwekel-antey ilelhek, ayengan Christ-arl, Akngeyel arrwekeleny-rnem ilek, ayenh ahern nhenh-warl thweneyenh. Arrantherr atyeng awelhey-angenharl. Akngeyel ayenh thwenek, rlterrk ikwerenh-akertel ayeng warrkirr-ayntetyek. Arrantherr ayenh anngetherr areyel. Alakenh-anyem-they arrantherr ayenh iterl-arey-areny, ayeng Christ-arl, rarl ayenh thwenek.

²⁶Arrantherr ingkerrenh atyeng irrpeltherreyelarl. Arrantherr atyeng-angkwarr apentey-angenharl. Arrantherran yep-yep atyenh-wenyarl.