Jan Laabaalihamo 10:5-26

⁵Bi kan hoadi caano, ama bi baa sani ki foagidi okani, kelima baa bani bi canba niali.

⁶Jesu den puaba laa kpanjama, ama baa den bandi wan maadi ba yaala yaa maama.

⁷Jesu go den yedi ba: N yedi yi imoamoani mini n tie bu buliñoabu ipe po.

⁸Yaaba n den kpa cua ke n daa cua kuli tie sugida leni sanjabe, ama ipe ki den cengi ba.

⁹Mini n tie bu buliñoabu. Yua n kua n kani kuli baa faabi o baa koa ki go ña ki baadi mi jiema.

¹⁰O sugido cua ki bua ki su, ki kodi, ki bolini, ama mini n cua ke ipe n ba li miali ki ya pia li bonla kuli ke li dagidi bi po.

¹¹Mini n tie o yankpaahamo. O yankpaahamo puuni omiali ope po.

¹²Ama o tuonsoanlo yua n ki die ipe, waa tie yankpaahamo, o ya laa ke ofuasangbanlo kpendi, o baa sani ki ha ipe. O fuasangbanlo baa cuo bi tianba ki yadi yaaba n sieni.

¹³O tuonsoanlo baa sani kelima waa die ipe, lanyaapo waa yagini o yama ipe. Mini n tie oyankpaahamo.

¹⁴N bani n pe, n pe mo bani nni.

¹⁵Nani Baa n bani nni, ke n moko bani Baa maama, n puuni n miali n pe po.

¹⁶N pia yaa pe n kaa ye li naa yanloli nni, n baa cuani bani moko, bi baa gbadi n nialu, n baa pia yangoyenli leni yankpaayendo.

¹⁷Baa bua nni, kelima n puuni n miali, ki go baa guani ki gaa n cili.

¹⁸O bakuli kanfie nni li, n pia upaalu ki baa pali, n go pia upaalu ki baa gaali, lani tie min den baa yaa ñoabonli n Baa kani.

¹⁹Mi paadima go den tieni Jufinba siiga kelima laa maama po.

²⁰Bi siiga boncianla den tua: O pia ki cicibiadiga, o gaade, be yaapo ke yi cengi o?

²¹Bi tianba den tua: Cicibiadiga ka, cicibiadiga ba fidi ki nuadi juama?

²²Li den tie ku fawaagu yogunu, ke bi jaani yaa jaanma n yi U Tienu diegu gagidima jaanma Jelusalema po.

²³Jesu den cuoni ki gaandi U Tienu diegu nni, Salimono ciagu tinga.

²⁴Jufinba den taani ki lindi o, ki yedi o: Hali u laa yogunu yo ke a baa waani ti, ti yama n duani? A ya tie U Tienu n gandi yua han kadi ki waani ti.

²⁵Jesu den guani ki yedi ba: N waani yi, ama yii daani, min tuuni ya tuona, n Baa yeli nni tiendi n po siedi.

²⁶Ama yii daani kelima yii tie min die yaa pe siigs yaaba.