Yohanis 10:5-26

⁵Mete ma hambu hataholi fo biꞌilombo taa lalela kana, na, ala taa tunggan. Tehuu ala lalai, huu ala taa lalelak hataholi feꞌek ndia halan.”

⁶Leo mae Yesus tui nakandandaak ndia neu sala, tehuu ala taa bubuluk ndia maksud boe.

⁷Basa de Yesus nafada nakadaik neu sala nae, “Au afada ei ia, tetebes. Au sama leo lelesu nai biꞌilombo la lalaen.

⁸Basa hataholi mana makahuluk neme Au mai, ala sama leo naꞌo. Mae ala loke mbea-mbea, tehuu biꞌilombo la taa lamanene neu hataholi sila.

⁹Boe ma Au sama leo lelesu ndia. De mete ma hambu mana nau nesik Au, na, Manetualain nau nasalaꞌe nalan neme ndia sala-singgo nala mai. Ndia sama leo ana maso neni Lamatuak mamanan neu nesik Au fo mana dadik neu lelesu. Ma hataholi fo ana maso nesik Au, na, ana laꞌok sudi bee neu, ma ana hambu naꞌa-ninu no teteben.

¹⁰Naꞌo la kada tao naodek, huu ala mai fo lamanaꞌo, lakanisa, ma tao lakalulutu hataholi sodan. Tehuu Au uni sodak fo malolen nalan seli, huu Au mai fo suek hataholi bisa nasoda ndoo-ndoo, ma nasoda ndoos.

¹¹Au boe oo sama leo manahoo malole esa. Huu manahoo malole sadia fee ndia aoinan losa maten, fo suek ndia biꞌilombo nala bisa lasoda.

¹²Tehuu hataholi mana manea fo nana nanggadik, mete ma ana nita busa fui esa mai, na, ana nalai, de ela biꞌilombo la sila leme ndia. Basa de busa fui ndia kiki nala biꞌilombo esa, boe ma biꞌilombo feꞌe kala lalai latanggelak.

¹³Hataholi mana manea ndia nalai, huu kada ana sangga doik. Ana taa mbali, fo nanea neulalau biꞌilombo la sila.

¹⁴Tetebes! Au sama leo manahoo malole. Au alelak Au biꞌilombo nggala. Ma sila boe oo, lalelak Au.

¹⁵Ndia sama leo Amak nai nusa-sodak nalelak Au, ma Au boe oo alelak Ndia. Au boe oo sadia fee Au aoinang losa mate, fo suek Au biꞌilombo nggala bisa lasoda.

¹⁶Hambu Au biꞌilombo feꞌe nggala, fo bei ta lakabubua lo Au biꞌilombo nggala lai ia. Au musi akabubua ala sala boe. Dei fo mete ma ala lamanene neu Au halang so, na, ala lalelak memak. Boe ma ala mai lakabubua, dadik leu bubuak esa fo manahoo esa.

¹⁷Huu Au sadia so fee Au aoinang losa mate, fo Au bisa asoda fali. Huu ndia de Au Amang nai nusa-sodak sue Au.

¹⁸Taa hambu hataholi esa nakaseti Au fo mate, tehuu Au mesa nggau sadia fee Au aoinang losa mate. Au boe oo aena haak fo fee Au aoinang. Au boe oo aena haak fo haꞌi fali kana. Palenda ia, Au simbon so neme Au Amang nai nusa-sodak.”

¹⁹Huu ala lamanene Yesus kokolak leondiak, boe ma hataholi Yahudi la lasisimbo bafak bali.

²⁰Hambu noꞌuk leme sila mai lae, “Wei! Hataholi ia kamuluk! Ma Ndia boe oo nitu nalak! Hatina de ei nau mamanene neu Ndia?”

²¹Tehuu hambu luma bali lae, “Ia hataholi kamuluk kokolan taa ia hetu? Kokola leondiak, taa kalua nitak neme nitu la bafan mai! Ma nitu la boe oo taa tao lala hataholi mbokek bisa nita bali, hetu?”

²²Faik ndia, hataholi Yahudi la nau tao sila anggaman fai malolen esa. Fai malole ndia, nandaa no fai makasufuk. Nai feta ndia, hataholi Yahudi la lasaneda faik fo hataholi feꞌek tao langgenggeo Lamatuak Uma Ina Huhule-haladoin nai kota Yerusalem, boe ma ala tao lalalaon de ala tabis selu kana.

²³Yesus laꞌok ndule nai Uma Ina Huhule-haladoik pasan, nai mamanak fo makahulun ala lae, ‘Mane Soleman Uma Teras’.

²⁴Boe ma hataholi Yahudi malangga nala mai lakalilimbu lala Ndia lae, ‘Wei! Ita musi tahani losa faik bee, bei fo ita bisa bubuluk? Mete ma Ama ia, Karistus, na, tulun mafada manggaleledon dei.”

²⁵Yesus nataa nae, “Au afada memak neu ei so, tehuu ei taa nau mamahele. Naa te dedeꞌa kala fo Au tao kala, basan kada tungga Au Amang palendan. Dedeꞌa kala sila latudu lae, Au ia see.

²⁶Tehuu ei taa mamahele Au, huu Au biꞌilombo nggala taa ei.