Jon 10:5-26

⁵Wurra an-gata an-nerranga jin-gunaga jip gala jiny-yinmiya a-jurrjurrma, wurra jarra a-gengamanga; ngardawa manyjirda a-jirra gala marn․gi nula.”

⁶Gun-narda Jesus a-wena burrwa gun-maywapa ranginy, wurra birripa gala gubi-nacharna meyali.

⁷Lika mola Jesus a-wena burrwa. A-yinagata, “Gun-guna ngu-weya ana-gorrburrwa gun-burral: Ngaypa minypa ng-gunaga ngana gu-jirra burrwa aburr-ngaypa gu-galiya yerrcha aburr-gata minypa jin-maywapa jip.

⁸Aburr-werranga aburr-jaranga mu-ngoyurra aburr-bona gurda aburr-ngumurda, wurra jip gala jiny-jaliyarna burrwa.

⁹Ngaypa minypa ng-guna ngana gu-jirra, rrapa minyja ana-nga a-barrnguma barra gun-guna, ngaypa wanngu ngu-nega barra. Minypa a-barrnguma barra a-workiya rrapa a-bengga barra a-workiya, gu-barripa barra rrawa balaja gu-murna.

¹⁰An-ngumurda ana-boya ana-workiya mun-nga mun-ngumurda mu-mangga a-workiya rrapa an-nga a-burnda a-workiya rrapa gun-nga gun-nerra gu-nenga a-workiya. Wurra ngaypa nguna-bona aburr-ngaypa gu-galiya yerrcha barra wanngu nguburr-nega, minypa burr-guya wanngu aburr-ni barra.

¹¹“Ngaypa minypa ngu-molamola jip jaga ng-ganaja achila ngu-workiya. Minypa ana-nga an-molamola an-gugaliya jip jaga a-ganaja achila a-workiya, nipa jiny-jarlapurda jiny-janyja a-workiya marrban nipa a-juwa.

¹²Wurra an-mujama an-guyinda, nipa jarra gala gu-borrwa minypa jaga a-ganaja a-workiya, ngardawa jin-nigipa ngika jip. Wurra minypa an-mugat a-nacha a-workiya, a-gengamanga, lika jip jiny-bawuja, ngardawa nipa jama wupa nula rrapa gala a-worija achila jip. Lika an-mugat jin-nerranga jin-dimanga rrapa jin-nerranga ganday jinyu-nenga, ngardapa ngardapa jiny-yurtchinga.

¹³Nipa an-mujama a-yurtchinga ngardawa gala a-worija achila jip, ngardawa nipa jama wupa nula.

¹⁴Ngaypa jarra ngu-molamola jip jaga ng-ganaja achila ngu-workiya. Ngaypa marn․gi jin-ngaypa jip rrapa jin-ngaypa jip marn․gi apula ngaypa

¹⁵gun-maywapa minypa nipa Ngun-anya marn․gi apula ngaypa rrapa ngaypa marn․gi nula Ngun-anya. Rrapa ngaypa ngu-juwa barra achila jin-gata jip.

¹⁶Rrapa aburr-werranga ngubin-dimanga jip gu-werranga gu-rrawa aburr-nirra barra nguburr-ga gurda ay-ngunyuna. Minypa birripa aburr-galiya barra gun-ngaypa wengga, lika jip gu-ngardapa aburr-ni barra an-ngardapiya jaga a-gana barra burrwa, wurpa lika ngaypa.

¹⁷Gun-guna nula Ngun-anya jal a-nirra apula ngaypa: ngardawa nawanawa ngu-ni ngu-juwa barra burraya wanngu ngu-ni.

¹⁸Gala ana-nga nguna-gaypa wanngu gun-guni, jarra ngaypa wupa ngu-barnja barra. Ngaypa gun-mola apula wanngu gun-guni ngu-rrimarra ngu-barnja, rrapa gun-mola apula ngaypa barrwa ngu-ma. Gu-gurda ngacha Ngun-anya gu-gurrmurra apula barra ngaypa ngu-yirda.”

¹⁹Gun-narda Jesus a-wena, lika wurra gama gorlk aburr-ngorrkorndiyana.

²⁰Minypa aburr-jaranga aburr-wena, “Nipa walkwalk a-rrimanga; an-bamapama, ngarla! Gala nguburr-yinmiya nguburr-galiya nula.”

²¹Wurra aburr-werranga aburr-wena, “Gu-gata ngacha janguny an-gugaliya walkwalk a-rrimanga gala a-yinmiya a-wengga. Minyja walkwalk gala a-yinmiya an-gapula a-jarlapa, ngaja, ngarla!”

²²Gun-gatiya lika gata Jirúchalam (Jerusalem) janara gu-ji, minypa gubu-borrwurra wola Wangarr gun-nika gun-japurra rrawa gubu-wurlurrbuna mu-ngoyurra aburr-werranga werra gubi-negarra aburr-bamuna, gu-gurda ngacha janara. Rrapa gun-gatiya minypa mern mu-yurtchinga,

²³nipa Jesus gu-japurra a-bamuna yarlanga Wangarr gun-nika gu-bala, minypa gu-birlapirla a-bamuna gun-gugorlkaka gu-ji gun-gata birlapirla gubu-ngurrjinga aburr-workiyana Jolaman (Solomon) gu-gupuna.

²⁴Gata waypa Jesus a-bamuna, Ju yerrcha aburr-gata gojilapa abi-negarra, aburr-yinanga nula, “Ganapa jordajiya arrburrwa. Wurra minyja nginyipa Christ nipa Wangarr biy-menga arrburrwa Wanngu Nyi-gunega, ngurrjiya arrburrwa yarlanga.”

²⁵Jesus a-yinanga burrwa, “Gipa ngu-weya ana-gorrburrwa ngu-workiya, wurra gala marr nyiburr-balcha apula. Wurra gun-gata ngaypa jama ngu-jirra ngu-workiya minypa Ngun-anya nguna-wuna ganyjarr, gun-narda yarlanga gu-nenga ngu-ngiya ngaypa.

²⁶Wurra ana-goyburrpa gala marr nyiburr-balcha apula, ngardawa ana-goyburrpa ngika minypa jin-ngaypa jip.