John 10:5-26

⁵“Yigaj! Anubani ana-jib waari wanggu-garrindharrmi warra-mulung-arrgi-yung. Yagu bagi-yung-bugij ni-narrii-yinyung, nigaaj-bugij. Warraaynbaj-maynji anuwaagala ambu-yaarri anubuguni, anubani-yung anggu-man-jarramang. Anubani yamba wu-maḻaḻadi ana-yang warrubawi-yung-jinyung.”

⁶Dani-yung na-Jesus ni-yambini niga, aadanu wiij-bulawaa-wala ana-lhaawu. Yagu warraawurru-yung warra-wurru-wurruj dani-yung waari amburru-marrbuy-maa wugurru.

⁷Ngijang na-Jesus wani-magaa. “Ngubindi ngubindi anaani ngana-magana nugurru. Ngaya-waj nga yaani anubani anu-dhawang anubani-yinyung ana-jib.

⁸Warruburru-yung warra-mulung-aynbaj wurru-ragaani-yinyung wuu-yanggi-yinyung anubani-yunggaj, warruburru-yung wurraamaji, wuu-daarrawa-windiyung. Yagu anubani ana-jib waari ambanggaa-gawanggini wugurru.

⁹“Nugurru yuga nurru-marrbuy? Ngaya-waj yaani nga anu-dhawang-jinyung. Nugurru-maynji numburru-yaarri-wugij ngayawi-wuy, niga na-God nambani-wiri-gang nugurru. Marri numburru-burraa numburru-muḻugu-mayn-bindiyung. Marri anubani nimbirri-waṉagana mamanunggu windiyung ana-wiri.

¹⁰“Yuga aadanu aḏaba nurru-marrbuy? Nubagi-yung-maynji na-daarrawa-yung ani-yaarri anubuguni nga ani-wamajaa ana-jib, anubani marri aniimana, anggu-lhagarra-ngawina wugurru. Anaani nga-yanggi ana-lhal-wuy numburru-burraa numburru-wiri yadhu.”

¹¹Naagi-yung na-Jesus ni-yambini-wugij niga. “Ngaya-waj nga yaani, nga-narrii-yinyung ana-jib. Ngaya-waj nga yaani nga-ngawang anubani-yung yungguyung ana-jib.

¹²Ngaya anaani waari ngaynjamang warruburru-yung-jii warra-mulung-aynbaj-jii. Warruburru wugurru wurru-mijgalmina a-wuṉuga-yinyung. Ambu-narrii-maynji anubani-yung ana-jib, warrubawi-yung waa-nunggarrang-maynji ambu-yaarri anubuguni, amburraarruyn anubani ana-jib, nga amburru-yarramang. Warrubawi-yung waa-nunggarrang ambu-yaarri nga ambu-wangana, anubani ana-jib nga amburru-man-jarramijgang.

¹³Warruburru-yung warra-wurru-wurruj amburru-man-jarramang, nga yagi aḏaba wurru-narri anubani ana-jib, warruburru-yung yamba wurru-mijgalmina wuṉuga yungguyung, waari yamba warruburru-yung amburru-ngaynbandang anubani ana-jib.

¹⁴“Yagu ngaya-waj nga yaani na-mamanunggu-yung nganamba-narrii-yinyung. Nga-marrbuy warruburru ngayawi-nyinyung. Marri warruburru warra-wurru-wurruj wurru-marrbuy ngaya.

¹⁵Anaani wiij-nguynju, na-Baba ni-marrbuy ngaya, marri ngaayung nga-marrbuy na-Baba niga. Marri nga-ngawang wugurraa yungguyung ngayawi-nyinyung warra-wurru-wurruj.

¹⁶Yagu ngarra-waṉagana mulung-aynbaj ngijang wurru-wurruj. Waari anaani-rruj-jinyung ana-lhal, wubani a-lhal-aynbaj-jinyung a-lhal wurru-burraa-yinyung wugurru. Anubani ngambambi-yaynjangayii ngayawi-nyinyung ana-yang, marri ngamba-yarrijgina wugurru, anaani ngaambaaynjaabu-wang nugurri-wuy aḏaba. Aḏaba numburru-burraa numburraaynjaabu nugurru. Ngaya-waj nganamba-narrii aḏaba warraarrawindi-lhangu aadanu.” Dani-yung ni-yamayn na-Jesus.

