Job 36

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal Ilaihu bin kipgon tok,

²“Wal yu gibit mi taim en yu irrim wanim ai garra tok. Ai garra tok blanga God na.

³Wal God im olweis rait, en dijan wed kaman streit brom im na.

⁴Yu sabi wanim ai garra dalimbat yu im trubala, dumaji mi sabi brabliwei.

⁵“Wal God im brabli haibala, en im na oldei lukaftumbat ebribodi en im na oldei gibit feyago langa ebribodi.

⁶Detlot nogudbala pipul garra binij, en detlot hu abumbat adtaim garra abum feyago.

⁷God oldei lukaftumbat gudbala pipul en im meigim olabat jidan haibala olagijawan.

⁸Bat wen eni pipul jidan prisana langa olabat trabul en pein,

⁹God shoum olabat wanim nogudbala ting en praudbala ting olabat dumbat, en im gibit woning langa olabat blanga libum olabat nogudbalawei en tenim miselp langa im.

¹¹En if olabat teiknodis, olabat gin jidan gudbalawei en brabli hepiwan longtaim.

¹²Bat if olabat nomo teiknodis en olabat nomo laigim lagijat, wal olabat garra ol dai brabli nogudbinjiwei.”

¹³Wal Ilaihu bin kipgon tok, “Sambala pipul hu nomo bilib langa God jidan brabli wail wen im panishim olabat, en dei nomo askim im blanga album olabat.

¹⁴Wal olabat dai wen olabat stil yangbala, en ebribodi sheim nomo lilbit blanga olabat, dumaji deibin dumbat olkain brabli nogudbala ting.

¹⁵Bat wen sambala pipul oldei abumbat detmatj trabul en adtaim, God oldei opinap olabat irriwol blanga titjimbat olabat.

¹⁶“Wal Job, God na wandi bringimap yu brom yu trabul, en meigim yu jidan gudbalawei, en gibit yu detmatj gudwan daga du.

¹⁷Det panishmen blanga yu nogudbalawei bin kaman langa yu.

¹⁸Bat yu garra wotjimbat miselp en nomo larram ola enijing deigimwei yu brom God.

¹⁹Blanga yu pawa kaan seibum yu, en ol yu ritjwan ting kaan seibum yu du.

²⁰Yu en ola pipul kaan faindim seifwan pleis wen yu binijap.

²¹Wotjim miselp! Nomo trai blanga bulurrum det nogudbalawei, en nomo trai ranawei. Det trabul album yu blanga meigim yu jidan gudwei.

²²“Trubala God im garram detmatj pawa. Im brabli gudwan titja.

²³Nobodi gin dalimbat im wanim im garra dum. Nobodi gin tok im dum nogudbala ting.”

²⁴Wal Ilaihu bin kipgon tok langa Job, “Najalot pipul oldei preisimbat God blanga wanim im oldei dum. Wal wotfo yu kaan joinin langa olabat du?

²⁵Brom iya langa dijan wel, ebribodi oldei lukap langa det skai en luk langa det san, mun en detlot sta en sabi God im garram detmatj pawa. Im jidan brabli haibala, en nobodi gin sabi haulong imbin jidan.

²⁷God oldei majurrumap ola woda langa detlot klaud en im gibit wi rein.

²⁹Hu garra sabi hau God oldei spredimatbat detlot klaud en oldei tok brom im kemp langa detlot thanda?

³⁰En wen God oldei jandim laitining, det lait nomo godan raitdan andanith langa solwoda.

³¹Wen God wandim jandim rein, im meigim ebrijing gro gudwei blanga gibit wi daga blanga dagadagat.

³²En wen wi luk det laitining im oldei shoum wi blanga im pawa, en det laitining oldei go weya im wandim im blanga go.

³³Wen wi irrim det thanda oldei jingat, im dalim wi God im brabli wail langa det nogudbalawei.”