Huani 10:5-26

⁵Peaa iyaa cajje ñajjajjaa shajjaꞌajja jjima acani; poe ajja. Jamajjeya oya ñajjajja poqui ajja pea nijje; ba jjimajo cuajicuajiquehuajeananani —Jesosa poanaje.

⁶Jesosaja sohui ejjashahuabaqui meejji ohuaya huohui canaje Jodio cuana huasijje. Jamatii ojaya, Jodio cuanaja quea quehua; jama acanaje baꞌa: —¿Ajeo acuae ca oya mimiani ecuana nijje? —poanaje.

⁷Jamajjeya Jesosaa oya cuana huohui ca oꞌoyanaje: —¡Bacue, oe! Eya, Jesosa esecue jjani jayojja jama poani. Ecuea epeejji dobiqui meesahuaña.

⁸Ojjaña ejaahuanajji nisho cuana ca ca sii sa poani. Jiquio ecua ñajjajjaa peaja esohui ba jjimajo pea nijje poquiquehua ajja jama jayojja ecuea epeejji nei nei esohui huohuijji nishojo jjashajjaꞌajjaqui ajja —Jesosa poanaje—.

⁹Eꞌe, eya esecue jjani jayojja poani; ojjañaa eya shajjaꞌajja canijo, enijje jjapeequianijo peaꞌai, eyaya oya cuana baꞌe tiitii meejeꞌyo enijje. Jiquio ecua ñajjajja jaahuanajjiya ojaya ñajjajja esecuejje dojocuayaqui cani bobi ijjiaa, jiyo huasijje jaahuana cani peaꞌai jayojja jama eyaya ecuea epeejji baꞌe meesahuaña quea pame nee, Eyacuiñajjija esohui jama —Jesosa poanaje—.

¹⁰Siipojji poeyani ñajjajja siiya, cuaquisho meeya peaꞌai, quecuaa peaꞌai. Jamaya esohui huohuijji nisho cuana siajje poani, sii cani, ecuea epeejji cuana poquiquehua mee cani eshahua nijje, de. Eya ca ca poeyanaje quea jaꞌa nee nee baꞌe meeya, pea ejjashahuabaquijjijo baꞌe meeya.

¹¹—Eꞌe, eya ñajjajja cuiñajji quea pame nee jayojja jama poani. Ñajjajja cuiñajjiya ojaya ñajjajja nahue neinei cani ijjiacajji maseya eꞌijjia ca poaje jjejojo. Oya jayojja eya manojeꞌyo ecuea epeejji cuana baꞌe tiitii meeꞌyojji.

¹²Echacojji ca ca eñajjajja mese pojjeama jjejojo ijjiacajji mase ba majje cuajicuajinanani; ñajjajja jeajea cananani. Jamajje ijjiacajji maseya ñajjajja cuana ijjia cani; poquiquehuajeanana mee cani peaꞌai.

¹³Ñajjajja cuana ojaya nahueꞌama. Echacojji cuajicuajijeananani, ojaya pojjeamajojo mi nahue cani —Jesosa poanaje.

¹⁴—Eya ca ca ñajjajja cuiñajji quea pame nee jayojja jama poani. Ecue Chiiya eya quea jea nee acani; oya ecuea quea jea nee peaꞌai. Oya jayojjaya eyaya ecuea epeejji cuana quea jea nee nee aña; eya ecuea epeejjija quea jea nee peaꞌai.

¹⁵Jamajjeya eyaya oya cuana nahue neineiaña, ecuea epeejji cuana. Jamajjeya ojaya mimishi cuijeaꞌyojji eya manojeꞌyo ona baꞌe tiitii meeꞌyojji —Jesosa poanaje—.

¹⁶Pea cuana yani peaꞌai, Jodio cuana pojjeama. Ohuaya peaꞌai ecuea esohui shajjaꞌajja cajeꞌyo. Ecuea epeejji poajeꞌyo peaꞌai. Eyaya oya cuana jjapeequi meesahuajeꞌyo peaꞌai. Jamajjeya ojjaña cuana ojee cajjapeequiahua; eya ca ca oe o jaahuanajji poajeꞌyo —Jesosa poanaje.

¹⁷—Ecue Chiiya eya huoojea canaje ojjaña jaahuanaa. Jamajjeya ecuea epeejji baꞌe tiitii meeꞌyojji eya manojeꞌyo, ona nahuejo. Eꞌe, e quecuaꞌyojji yani. Jamatii eya quecua caꞌyajje shequije oꞌoya mo. Jamajjeya eya ecue Chiija quea jea nee nee.

¹⁸Eya quea caꞌa nee nee poani. Jamajjeya ecuea epeejjijo manoꞌyo sa poꞌyo ajja jojjemo pea cuaa eya equecuaꞌyojji pojjeama pome. Jamatii eya manojeꞌyo jama poani baꞌa: “Eꞌe, ecuea epeejjija mimishi cuijeaꞌyojji manoꞌyo sa poanijo eya manojeꞌyo”. Manoꞌyo majje eya shequije oꞌoya. Ecue Chiiya eya jamaya huoojeame aca poa —Jesosa poanaje Jodio cuana nijje.

¹⁹Jesosaja esohui shajjaꞌajja majje Jodio cuana ojee jjamimicuiajea nobiajeaquinaje jama baꞌa:

²⁰—¡Oya Jesosa niñepoqui, de! ¡Oya quea jjashahuabaqui tai mimime poani! ¡Aꞌa oya shajjaꞌajjajji! —poanaje beca cuana.

²¹—Chojja, de oya niñepoqui pojjeama. Esohui quea pame nee nee huohui cani. Ohuaya ca ca oe cojjamaꞌ cuaya jjabapojjaqui mee caꞌyonaje. Jamaya po ajja niñepoqui cuana —poanaje pea cuana.

²²Quijje eeno shejo ojjaña Jodio cuana Jenosanena huasijje ojee jjachichaqui oꞌoyanaje. Quea bihui nee poanaje ma shejo. Eꞌe, ma shejo yahuajo nei Eyacuiñajjija equi pea iya ca oꞌoya poa quea bame nee. Jamajjeya ma shejoya ma shahuaba tiitii capoquiani Eyacuiñajji bihuia capoqui tiitiiani. Cuaquijiji sisi dedo cani quea cahui huiso.

²³Ma shejo Jesosa Eyacuiñajjija equi yasijje poqui oꞌoyanaje.

²⁴Equi quibojo jeojeonequinaje. Jodio dejja cuana o que jjachichaquinaje. Jama huohuiꞌajjame acanaje baꞌa: —Jesosa, ¿apiojji miyaya ecuana huohui jjima? ¿Aꞌa miya Eyacuiñajjija huoojeaꞌyo ojjaña jaahuanajji? ¡Ecuana eꞌe nei huohuicue quea jaꞌa nee! —poanaje Jodio cuana.

²⁵Jesosaa oya cuana jama acanaje baꞌa: —Eꞌe, eyaya miquianaya huohui huichaꞌa huichaꞌanaje yahuajo. Jamatii jjashajjaꞌajjaqui ajja. Ecue Chiiya eya ma dejjaa ajjima acani ameesahua cani miquianajaya ebajji nisho eya oja huoojeaꞌyo ojjaña jaahuanajji.

²⁶Jamatii miquianaya jjashajjaꞌajjaqui sa po ajja ecuea epeejji pojjeama jjejojoya. Jamaya eyaya miquianaya huohuinaje baꞌa: “Ejaahuanajjija emimi ojaya ñajjajjaja eba; jamajjeya onijje poquiani”.