YOHAAN 10:5-26

⁵Jaŋ kamu/ jin di ki she/ mo tani mina uni ’koki baṯẖi sho’k mo be, hili uni mini so mo ’peni a’di mo haali/ uni ’koki mish ’twa/ gi ’kwanin tiya mo be.

⁶Gwom poḵ yansan ṯor ma Yesus uni mo, hili uni ’koki mish gwo ’ban mo, gwo jin okina a’di uni mo be.

⁷Wakan Yesus ki o uni gwo doḵ/e mo ki: Aha/ ṯora um gwo mo ki: Aha/ tana ’twaŋkal gom ḵa’bal mo be.

⁸Aris uni ’baar mo kun iiyini ṯwa/a/ ki aha/ mo tani uni ta ’kwanin ’di/ mo dhali kun ta imandil to mo. Hili ḵa’bal ’koki c̱i bwa ’kup̱ ki uni mo be.

⁹Aha/ tana ’twaŋkal mo. Waḵki/ jan ṯal ’deŋ kamu/ midi seyu/ i aha/ mo tani a’di minu woṯẖ mo dhali midi seyu/ bwaman mo dhali ya ka pije/ mo dhali gama shon dhii/i’d mo be.

¹⁰’Kwanin ’di/ uni p̱u’dkin mo mmoḵwal to jasi ’te/ mo dhali mmo’kosha ’kosh mo dhali mmo’ce’da ’ce’d sho’k mo. Aha/ p̱u’dkina mo ki uni mini ta gi moŋ’koki/e mo dhali mmota gi a’di ki nyanye/ mo be.

¹¹Aha/ tana manhil ḵa’bal jin ’boro’d mo. Amanhil ḵa’bal jin ’boro’d ki kar mondiki/em piti a’cesh gom ḵa’bal mo be.

¹²Hili a’di jin mii to ka guurush mo dhali diki ta manhil ḵa’bal mo tani dhali ḵa’bal ’koki ta kum piti mo tani ki a’di p̱arki’da wu e mo mmoyayu/ mo tani a’di ki dhal ḵa’bal ’pen mo dhali gus mo be dhala wu ki bu’th uni mo dhali c̱eker uni bwa mo be.

¹³A’di guski’d mo haali/ a’di ta’da manmii to ka guurush mo be dhali bwaŋ kamu/ yisa ta a’di pa gom ḵa’bala.

¹⁴Aha/ tana manhil ḵa’bal jin ’boro’d mo. Aha/ misha kum pem mo dhali kum pem mishi aha/ mo be.

¹⁵Me’d jin mishkin ma Baba aha/ mo tani dhali aha/ misha Ababa mo. Dhali aha/ karkina mondiki/em pema ’cesh gom ḵa’bal mo be.

¹⁶Dhali aha/ tana gi ḵa’bala tiya kun ’koki ’ko eya goŋ yansan mo. Aha/ mina mii susi uni si’da/ mo, dhali uni mini c̱i bwa gom ’twam pem mo be. Wakan uni mini ta ama’dinya ṯal ’de/ mo be dhali amanhil ḵa’bal midi di ’de/ mo be.

¹⁷Gom ’kup̱ gwo gi wakan mo tani Ababa enki aha/ mo haali/ aha/ karkina mondiki/em pema ’cesh mo ki aha/ mina ’taki bu’th a’di ka nyaŋ’ko’d mo be.

¹⁸Wathin ṯal deŋ kamu/ yisa di’da jin midi bu’th a’di ’peni aha/ mo, hili aha/ karkina a’diya ’cesh ki bwam pem gana/ mo. Aha/ tana gi mom’bi’th mo mmokar a’diya ’cesh mo dhali aha/ tana gi mom’bi’th mo mmobu’th a’di doḵ/e mo be. Gwoŋḵan yan bu’thkika/ ’pena Babam pem mo be.

¹⁹Dhali gwo jin dheru ’kwani bwa mo doḵ/e diki’d mo e bwaŋ ’Kwani Yahuuda/ mo haali/ gom gwo gwansan mo be.

²⁰’Kwanin tiya ka ris o gwo mo ki: A’di ta’d ga ruma ’cesh mo dhali a’di guski’da du mo. Atinta ciḵa um gwom piti mo?

²¹Kun tiya o gwo mo ki: Gwo gwansan ’koki ta gwo gi wathi/ jin taki’d ga ruma ’cesh mo. A/min ma ruma ’cesh mish ḵa’d wathiny ja’da/ e mowa?

²²A’di ta’da ayuḵ jin yuḵu ka tul ’kup̱ mo mmokar gu’b gi mondheleladhelel ki she/ mo (mmokar a’di ki she/ ’ko’di a’di nyoŋkunu doḵ/e mo be) e Pa Urushaliim mo be.

²³A’di ta mondiṯ mo dhala Yesus yaki’d ki sho’k e gu’b gi mondheleladhelel eya lambalany ma Sulemaan mo be.

²⁴Wakan ’Kwani Yahuuda/ tulki is i a’di mo dhali o a’di gwo mo ki: /E mini dhu am ki mo gi wakata mmoshi bwa ’kup̱ mo kan? Waḵki/ /e tana Ḵrisṯẖos mo tani ṯori aman gwo shoka ’cesh ka ji sho’k mo ma.

²⁵Yesus ki thoḵ uni gwo mo ki: Aha/ ṯorkina um gwo mo tani dhali um ’koki gam gwo is mo. Gom mii kun miikika/ ki gway ma Babam pem mo tani uni ṯorki gwo gom aha/ mo be.

²⁶Hili um ’koki gam gwo is mo haali/ um ’koki ta uni kun cilka/ ki ḵa’bal pem mo.