Jon 10:5-26

⁵Be bwelk etok wat atob inde intau nile amol ebeok ti sin-ge ite ma, atob inpelk inkwai ve gisov eisir itpweng amolmol ebeok sinsin ge avos are ite ma.”

⁶Yisu ginei yaun ai etok gitangi eisir Parisai, bemem eisir itpweng yaun etok ane dabe are ite ma.

⁷Beti Yisu ginei yaun nok vukuri be ginei; “Ayeu nanei bingano ge nitangi yem nanei: Bwelk sipsip as nam avo ayeu ate eteik.

⁸Be amolmol bambamo ete warik imungg inme inme ok, etok amolmol vaina ane be amolmol ebe irwel amolmol as gen giriv be gira ok ge tepwe etok. Eisir imungg inme bemem bwelk sipsip iute eisir avos ite ma.

⁹Bemem ayeu, ayeu nam avo ebe ve insov bwelk sipsip as el aplo inde ok eteik. Dangetok be ginei amol ti nivang nitangi ayeu ninme be nisov el aplo nile, ei wat ninggas tiate ite ma, atob Pomate nemb ei ru be nimbweg vie-ngge. Be atob ei nisov nile be menihlang be nilgum dangetok nivang be atob ninggas ane gen vevies ge.

¹⁰Amolmol vaina ane inme ve gen ti ane givin ite ma. Eisir inme ve invaina bwelk be tis ebe ve ines bwelk vun-kunu, be ebe ve invin-vin bwelk niriv be nira ok ge. Bemem ayeu, ayeu ganme veik nalgum be eisir inambweg matawas vie-ngge.

¹¹Bwelk sipsip as amol vie ebe geb is dabin ok ete ayeu ik. Be atob namb au-ate nawel bwelk sipsip nok be namat vunu ve eisir ane.

¹²Amol ebe geb kulkul ve geb bwelk dabin be ei gilgum ve mone ane ge ok, etok bwelk as tivias ei roro ite ma, be etok ei ane bwelk roro ite. Dangetok be ginei ei nili uvun valir ane ebe gituvki gitangi ei tis bwelk gile ok, kob atob nipelk nikwai bwelk be uvun inde be inlat is be in-vinvin is inriv be inra.

¹³Ve gisov ei geb kulkul ve none ane ge, be ei gitangi ebe ve nemb ta ve bwelk is likok ane ok ite ma.

¹⁴Ayeu amol vie molge ebe gab bwelk sipsip dabin ok. Be ayeu gatpweng angg bwelk are be eisir ok itpweng ayeu are,

¹⁵Dangete Tamangg gitpweng ayeu are be ayeu gatpweng Tamangg are ok. Be atob ayeu namb au-ate natangi tanmat vunu ane gwangne nale nawel eisir.

¹⁶Awangg bwelk sipsip dubi ti ete ivang nik. Bemem eisir ivang dongke ivin bwelk etenik ite ma, beti atob ayeu namb kulkul ve nanggas eisir inme inpil dongke kob. Veik eisir inaute ayeu avongg, be invang weik bwelk vu dongke ge be tivias dongke.

¹⁷Tamangg ta givin ayeu anongge, ve gisov atob ayeu namb au-ate natangi gimat ane gwangne nale be namat vunu, bekob atob matawangg be namdil vukuri.

¹⁸Amol ti gigas ayeu dalgongg matawangg ane gikwai ite ma. Etok ayeu ate angg tangg givin beti gab au-ate gatangi tanmat vunu ane gwangne gale. Ayeu angg gwangne gitangi ebe ve namat vunu, bekob matawangg be namdil vukuri ok. Yaun etenik ayeu gaute nangge Tamangg avo.”

¹⁹Bambamo Juda ane iute yaun etok love emb is ate vusa gile dubi ailu vukuri.

²⁰Amolmol tavlu bamo ge inei yaun gipil Yisu be inei, “Ngalau tiate givang givin amol etenok beti gilgum ei be wele-wele, be yem ute ei ane yaun ve ret ane?”

²¹Be eisir subu inei, “Ngalau tiate ginei nivang nivin amol ti, atob amol etok ninei yaun dang-dang etenik be nilgum amolmol ebe matanos bop ok be ponge ok ite ma yapin.”

²²Aiweng ebe warik eisir Juda ilgum ben ve es lum yamar bamo ebe givarkei Jerusalem ok ane nam avo ponge ok ande meng gihlang. Beti eisir veve inalgum ben bamo nok vukuri. Be etok aiweng urwemb ane roro.

²³Be Yisu gilauk givang lum yamar bamo nok ane aplo ti ebe ital inei Solomon ane samuak ok.

²⁴Beti bambamo Juda ane ile be ivarkei ile idbul ei be iutani ei be inei, “Atob mie nulgum be amei tangg amei nitung walang walang dangetok anvang love asger kob? Ginei mie amol (Kilisi) ebe ve nomb amolmol dabin ok bingano ge, okob unei im ate lavo itangi amei ma?”

²⁵Beti Yisu giwel eisir avos be ginei, “Ayeu ganei gitangi yem gikwai bemem yem aplongg aim givin ite. Kulkul bambamo ete ayeu galgum ve Tamangg ane gwangne ane ok, kulkul etok ete ginei ayeu lavo gitangi yem gikwai.

²⁶Bemem awangg bwelk sipsip subu ete yem nok ite, beti aplongg aim givin ite ma.