San Juan 10:5-26

⁵Lao y taotao juyong, sija ti madalalag güe, lao manmalago guato guinin menaña: sa ti jatungo y inagangña ni taotaoj uyong sija.

⁶Este na acomparasion mansinangane as Jesus: lao sija ti jatungo jafa sija mansingane sija.

⁷Mantinalugua as Jesus ya ilegña nu sija: Magajet ya magajet y jusangane jamyo, na guajo pottan y quinilo sija.

⁸Todo y manmamaela antes que guajo, ladron yan saque sija: ya ti manmanjungog y quinilo sija.

⁹Guajo y petta: ya y jumalom guiya guajo, güiya umasatba, y ujalom yan ujuyong ya usoda y pasto.

¹⁰Y saque ti umamaela yaguin ti para ufañaque yan ufamuno, yan uyulang; guajo mamaela para uguaja linâlâñija yan para uguaja y dangculo na linâlâñija.

¹¹Guajo y mauleg na pastot: ya y mauleg na pastot y linâlâña japolo pot y quinilo sija.

¹²Ya y taotao nii maapapase, ya ti pastot; ya ti gaña y quinilo sija, an jalie y lobo ni y mamaela, japolo y quinilo sija ya malago guato; ya y lobo maquinene ya manchinalapon sija quinilo:

¹³Malago guato güe sa güiya taotao nii maapapase ya taya inadajiña ni y quinilo sija.

¹⁴Guajo y mauleg na pastot: sa jutungo y iyoco, ya y iyoco matungo yo.

¹⁵Taegüije y Tata jatungo yo, taegüijija locue guajo jutungo y tata; ya jupolo y linâlâjo pot y quinilo sija.

¹⁶Ya guajayo palo quinilo locue ni taegüe güine na colat, ayo sija locue nesesita yo juchule, ya sija ujajungog y inagangjo; ya uguaja un manadanquinilo yan un pastot.

¹⁷Pot enao na jaguaeya yo si Tata, sa jupolo y linâlâjo, para uchule talo.

¹⁸Taya munajanao guiya guajo, lao jupolo pot guajo na maesa. Guaja yo ninasiñajo para jupolo yan guajayo ninasiñajo para jutalo chumule. Este na tinago juresibe guine y Tatajo.

¹⁹Ya guaja inaguaguat gui entalo y Judio sija pot este na sinagan sija.

²⁰Ya megae sija ilegñija: Biju guaja güe, ya babagüe; sa jafa inicungog güe?

²¹Ylegñija y palo: Este na sinagan ti sija iyon y biju: Ada siña y biju ubaba y atadog y manbachet?

²²Ya anae mafatitnas y guipot y inefresengumayuus, guiya Jerusalem, ya ayo na tiempo manenggeng.

²³Ya si Jesus mapos malag y templo, gui corredot Salomon.

²⁴Ya manetnon guato guiya güiya y Judio sija ya ilegñija nu güiya: Asta ngaean nae unnabuebuente y antita? Yaguin jago yuje na Cristo, sangan ni claro.

²⁵Maninepe as Jesus: Guajo jagas jusangane jamyo ya ti injenggue: y checho ni y jufatinas gui naan Tata, estesija manmannanae testimonio nu guajo.

²⁶Lao jamyo ti injenggue, sa ti jamyo quinilojo; (taegüine guinin jusangane jamyo).