Yohane 10:5-26

⁵Waŋu ic enia méŋac ara imi ieneŋ ménda niŋtegicanʒu. Imuac niŋ waima héŋqacgéma kemmu.

⁶Yesunéŋ séséc ac imi énézéyu niŋgic, néŋ ac hénia imi ménda niŋasarigic.

⁷Imuac niŋ Yesunéŋ muŋguc énézéyec; Hélacnec téŋgéŋ énézézua; Ni rama ionac nagu.

⁸Ni ménda hawa walac hagic imi eneŋ mocʒoŋ kowu nene ʒéma kaiʒiliweŋ ic. Imuac niŋac rama ieneŋ acgina ménda niŋgic.

⁹Ni nagu mianéŋ, méŋnéŋ nuac muru keremmac imi aŋgéŋa tiwa, nagu imuacnec eŋeŋ mama wamma nene mihicŋimac.

¹⁰Kowu nene imi eŋ ménda hamac, néŋ rama sasaŋgiaiguc énépésima kemma mebirima unuhumumac niŋac sac haanʒac. Ni mia rama ieneŋ kekec imi sécgina mema kuaya qeqe memu niŋac hayi.

¹¹Ni imi rama galeŋ hiabia. Galeŋ hiabianéŋ rama ionac niŋ keckecya hia wai énécmianʒac.

¹²Waŋu galeŋ soukiwa niŋac ai meanʒac iminéŋ galeŋ héla qahac. Waŋu rama imi eŋeya qahac, imuac niŋ haséŋ kazu hayu hémma rama wai énécmima néŋgaru haséŋ kazunéŋ inima néndéŋ énécmianʒac.

¹³Ic imi soukiwa niŋac ai meanʒac imuac niŋ néŋgacanʒac. Waŋu inéŋ rama niŋac ewa éréhéc ménda waŋanʒac.

¹⁴Ni rama galeŋ hiabia. Ramahécna niŋénécmiwa niŋnénʒu.

¹⁵Imi mia Maŋgocnéŋ ni niŋnéŋu neŋ Maŋgoc nimmianʒua imuhuc ésécnec. Imuac niŋ ni rama ionac niŋac kekecna waizua.

¹⁶Nuaru ramahécna méŋ kecʒu imi demiŋ yomuacnec qahac. Waŋu ini momacnec onagicma éréwa nuac ewana nimmu. Niŋgic rama tuŋ momacguc kecgic galeŋ momacguc kecénécmimac.

¹⁷Kekecna muŋguc memaŋ ʒéma waizua imuac niŋ Maŋgocnéŋ nuac goina héianʒac.

¹⁸Kekecna imi méŋnéŋ ménda nuagicmac. Waŋu ni nenaoc waizua. Kekecna gilimaŋ me muŋguc memaŋ imuac kuc buŋa imi nuaru henénʒac. Ʒézé seli imi Maŋgocna iwac murunec hayu késayi.

¹⁹Ac imuac niŋ Yuda ic ieneŋ muŋguc héndéŋ amugic.

²⁰Waŋu sucginaiguc sasalanéŋ yomuhuc ʒégic; Inéŋ uŋa biria késayu qeria sicsaoc wanʒac. Némac niŋ ara ninʒu?

²¹Waŋu tosaranéŋ yomuhuc ʒégic; Ac imi ic méŋ uŋa biriayaguc imuhucyawac ac qahac. Uŋa birianéŋ ic kic hilic méŋac kiwa hia mehiarumac me?

²²Yerusalemiguc ocmuŋ téréyawac naguya augic imuac yawuŋ imi saŋgeŋa naléyaiguc ducŋiyec.

²³Yesunéŋ ocmuŋ téréya demiŋ qeriaiguc luhuc ama yanda méŋ qara Solomon taru imuac qeriaiguc lelecgéma naŋec.

²⁴Waŋu Yuda ic ieneŋ lelecgémima yomuhuc ʒéma ézégic; Némac nalé ducŋiyuguc ewa éréhéc ménda waŋgémbiŋ? Gi Kristo kecʒaŋiguc ʒéasarima nénézéna.

²⁵Ʒégic Yesunéŋ yomuhuc énézéyec; Ni énézéyi, néŋ ménda ninʒéŋgéanʒu. Kiwi méréra nuac Maŋgocnawac qaraiguc meanʒua iminéŋ nuac héipuc ac ʒéénécmiʒac.

²⁶Waŋu ini imi nuac ramahécna qahac imuac niŋ acna ménda ninʒéŋgézu.