Johannes 10:5-26

⁵Resap tapwela mürin pwal eman me lükün, nge repwe sü seni, pun resap silleni mwelian.”

⁶Jesus a apworausa ngeniir ei pworausen awewe, nge ir resap wewe ren.

⁷Iei mine Jesus a apasasefäli, “Enlet üpwe wesewesen ürenikemi: Ngang ewe asam fän iten ekewe sip.

⁸Chokewe meinisin ra akomwoto mwei ir chon solä me chon achomau, nge ekewe sip resap aüseling ngeniir.

⁹Ngang ewe asam. Iö a tolong lon ei asam epwe küna manau. Epwe tolong o towu o küna anan.

¹⁰Eman chon solä a chök feito pwe epwe sosolä me ninni me akkatai. Ngang üa feito pwe oupwe eäni manau, iei ewe manau mi somwola.

¹¹“Ngang ewe chon mas mi öch. Ewe chon mas mi öch a fangala manauan fänäsengesin ekewe sip.

¹²Nge ewe aramas mi mö, i esap ewe chon mas mine nöün kewe sip, lupwen a küna pwe eman wolif a feito, a likitala ekewe sip o süla. Mürin ewe wolif a turufi ekewe sip o atoropaseer.

¹³Ewe aramas a süla, pun i eman mi mö, esap ekieki manauen ekewe sip.

¹⁴Ngang ewe chon mas mi öch. Ngang üa silei nei sip kana o ir ra sileei,

¹⁵usun chök Semei a sileei o ngang üa silei Semei. Iwe, ngang üa fangala manauei fänäsengesin ekewe sip.

¹⁶A pwal wor ekoch nei sip resap nonom lon ei lenien sip. Ngang üpwe pwal fokun emweniireto. Repwe aüseling ngeni mweliei. Mürin epwe wor eu chök mwichen sip me eman chon mas.

¹⁷“Iwe, Semei a echeniei, pun üa fangala manauei pwe üpwe angeesefäli.

¹⁸Esap wor eman epwe angei seniei manauei, nge üa fangala seni püsin letipei. Mi wor ai pwüüng ai üpwe fangala, a pwal wor ai pwüüng ai üpwe angeesefäli. Iei usun mine Semei a allük ngeniei, pwe üpwe föri.”

¹⁹Iwe, pokiten ekei kapas ekewe chon Juta ra pwal kinikinfesen lefiler.

²⁰Chomong me leir ra apasa, “Eman anün rochopwak a wäni! A umwesila! Pwota oua aüseling ngeni?”

²¹Nge pwal ekoch ra apasa, “Ekei kapas esap alon eman aramas eman anün rochopwak a wäni! Ifa usun, eman anün rochopwak epwe tongeni aneneloi mesen chon chun?”

²²Iwe, a fis ewe chulapen Efinunen ewe imwenfel lon Jerusalem.

²³Lon ena otun a tori fansoun patapat. Lupwen Jesus a fetal lon ewe Pwalangen Salomon me lon ewe lenien imwenfel,

²⁴ekewe chon Juta ra rongeela o aisini, “Ifa langatamen fansoun om kopwe chök likitikem lon äm tipemwaramwar? Are en Kraist, kopwe afataöchü ngenikem.”

²⁵Jesus a pölüeniir, “Üa fen ürenikemi, nge ousap lüküei. Ekewe föför üa föri fän iten Semei ra pwärätä usi.

²⁶Nge ämi ousap lükü, pun ousap nei kewe sip.