Yohannisa 10:5-26

⁵Imatha asa qaala eronta gish izappe baqattettes attin mulekka iza kaallettenna.”

⁶Yesusi hessa leemisoza istas yootides shin isti qasse izi istas yootidayssa aykkokka eribetenna.

⁷Hessa gish Yesusi qasseka istas “Ta intes tumu gays; dorsata pengey tana.

⁸Taappe kase yidayti wuri kaysonne bonqizayta. Dorsati gidikko isti giza siybetenna

⁹Pengey tana. Ta baggara gelizadey wuri attana; gelananne kezana; heemmetizasoka demmana.

¹⁰Kaysoy kaysotana, wodhanassinne dhayssanas xalla yees. Ta gidikko intes de7oy daana malanne intes keehi darana mala yadis.

¹¹“Ta lo7o heemmizade; lo7o heemmizadey ba shempo ba dorsata gish aaththi imees.

¹²Miishera qaxarettidi heemmizadey gidikko dorsati izas gidonta gish kana suytey yiza wode dorsata yeggidi baas baqatees. Kana suyteykka dorsata dafi dafi meessinne laalles.

¹³Baqatizaddey miishan qaxarettidade gidida gishshinne dorsatas mishetonta gishassa.

¹⁴“Lo7o henthanchay tana. Tani ta dorsata erays; Istika tana erettes.

¹⁵Hessika Aaway tana erizayssa mala tani ta shempo dorsata gish aaththa immana.

¹⁶Hayssa ha dorsa yiren gelontayti taas hara dorsati deettes; ta istaka haa ehanas taas bessees. Istika ta qaala siyananne issi mehe gidana. Heemmizayssika issade gidana.

¹⁷Ta zaarada denthanas ta shempo ta aaththa immiza gish ta Aaway tana dosees.

¹⁸Tani ta shempo ta dosara aaththa immadis attin oonikka taappe woththi ekkenna; ta aaththa immanas gidin woykko zaara denthanas gidin sheney taassa; hessa he azazoza tani ta Aawappe ekkadis” gides.

¹⁹Hessa he qaalappe dendidayssan Ayhudata giddon qasseka shaaketethi medhetides.

²⁰Daro asay “Iza bolla daydanthi diza gishshinne goosh gidida gish inte izi gizayssa ays siyeetii?” gida.

²¹Baggayti qasse “Daydanthi dizaddey hayssa mala deenna. Daydanthi qooqida ayfe pathi erizee?” gida.

²²Yerusalamen Xoossa Keeththa ooratho ba7aale boncho wodey gakkides; he wodeykka balgo.

²³Yesusi Xoossa Keeththa gibbe giddon Solomoone simeretethasora aadhdhishin,

²⁴Ayhudati iza giddo aaththidi “Ne ayde gakkanaas nu wozna hirgan gam7isanee? Ne Xoossi kiittidade gidikko nuus qoncisa yoota” gida.

²⁵Yesusikka istas “Ta intes yootadisko shin inte qasse ammanibeyketa. Ta Aawa sunthan ta ooththiza malatati ta gish yootetes.

²⁶Inte qasse ta dorsata gidonta gish tana ammanekketa.