¹⁷Na-Jesus niga ni-yambini-wugij. “Ngaya nga-ngawang ngayawi-nyinyung yungguyung warra-wurru-wurruj. Yagu yamba dani-yung na-Baba ngaya ngani-ngaynbandii. Ngijang, wurrugu nga-ḻaḻagiiyn ngaya.

¹⁸Waari warraaynbaj ngaya ngambii-jari marri ngambii-ngu-jadugi ngayawi-nyinyung ana-wiri. Anaani nga-yiynjina ngayaajbaj-mirri nga-wijangayii, marri nga-ngawang. Marri anaani ngawu-waṉagana ana-lhuḏ, ngayawi-nyinyung ana-wiri nganggu-burrang marri nganggu-ḻaḻagang. Anaani nganggaṉbina anaani aḏaba, anaani yamba ngani-magaa ngayawi-nyinyung na-Baba niga.” Dani-yung na-Jesus ni-yambini, wani-magaa.

¹⁹Nga warraawurru-yung warra-wurru-wurruj wurraawanggini anaani-yung. Nga wurru-wundangayn aḏaba wugurraajbaj-balij. Nga warraawurru-yung wurru-mulu-ḻibawaynjiyn aḏaba.

²⁰Warra-mulung-arrgi-yung warra-wurru-wurruj wugurru wurru-yamaa, wurru-yambini “Naadagu ni-wan-gaagidhiyn, naadagu yamba niga ni-waṉagana man.gurrg! Aḏaba yagi nguunu-yaynjangi naadagu, ngaambu-burraa-wugij.” Dani-yung wurru-yamayn.

²¹Nga wugurraayung warra-mulung-aynbaj wurru-yamayn, “Waari niga ani-waṉagang ana-man.gurrg. Warrubawi-yung-maynji amburru-waṉagana-maynji ana-man.gurrg, waari warrubawi-yung wu-yambi nigawi-yii ni-yambina-yii. Marri ngijang, ana-man.gurrg waari anubani-yung wanggu-maṉmi warruburru-yung warra-bagaḻang-aladi, nga yagi wurraarranggi wugurru.” Dani-yung wurru-yamayn wugurru.

²²Anubanila-wala, manubama-yung mana-mariga ma-jirrarrjiyn magurru. Warra-Jew wurru-muṉḏugaa anubani-rruj ana-Jerusalem-duj. Anaani-yung wurru-wijangani warra-miyn-ngambara-waj, anubani-yung-jinyung yaga Wirri-maṉngulg-gaa anubani ana-Temple-Maṉngulg ngijang, anubani-yunggaj yaga.

²³Nga naagi-yung na-Jesus marri warruburru-yung wurru-marrbuy-maa-yinyung, anubani wurru-yanggi wubani a-wumurrng-duj, wubani wu-mayini Solomon Arabarabalu-rruj, wubani-rruj a-Temple-uj.

²⁴Arraarrawindi anubuguni wurru-yanggi nga anubagu wurru-muṉḏugaa, nga wuu-yambiynjini anubagu nga wurru-yamayn, “Yuga nagang aadanu yijgubulu nagang nu-Messiah aadanu? Nga nimba-magana aḏaba andhurrg, anaani yamba nurraambaambu-narrini nurru wubani-yunggaj.” Dani-yung nga wunu-magayn nigawi-wuy.

²⁵Nigaayung na-Jesus wani-yambalmayn, “Anaani ngana-magaa wubani-yunggaj yagu! Waari nugurru yamba ngirrii-ngu-jambarrgini. Anaani nga aniij-mamaaḻang-jinyung anubani ngaaṉbini-yinyung, anaani nga ngayawi-wala marri na-Baba-wala anaani ngaaṉbini. Bani nga nugurru aadanu nanggu-bajiyini.

²⁶Yagu nugurru waari aadanu nga ngirrii-ngu-jambarrgiiyn, waari yamba ngayawi-nyinyung-magaa nugurru aadanu.