Ioanes 10:5-26

⁵A re sota pan idauen, me re san, pwe re pan tang sang, pwe re san ngil arail.

⁶Iesus kotin masani ong irail karaseras pot et, a irail sota weweki mepukat, me a kotin masani ong irail.

⁷Iesus pil kotin masani ong irail: Melel, melel I indai ong komail: Ngai wanim en sip akan.

⁸Karos, me pwarador mo i, iei lipirap o men kuli, o sip akan sota kin rong irail.

⁹Ngai wanim o, a meamen pedelong re i, pan kamaurela o diar manga purepure.

¹⁰Lipirap kin kodon pirapela, o kamela, o kaokaoe, a ngai kodo, pwe irail en ale maur, kakairida kokolata.

¹¹Ngai silepa mau; a silepa mau kin tonmeteki ong na sip akan maur i.

¹²A me kin pwaipwai o me sota udan silepa, o me kaidin udan na sip oko, iei me ngingar kidi en wel kokodo, ap kasela sip oko, tangdaui, a kidi en wel saikidi sip oko, kamueit ir pasang.

¹³Me pwaipwai o kin tangdaui, aki a pwaipwai, o sota insenoki sip oko.

¹⁴Ngai silepa mau, o I asa nai kan, o nai kan pil asa ia.

¹⁵Duen Sam o asa ia, iduen I asa Sam, o I tonmeteki ong sip akan maur i.

¹⁶A pil akai nai sip, me so kisan nan kel wet, mepuko I pil pan wado, o re pan rong ngil ai, o a pan pwin taieu o silepa me ta men,

¹⁷Iei me Sam pok ong ia, pwe I kidi maur i, pwe I en pur ong ale.

¹⁸Sota me ki sang ia, pwe pein ngai kidi. I manaman ong kidi maur i, I pil manaman ong kapure dong ia. Kusoned pot et I aleer sang ren Sam ai.

¹⁹Iei me Sus oko ap pil liak toror pasang pweki masan pukat.

²⁰Me toto re ’rail indada: A tanwar en tewil o iakalar. Menda komail rong i?

²¹Akai me indada: Kaidik padak en tanwar en tewil pukat, da, tewil pan kak kapad pasang mas en me maskun amen?

²²A ran en isimas en im en kaudok wiaui nan Ierusalem, i ansaun kapau.

²³A Iesus kotikot sili nan im en kaudok, nan palang en Salomo.

²⁴Sus oko kapili pena i indang i: Arai da komui pan okioki sang kit? Ma komui Kristus, en kadede ong kit sansal!

²⁵Iesus kotin masani ong irail: I indai ong komail er, a komail sota poson dodok kan, me I wiadar ni mar en Sam ai, iei me kin kadede ia.

²⁶A komail sota poson, pwe komail kaidik kisan nai sip, duen me I indai ong komail er.