Johanningundru 10:5-26

⁵Tulani tana wata karipaterila nganai, a-ai, nunkangundru japa mindrila nganai; ngangau tulaia ngaiala tanali wata ngujamai.

⁶Ninapini jeribaka jaura Jesus tanangu jatana wonti: ja tanali wata ngujainana wonti mina jenia wondrai, Nau tanangu matja jatana.

⁷Jesus nakaldra tanangu jatana wonti: “Morlalu, morlalu, ngani jurangu jatai: Ngani mana nganai tjipia.

⁸Worderuntja pratjana ngakangu ngopera wokaranala kurikantji ja watawatali maninietja nganai; ja tjipieli tanana wata ngarai.

⁹Ngani mana nganai: kulno ngakangu wirinani, nulu kulkani ngamalkala nganai, ja nau wirila nganai ja dunkala nganai ja kuljakulja mankamankala nganai.

¹⁰Kurikantji windri wokarai kurieli manila naria nandrala ja teribala. Ngani wokaranala, tanali tepi ja poto pirna ngamalkananto.

¹¹Ngani Ngamalkanietja ngumu nganai. Nauja Ngamalkanietja ngumu tepi nunkani jinkiteriai tjipini.

¹²Nau ngamalkanietja kalalaia, nau wata ngamalkanietja nganai, ja tjipi wata nunkani nganai, nulupini pandipandi wokaranani najinani, nulu tjipi worarai ja japa mindriai, ja pandipandieli tanana patai, ja tjipi piltjaru ngankai.

¹³Ngamalkanietja kalalaia japa mindriai, ngangau nau ngamalkanietja kalalaia nganai, ja ngangau nulu tjipi wata ngundrai.

¹⁴Ngani Nauja ngamalkanietja ngumu nganai, ja tanana ngakani ngato ngujamai, ja tanali ngakanali ngana ngujamai.

¹⁵Worderu Ngaperali ngana ngujamai, ja ngato Ngaperi ngujamai; ja ngani tepi ngani jinkiteriai tjipini.

¹⁶Ja ngato tjipi pilki ngamalkai, tana wata nunkangupini jarundru nganai; bakana tanana ngato wokaralkananto, ja tanali ngaiala ngakani ngarala nganai, ja ngami kulno ja ngamalkanietja kulno pantjila nganai.

¹⁷Jendrangundruja Ngaperali ngakanali ngana ngantjai, ngangau ngani tepi ngakani jinkiteriai, ninaia nakaldra manila.

¹⁸Wata kulnujeli ninaia ngakangundru maniai, a-ai, ngani munta ninaia jinkiteriai. Ngato ngurula ngamalkai ninaia jinkiterila, ja ngato ngurula ngamalkai ninaia nakaldra manila: Ninapini jirijiribani jaura ngato ngakani Ngaperandru maninala.”

¹⁹Juda kana nakaldra tidatida ngankijiribamalina wonti nunkangupini jaurandru.

²⁰Palpa tanangundru jatana wonti: “Nulia kutji ngamalkai, ja jirijiri nganai; minandru jura ninaia ngarai?”

²¹Palpa jatana wonti: “Jenia wata kana kutjintaia jaura nganai; kutji ngurunguru nganai butjuja milki piri ngankala?”

²²Godaia pungaia kulikiri ngankani ditji Jerusalemingu nganana wonti; ja kilpani nganana wonti.

²³Ja Jesus Godaia pungani Salomonani pirini wirarina wonti.

²⁴Juda kanali nina kapikapina wonti ja nunkangu jatana wonti: “Wintaranaia jundru ngaianina mungara ngandrawalkai? Jidni Christus ngananani ngaianingu talku jatamai!”

²⁵Jesujeli tanangu kalabana wonti: “Ngani jenia jurangu jatana warai, ja jura wata morlalu ngundrai; tananaia ngankana, tananaia ngato ngankai Ngaperaia ngakanaia talani, tanalia ngakangundru tinkari ngankai.

²⁶Windri jura wata morlalu ngundrai, ngangau jura wata tjipi ngakani nganai, worderu ngani jurangu jatana warai.